3 Juan 1 - Tachi Ak'õre Pedea

Ũpẽa Gayopa pia ooda

¹ Mɨ Chõapɨ. Mɨa nãɨ k'art'a bɨruma mɨ ũpẽa Gayo pae. Mɨa pɨ piarã k'ɨ̃ria bɨma.

² Ũpẽa, mɨa Tachi Ak'õrea ɨt'aa chiidi bɨma pɨ ichi ome pia bɨ pẽra ne ãareaɨne pia bamẽrá mãɨnepa k'ak'ua pia bamẽrá.

³ Mɨ minachia arapaasima, waapẽarã ũpẽarã mɨmá chedaadapa nepɨrɨsida pẽra pɨa chi piarã pedea ĩjãa bɨt'a.

⁴ Mɨ ũpẽarãpa chi piarãpẽa pedeade nina ũrirune mɨ minachia arapá baparima.

⁵ Ũpẽa, pɨa ũpẽarã k'aripa bɨdepa pia oo bɨma. Chi pɨa unuk'apɨ́ ũpẽarã sida k'aripapari pẽra piarã minachia pia oo bɨma.

⁶ Ũpẽarã ará p'anasidaɨde, jõmãɨrã taade ãchia pɨ k'ɨ̃ria p'anɨ k'orea nepɨrɨsidama. Mɨ k'ĩra chupuriase, ãchi k'aripase pia wãnamẽrá Tachi Ak'õrepa ichia ooda oopataɨrã k'aripapipari jĩra.

⁷ Ãchi Jesucristo k'orea jarateade wãsidaɨde, chi Tachi Ak'õrene ĩjãanak'apɨɨrã́ ne ididaé pasima k'aripadamẽrá.

⁸ Mãɨ k'orea tachia mãɨ ũpẽarã k'aripadai p'anɨma. Mãɨya ãchi ome ará mimia p'anɨma Tachi Ak'õre piarã pedea k'awapidai k'orea.

Ũpẽa Diotrep'epa piawẽa ooda

⁹ Mɨa k'art'a jõma ũpẽarã jãmapema pae naena bɨsima. Maamina Diotrep'epa tai pedea ĩjãawẽa bɨma. Ichi ũpẽarã t'ãena chi atepe ba k'ɨ̃ria bɨma.

¹⁰ Mãɨ k'orea jãmá wãrune mɨa jõmãɨrã́ k'awapiipɨ ichia piawẽa oo bɨt'a. Ichia seadepa tai k'orea k'achia pedeaparima. Mãɨ awara chi ũpẽarã jarateapataɨrã jãmá wãutá ichia pia pedeak'ama mãɨnepa ũpẽarãpa ãchi tede mãɨrã k'ãipidayá ooutade itu k'ãipik'ama. Mãɨrã́ pia pedeasidara mãɨ ũpẽarã ãyá jeret'aaparima.

Ũpẽa Demetrio k'orea pia bɨda

¹¹ Ũpẽa Gayo, nemietá oopataɨrã jĩra barãse mãɨpari pia oopataɨrã jĩra base. Chi pia ooparí Tachi Ak'õrenepɨ, maamina chi nemietá ooparipa Tachi Ak'õre atua bɨma.

¹² Ũpẽa Demetrio k'orea jõmãɨrãpa pia pedea p'anɨma. Chi piarã pedea ĩjãa bɨdepa unupi bɨma ichi jĩp'a bɨt'a. Tai pida ichi k'orea pia pedea p'anɨma. Mãrapa k'awa p'anɨma taipa jara p'anɨ piarãt'a.

Juanpa nãɨ k'art'ade k'aadea bɨda

¹³ Mɨa ne minachia pɨá jara k'ɨ̃ria bɨma. Maamina nãɨ k'art'ade mãɨ ãarea bɨ k'ɨ̃riawẽma.

¹⁴ Tãaraawẽane pɨ ak'ɨde wã k'ɨ̃ria bɨma. Maapae ará pedeadaipɨ.

¹⁵ Mɨa k'ɨ̃ria bɨma Tachi Ak'õrepa ichi ne k'ɨ̃risiawẽa pɨ sõne bapiit'a. Chi nãmapema ũpẽarãpa k'ɨ̃ria p'anɨma pɨ pia bait'a. Jãmapema ũpẽarã́ ãchicha jarapade ase mɨa k'ɨ̃ria bɨma ãchi pia tuananait'a.