2 Timoteo 4 - Tachi Ak'õre Pedea

¹ Jesucristo cheipɨ ichidirã ichi juade ua bai k'orea. Mãɨne ẽpẽrarã chok'ae be mãɨnepa piudada nepɨra ak'ɨipɨ. Mãɨpuru Jesucristo k'ĩrari mãɨnepa Tachi Ak'õre k'ĩrari mɨa nãɨ pedea jararuma pɨa oomẽrá:

² Tachi Ak'õre Pedea jaratea base. Ẽpẽrarãpa ũri k'ɨ̃ria p'anɨne mãɨnepa ũri k'ɨ̃riawẽa p'anɨne jarateai k'orea base. Piawẽa oo be jĩp'a oo k'awapise. Nemietá oo be ɨtɨase. Mãɨnepa ũpẽarã k'aripase pia ĩjãanamẽrá. Jõma choa bɨdepa, jĩrak'aua jaratea bɨdepa mãɨya oose.

³ Ewari parude ẽpẽrarãpa chi piarã pedea ũri k'ɨ̃rianawẽa p'ananaipɨ. Mãɨpari ãchia k'ɨ̃ria p'anɨnea wãnaipɨ. Mãɨpuru jarateapataɨrã chok'ará jɨrɨdaipɨ ãchia ũri k'ɨ̃ria p'anɨt'a jarateadamẽrá.

⁴ Chi pedea piarãpẽa ũrinai itu bɨdak'ari, maapae chõarãenapema nepɨrade p'aneenaipɨ.

⁵ Maamina pɨt'u ne ãareaɨne k'ĩra jĩp'a base. Jõma nepɨra bɨde choa base. Pedea pia Cristo k'orea jaratea base. Jõma pɨa Tachi Ak'õre pae ooi bɨ jĩp'a oo base.

⁶ Tãaraawẽane mɨ peadaipɨ. Mɨ piui ewari ara k'ait'a bɨma.

⁷ Mɨa Tachi Ak'õre pae ooi bada jõma oosima pia chõona jĩra. Mɨa Cristo itu bɨwẽa bɨma. Jõma jĩp'a oosima p'iraparí jĩra.

⁸ Naapae mɨa jĩp'a oo bɨ k'orea Tachi Chiparipa mɨ pae poro jũra jɨ̃parí uru bɨma. Ichia jĩp'a ak'ɨpari pẽra mãɨ poro jũra jɨ̃parí mɨá teaipɨ ichia ak'ɨrude. Maamina mɨá puru teaiwẽma, mãɨpari jõma ichi chei ewari unu k'ɨ̃ria berã́ teaipɨ.

Pablopa jarada Timoteo chemẽrá

⁹ Isapea mɨ ak'ɨde chese.

¹⁰ Ũpẽa Cresente Galacia tuadea wã basima. Tito Dalmacia tuadea wã basima. Mãɨ awara ũpẽa Demapa chi ne nãɨ ĩjũanepema minachia k'ɨ̃riana pẽra mɨ itu bɨk'ari Tesalónica p'uurudea wãsima.

¹¹ Ũpẽa Lucat'u mɨ ome bɨma. Pɨ cherude ũpẽa Marco jɨrɨde wãk'ari enemeese. Mɨa Tachi Ak'õre pae oo bɨ ichia k'aripai bɨma.

¹² Ũpẽa Tík'ik'o mɨa Ep'esodea peesima.

¹³ Pɨ cherude mɨ anamari jɨ̃parí enemeese. Mãɨ Troa p'uurude, ũpẽa Carpo tede beesima. Mãɨnepa mɨ k'art'a enemeese. Chi mɨa atepe k'ɨ̃ria bɨt'a enemeese, chi ãnimara ede bɨ bet'a.

¹⁴ Alejandro chi jiorro ne ooparipa mɨ piawẽa ooda k'orea Tachi Chiparipa ɨtɨaipɨ.

¹⁵ Ichi ome jĩrak'aua base. Tachia jaratea p'anɨ k'orea ichia minachia k'achia pedeasima.

¹⁶ Ara mɨchi k'orea chi nepɨra ak'ɨpataɨrã k'ĩrari pedeaside abaɨ pida mɨ k'orea pedeadaé pasima k'aripai k'orea. Mãɨpari jõmãɨrãpa mɨ itu bɨsidama. Mɨa k'ɨ̃riawẽma mãɨ k'orea Tachi Ak'õre k'ĩrari mãɨrã nepɨra pará p'anɨane amẽrá.

¹⁷ Maamina Tachi Chipari mɨ ome basima. Ichia mɨ jua chaarea beepisima ichi pedea jaramẽrá. Mãɨya jõma judiorãwẽa ará p'anɨpa ũrisidama. Mãɨne Tachi Chiparipa mɨ imama it'aedepema k'aripasima.

¹⁸ Ichia jõma mɨ piawẽa ooutadepema k'aripaipɨ. Mɨ pia ak'ɨk'ari, pajãnea ateewãipɨ ichidirã ichi juade ua bɨmá. Ewaricha ichiá minachia pia pedeadai p'anɨma. Mãɨya beese.

Pablopa k'aadea bɨda

¹⁹ Mɨa ũpẽa Aquilá mãɨnepa Priscá pia p'anapade a jara peeruma. Ara mãɨ jĩra ũpẽa Onesíp'oro ẽpẽrarã́ jarase.

²⁰ Ũpẽa Erasto Corinto p'uurude beesima. Ũpẽa Tróp'imo k'ɨdade beeda pẽra, mɨa ichi Mileto p'uurude ameesima.

²¹ Ewãra pai naena isapea chese. Ũpẽarã Eubulopa, Pudentepa, Linopa, Claudiapa mãɨnepa jõma ũpẽarãpa pɨ pia bapade a jara peeutama.

²² Mɨa k'ɨ̃ria bɨma Tachi Chipari Jesucristo pɨ ome bait'a mãɨnepa Tachi Ak'õrepa ichi sõpiadepa mãra k'aripa bai. Mãɨya beese.