Apocalipsi 1 - Tachi Ak'õre Pedea

Nãɨ k'art'ade Juanpa naa bɨda

¹ Mɨ Jesucristo pae pari mimiaparí Juanpɨ. Nãɨ k'art'ade bɨ bɨma Jesucristopa pajãnepa mɨá k'awapida. Mãɨ Tachi Ak'õrepa Jesucristoa k'awapisima chi ichide ĩjãa berã́ k'awapimẽrá tãaraawẽa bɨde sãit'a. Jesucristopa ɨt'aripa peeda aba mɨmá peesima mãɨ k'awapimẽrá.

² Jõma mɨa ununa piarã jara bɨma. Mɨa jararuma nãɨ pedea Tachi Ak'õrenepa che bɨt'a mãɨnepa Jesucristopa piarãt'a k'awapisit'a.

³ Nãɨ Tachi Ak'õre pari pedeaparí pedea ũpẽarã k'ĩrari eda jararupa minachia pia baipɨ. Mãɨnepa chi nãɨ pedea ũrinak'ari oo berã minachia pia p'ananaipɨ, tãaraawẽa bɨde ara mãɨyai pẽra.

Ũpẽarã Asia tuadepema pae Juanpa bɨda

⁴ Mɨ Juanpɨ. Nãɨ k'art'a bɨruma ũpẽarã p'uuru siete p'anɨ, Asia tuadepemarã pae. Mɨa k'ɨ̃ria bɨma Tachi Ak'õrepa ichi sõpiadepa mãra k'aripa bait'a mãɨnepa ne k'ɨ̃risiawẽa bapiit'a. Mãɨ ichipɨ, ichi naena basima mãɨnepa ichi chei bɨpɨ. Mãɨnepa mɨa k'ɨ̃ria bɨma chi suak'a beeparí auk'ará bɨ k'ĩrari siete jaore p'anɨpa mãɨya oo p'ananait'a.

⁵ Mãɨnepa k'ɨ̃ria bɨma Jesucristo pida mãɨya oo bait'a. Ichia Tachi Ak'õre k'orea piarã jaraparima. Piu bada naa chok'ae p'irabarisima, ãarea nãɨ ĩjũanepema chi poro jũra jɨ̃parí jɨ̃ p'anɨrã k'aepẽra chi atepe bai k'orea. Mãɨpa tachi k'ɨ̃ria bɨma mãɨnepa ichi oadepa nemietaadepema k'aripasima.

⁶ Tachi bɨsima Tachi Ak'õre juade p'aarerã p'ananamẽrá. Mãɨya ichi Pajãnepema Ak'õrepa k'ɨ̃ria bɨt'a oo p'ananaipɨ. Mãɨa pia pedeadai p'anɨma. Pia bɨma ichit'a ewaricha jõmãɨrã Chipari bait'a. Mãɨya beese.

⁷ Ak'ɨt'ɨ. Cristo jɨ̃arane cheipɨ. Mãɨne jõmãɨrãpa ununaipɨ. Chi ichi sudada pida ununaipɨ. Ichi unuutade jõma nãɨ ĩjũanepema jẽanaipɨ. Piarã mãɨya baipɨ.

⁸ Tachi Chiparipa jarasima: «Mɨt'u chi Ne Ãarea P'ue Bɨ Tachi Ak'õrepɨ, chi Alp'apɨ mãɨnepa chi Omegapɨ. Mãɨpa jara bɨma mɨ chi Naapemapɨ mãɨnepa chi K'aadeapemapɨ. Mɨpɨ, naena basima, mãɨnepa chi chei bɨpɨ».

Juanpa Cristo ununa

⁹ Mɨ mãra ũpẽa Juanpɨ. Tachi Jesucristo ome p'anɨ pẽra mɨ mãra ome Tachi Ak'õre juadepemapɨ, mãra ome minachia mĩa bɨma, mãɨnepa mãra ome ãarea choa bɨma. Tachi Ak'õre pedea jaratea bɨ k'orea mãɨnepa chi Jesú pedea piarãane a bɨ k'orea mɨ chi p'usade ĩjũa ãpia p'ɨrra bɨ Patmodea ateepisidama.

¹⁰ Tachi Chipari ewaride mɨ Tachi Ak'õre Jaoredepa basima. Mãɨne mɨ ãpɨte abaɨpa pedea ãnimara k'achu chaaru jĩra ũrisima.

¹¹ Mãɨpa jarasima: «Pɨa unurut'a k'art'ade bɨk'ari ũpẽarã siete p'uuru bede p'anɨmá tea peese: Ep'esodea, Esmirnanea, Pérgamonea, Tiatiradea, Sardidea, P'iladelp'iadea, mãɨnepa Laodiceadea».

¹² Mãɨne mɨa ãpɨtea ak'ɨsima k'ai pedea bɨt'a k'awayá. Mãɨ ak'ɨside ĩpira nee ooda siete unusima.

¹³ Mãɨ siete ĩpira p'anɨ esa, mɨa chi Ẽpẽra Warra jĩra bɨt'a unusima. Anamari waa tachi jĩrumá jɨ̃ basima. Ichi p'echude nee ooda pará basima.

¹⁴ Ichi puda t'ot'oa basima oveja k'ara jĩra wa jɨ̃ara t'ot'oa jĩra. Ichi tau t'ɨpɨ urua jĩra basima.

¹⁵ Ichi jĩru bronce t'ɨpɨde torroapidak'ari achiterreada jĩra basima. Ichi pedea to minachia cheru jĩra jĩk'ua basima.

¹⁶ Ichi juaraari k'ãk'ãi siete uru basima. Ichi ok'arradepa k'ĩruuparí nek'o k'ida k'ĩrachu era bɨt'a ochia basima. Ichi k'ĩra ɨmata achiterrea bɨ jĩra basima.

¹⁷ Ichi unuside ne wap'eapa mɨ ichi jĩru k'ait'a piuda jĩra jeeda baesima. Maamina ichi juaraara mɨ ɨ̃rɨ bɨk'ari jarasima: «Ne wap'earãse. Mɨ chi naapemapɨ mãɨnepa chi k'aadeapemapɨ.

¹⁸ Mɨ chi Chok'ae Bɨma. Mɨ piudamina ak'ɨse chok'ae bɨ, mãɨnepa ewaricha chok'ae baipɨ. Mɨa piudarã chok'ae p'irabaripi bɨma.

¹⁹ Pɨa unu bɨt'a k'art'ade bɨse. Idiapae sãmaasã́ nɨbɨ mãɨnepa k'aadea sãmaasã́ nɨbaidepema sida bɨse.

²⁰ Mɨa k'awapiipɨ pɨa ununa siete k'ãk'ãi mɨ juaraari uru bɨpa k'ãre jara bɨt'a mãɨnepa mãɨ siete ĩpira nee oodapa k'ãre jara bɨt'a. Mãɨ siete k'ãk'ãipa jara bɨma Tachi Ak'õrepa ɨt'aripa peedaɨrã siete p'anɨt'a. Mãɨ siete p'anɨpa chi ũpẽarã siete p'uuru ak'ɨ uru p'anapatama. Ãchicha mãɨ ũpẽarã p'uurudepemarã ak'ɨ uru p'anapatama. Chi ĩpira siete p'anɨpa jara bɨma chi siete p'uurudepemarã ũpẽarã.