2 Timoteo 3 - Tachi Ak'õre Pedea

K'aadeapema ewaride ẽpẽrarã mietá p'ananaipɨ

¹ Chi k'aadeapema ewaride ne k'achia baei bɨt'a, pɨa mãɨ k'awa bai bɨma.

² Ẽpẽrarãpa ne ãarea ara ãchi pae k'ɨ̃rianaipɨ, erreara awaa p'ananaipɨ, ãchi pia beade adaipɨ, chi atepe bɨ jĩra k'ɨ̃risiadaipɨ, chĩara k'orea k'achia pedeadaipɨ, ãchi ak'õre mãɨnepa nae pedea ĩjãanak'á p'ananaipɨ, ãchi k'ariparu ẽpẽrá sõpia bɨade adak'á p'ananaipɨ, mãɨnepa Tachi Ak'õre wap'eadak'á p'ananaipɨ.

³ Waapẽarã k'ɨ̃rianak'á p'ananaipɨ, k'ĩra chupuriadak'á p'ananaipɨ, waapẽarã ẽk'arra ãpɨte pedea k'achia jara p'ananaipɨ, nemietá oodai k'orea p'ue itu bɨdak'á p'ananaipɨ, ãnimara jĩra k'ĩruu p'ananaipɨ, mãɨnepa nejõma pia be itu bɨdaipɨ.

⁴ Ãchi k'õp'ãero ichi nek'ĩramá juade bɨdaipɨ nemietá oomẽrá. Ne k'ɨ̃risiadawẽa ne paritua oo p'ananaipɨ. Jõmãɨrã k'aepẽra chi ne k'awa atepe beadayade adaipɨ. Ãchit'u arapá chi k'ɨ̃ria p'ananaipɨ Tachi Ak'õre k'ɨ̃ria p'anɨ k'aepẽra.

⁵ Tachi Ak'õrene ĩjãapataɨrã jĩra p'ananaipɨ maamina itu bɨdaiwẽma Tachi Ak'õrepa ichi jua chaareadepa ãchi jĩp'a bɨmẽrá. Makɨɨrã ome ará barãse.

⁶ Mãɨ ẽpẽrarã techa sea jara wãpatama chi wẽerã t'ajuwẽa be mãɨnepa nemietá minachia oopataɨ be p'uedai k'orea. Mãɨ wẽerãpa ãarea nemietá oo k'ɨ̃ria bɨdepa paritua ĩjãapatama.

⁷ Mãɨ wẽerã ewaricha ne k'awapodo p'anɨma, maamina chi piarã pedea p'ue k'awadak'ama.

⁸ Jãɨrã ẽpẽrarãpa chi piarã pedea itu bɨpatama. Jane apataɨ mãɨnepa Jambre apataɨ jĩra oopatama, chi Moisé pedea itu bɨsidaɨt'a. Ãchi k'ɨ̃risia k'achia k'ɨ̃risiapatama mãɨnepa Cristode piarã ĩjãanak'ama.

⁹ Maamina ãchia oo p'anɨ pia baiwẽma. Jõmãɨrãpa ãchi k'ɨ̃risiawẽa be ãarea k'awadaipɨ Moisé ewaride Jane mãɨnepa Jambre mãɨyanana jĩra.

Pablopa Timoteoa ũraana

¹⁰ Maamina pɨa nãɨ ãarea jõma minachia k'awa bɨma: mɨa jaratea bɨt'a, mɨ nipaparit'a, mɨa oo k'ɨ̃ria bɨt'a, mɨa Cristode ĩjãa bɨt'a, mɨa jõmãɨrã ome choa bɨt'a, mɨa waapẽarã k'ɨ̃ria uru bɨt'a, mɨ ne ãareane sẽwẽa choa bɨt'a,

¹¹ mãɨnepa mɨ ẽp'ẽ p'anɨt'a minachia mĩapidai k'orea. Antioquiade, Iconio p'uurude mãɨnepa Listrade mɨ piawẽa oodai k'orea ẽp'ẽnana pɨa minachia k'awa bɨma. Mɨ minachia mĩasima. Maamina Tachi Chiparipa jõma mãɨnepema k'aripasima.

¹² Piarã jõma Jesucristode ĩjãapataɨrã, Tachi Ak'õre k'ĩrari pia nipadai k'ɨ̃riapataɨrã, ẽpẽrarãpa piawẽa oodai k'orea ẽp'ẽnaipɨ.

¹³ Mãɨnepa ẽpẽra k'achiarãpa mãɨnepa awara seapataɨrãpa atepe nemietá oo p'ananaipɨ. Waapẽarã sea p'ananaipɨ mãɨnepa waapẽarãpa ãchi seadaipɨ.

¹⁴ Maamina pɨá jarateadada k'awada chi piarãt'a k'ɨ̃risia bɨ pẽra mãɨne nipase. Pɨa k'awa bɨma pɨá jarateadaadapa jĩp'a jarateasidaɨt'a.

¹⁵ Warra basiedapema Tachi Ak'õre Pedea k'awasima. Mãɨ Pedeapa pɨá k'awapi bɨma abaɨpa Cristode ĩjãasira Tachi Ak'õrepa mãɨ k'aripait'a.

¹⁶ Tachi Ak'õrepa jõma Ichi Pedea bɨpisima. Jõma mãɨ pia bɨma jarateai k'orea, nemietá oo berã ɨtɨai k'orea, piawẽa oo berã jĩp'a oo k'awapii k'orea, mãɨnepa sãmaasã́ k'ĩra jĩp'a nipadai k'awapii k'orea.

¹⁷ Mãɨya ẽpẽrarã Tachi Ak'õrenerãpa nejõma pia be oo k'awadak'ari p'ue oo p'ananaipɨ.