2 Tesalonicense 3 - Tachi Ak'õre Pedea

Pablopa idida ichi pari ɨt'aa chiididamẽrá

¹ Mãɨ awara ũpẽarã, tai k'orea Tachi Ak'õrea ɨt'aa chiidit'ɨ Tachi Chipari pedea tuacha isapea wãmẽrá mãɨnepa ẽpẽrarãpa mãɨ k'orea pia jaradamẽrá mãra t'ãena mãɨyana jĩra.

² Tachi Ak'õrea ɨt'aa chiidit'ɨ tai ẽpẽra k'achia berãpa piawẽa oo k'ɨ̃ria p'anɨnepema k'aripamẽrá, Cristode ĩjãa k'ɨ̃riawẽa berã sida paara p'anɨ pẽra.

³ Maamina Tachi Chiparipa ooipɨ ichia jara bɨ jĩra. Ichia mãra k'aripa baipɨ choa p'ananamẽrá mãɨnepa k'achiadepema ak'ɨ baipɨ.

⁴ Tachi Chiparidepa k'awa p'anɨma taipa jarateadada mãrapa piarã oo p'anɨ mãɨnepa oopododaipɨ.

⁵ Taipa k'ɨ̃ria p'anɨma Tachi Chiparipa k'awapimẽrá mãra k'ɨ̃ria bɨt'a. Mãɨnepa k'ɨ̃ria p'anɨma ichia mãra k'aripamẽrá Cristopa choada jĩra choadamẽrá.

K'oawẽa mimianai k'orea

⁶ Ũpẽarã, Tachi Chipari Jesucristo t'ɨ̃nepa taipa mãrá jara peeutama ũpẽarã k'oa be ome ará p'anapidaemaapa. Jãɨrãpa taipa jarateadada jĩra oodak'ama.

⁷ Mãrapa k'awa p'anɨma tai nipadada jĩra mãra nipadai p'anɨ. Mãra t'ãena p'anasidaɨde tai k'oa pará p'ananaé pasima.

⁸ Taipa mãrané pari k'odaé pasima, mãɨpari ãst'á mãɨnepa teamasi ɨ̃apaadawẽa ne awara mimia p'anasidama mãranepema abaɨ pida taiyá ne pari teapiemaapa.

⁹ Piarã mãrapa k'aripadamẽrá taipa p'ue ne ididai p'anasidamina, ididaé pasima. Mãɨpari tai mimiasidama k'awapidai k'orea mãrapa abarik'a oodai p'anɨ.

¹⁰ Mãra t'ãena p'anasidaɨde taipa nãɨ jarasidama: «Chi mimia k'ɨ̃riawẽa bɨa nek'opirãt'ɨ».

¹¹ Taipa ũri p'anɨma ara machi ũpẽarã paara, eda chi k'oa pará be p'anɨ. Ãchi mimianak'ama mãɨpari chĩara nepɨrade p'anapatama.

¹² Mãɨ ũpẽarã́ taipa Tachi Chipari Jesucristodepa chichupuria idiutama ne k'ɨ̃risiawẽa mimianamẽrá nek'odai uru p'ananamẽrá.

¹³ Maamina ũpẽarã, pia oo p'anɨnepa sẽrãt'ɨ.

¹⁴ Taipa nãɨ k'art'ade jarateadada abaɨ pida ĩjãaepɨra, jõmãɨrã́ k'awapit'ɨ piawẽa oo bɨt'a. Ichi ome ará p'anarãt'ɨ p'eramẽrá.

¹⁵ Maamina ichi mãra ome chi nek'ĩramá jĩra uru p'anarãt'ɨ, mãɨpari mãra ũpẽa pẽra jarat'ɨ jĩp'a oomẽrá.

Pablopa k'aadea bɨda

¹⁶ Taipa k'ɨ̃ria p'anɨma Tachi Chipari ne k'ɨ̃risiawẽa p'anapiparipa mãrá ewaricha ne k'ɨ̃risiadawẽa ne ãareaɨne p'anapimẽrá. K'ɨ̃ria p'anɨma Tachi Chipari mãra ome bamẽrá.

¹⁷ Mɨ Pablopɨ. Nãɨ pedea mɨ juapa bɨruma. Jõma mɨ k'art'ade nãɨya bɨparima k'awapii k'orea mɨapuru bɨruma. Nãɨya bɨ baparima.

¹⁸ Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bait'a.