2 Timoteo 2 - Tachi Ak'õre Pedea

Sãmaasã́ Jesucristo pedea jarateai bɨ

¹ Warra, Jesucristo sõpiadepa chaarea base.

² Mɨa ẽpẽrarã chok'ará k'ĩrari jaratea badat'a pɨa ũrisima. Ara mãɨ jaratea bada pɨa pida waapẽarã ũpẽarã juade bɨese. Waapẽarãpa ãchidepuru ĩjãanai p'anɨma mãɨnepa p'ue pia jarateadai p'anɨma waapẽarã́ jarateadamẽrá.

³ Pɨ Jesucristodé papaká bɨ pia pẽra mɨ jĩra mĩai k'orea base.

⁴ Papaká bɨpa ne paritua ook'ama, mãɨpari ichi minachia k'awa bɨpa k'ɨ̃ria bɨt'a ooparima pia unumẽrá.

⁵ Mãɨnepa chi p'iraparí chi p'irapataɨ minachia k'awa berãpa jarapata jĩra p'iraepɨra, mãɨ naa pacherupɨra, chi atai bada ataiwẽma.

⁶ Chi ne uuparí minachia sẽwẽa mimiapari pẽra, ichia ne uu ĩjũa chaudadepema naa jitai bɨma.

⁷ Mɨa jara bɨ k'orea minachia k'ɨ̃risiase. Tachi Chipari Jesupa pɨá jõma mãɨ k'awapiipɨ.

⁸ Jesucristode k'ɨ̃risiase. Ichi Davidepa chedapɨ. Ichi piu bada Tachi Ak'õrepa chok'ae p'irabaripisima. Mãɨ pedea pia ichi k'orea mɨa jaratea bɨma.

⁹ Mãɨ jaratea bɨ k'orea mɨ minachia mĩa bɨma. Mɨ ẽpẽra k'achia jĩra k'ãnenapa jɨ̃ uru p'anɨma. Maamina Tachi Ak'õre pedea jɨ̃ uru p'anɨwẽma.

¹⁰ Mãɨ k'orea mɨa jõma choa bɨma Tachi Ak'õrepa jɨrɨ atada ẽpẽrarã k'aripai k'orea. Mãɨya Tachi Ak'õrepa ãchi sida Jesucristodepa k'aripaipɨ, ewaricha ichi pia bɨdepema uru p'ananamẽrá.

¹¹ Nãɨ pedea piarã arí bɨ pẽra, mãɨne ĩjãanai p'anɨma: Tachi Cristo ome piudaipɨra, ichi ome chok'ae p'ananaipɨ.

¹² Tachi minachia mĩa p'anɨ choadaipɨra, ichi ome chi minachia k'awa p'anɨrã jĩra p'ananaipɨ. Tachia Cristo atua p'anɨane adaipɨra, ichia pida tachi atua bɨade aipɨ.

¹³ Tachia jara p'anɨ jĩra oodaepɨra, tachi mãɨya p'anɨmina, ichia jara bɨ jĩra ooparima, ara ichia jarada k'ɨ̃risia atuak'a pẽra.

Tachi Ak'õre pae pari mimiaparí sãmaasã́ bai bɨ

¹⁴ Jõma mãɨ tachi ũpẽarã́ k'ɨ̃risiapi base. Tachi Ak'õre k'ĩrari ũraase ãchi piawẽa be k'orea k'ĩruu pedea p'ananaiwẽa p'anɨ. Mãɨ k'ĩruu pedeapa tachi k'aripak'ama, mãɨpari chi ũri berã́ k'ɨ̃risia mietá k'ɨ̃risiapiparima.

¹⁵ Tachi Ak'õre pedea piarãpema arí jaratea bɨ unupi base. Mimiaparí pia bɨ jĩra jĩrak'aua oo base Tachi Ak'õrepa pɨ p'erawẽa pia unumẽrá.

¹⁶ Tachi Ak'õre k'ĩrari chi piawẽa berãpa k'achia pedeapataɨ itu bɨse. Chi mãɨya berã Tachi Ak'õrenepema t'ɨmɨa wãpatama.

¹⁷ Ãchia jaratea p'anɨpa ẽpẽrarã́ k'ɨ̃risia awara k'ɨ̃risiapiparima aidapa tachi k'ak'ua ãarea k'opodopari jĩra. Mãɨ jarateapataɨrãnepema Himeneo mãɨnepa P'iletopɨ.

¹⁸ Ãchi chi piarã pedeadepema ãyá wãsidama. Ãchia jarateapatama ẽpẽrarã piudada ya chok'ae p'irabarik'oasidat'a. Mãɨ k'orea waapẽarãpa Cristode ĩjãa p'anɨ k'orea k'ɨ̃risia ãyá k'ɨ̃risia p'aneesidama.

¹⁹ Mãɨya p'anɨmina, Tachi Ak'õre ẽpẽrarãpa Cristode minachia ĩjãa p'anɨma, te jĩrupa te chaarea bapipari jĩra. Tĩitaude ne bɨpata jĩra Tachi Ak'õrepa nãɨya jarasima: «Tachi Chiparipa jõma ichidirã k'awa bɨma». Mãɨnepa jarasima: «Ãarea Tachi Chiparide ĩjãa p'anɨane a berãpa k'achia itu bɨdai p'anɨma».

²⁰ Te waibɨa bɨde p'arat'u wawaria nee ooda mãɨnepa p'arat'a ooda p'anɨma. Ichiaba pak'uru ooda mãɨnepa yooro k'ada p'anɨma. Waapẽarã pia be pẽra paritua ewari ne oopataɨ k'orea p'anɨwẽma, mãɨt'u waapẽarã paritua ewari ne oopataɨ k'orea p'anɨma.

²¹ Tachi sida ara mãɨ jĩra p'anɨma. Tachia k'achia itu bɨdaipɨra, Tachi Chipari pae pia p'ananaipɨ. Mãɨya tachidepa ichia ne p'ue ooipɨ mãɨnepa nejõma pia oodai k'orea p'ananaipɨ.

²² K'ũtãarãpa nemietá oo k'ɨ̃riapataɨ jĩra oorãse. Mãɨpari jĩp'a ooi k'orea base. Jesude ĩjãa base. Jõmãɨrã k'ɨ̃ria base. Jõmãɨrã ome ne k'ɨ̃risiawẽa base. Tachi Chiparia ɨt'aa chiidipataɨrã ome sõ jĩp'a bɨdepa ãarea mãɨya base.

²³ K'ĩruu pedearãse chi arí k'ɨ̃risiadak'á berã ome, k'awa bɨẽra mãɨpa tachi k'ĩruupiparit'a.

²⁴ Chi Tachi Chipari pae pari mimiaparí k'ĩruu pedea baiwẽa bɨma, mãɨpari jõmãɨrã ome sõpia bai bɨma. Jaratea k'awa bai bɨma. Jõmãɨrã ome choa bai bɨma.

²⁵ Ichia pedea piadepa Tachi Ak'õre pedea k'awapi bɨma, chi ichia jaratea bɨ k'ɨ̃rianak'apɨ́ ẽpẽrarã́, mãɨ Tachi Ak'õrepa ãchi k'ariparupara. Mãɨya ichimá jĩitea chedak'ari chi piarã pedeat'a k'awadaipɨ.

²⁶ Arí k'ɨ̃risiasidara tiore juadepema wãnaipɨ. Ara nãɨena tiorepa jita ua bɨma ichia k'ɨ̃ria bɨ oodamẽrá.