2 Tesalonicense 2 - Tachi Ak'õre Pedea

Chi ẽpẽra k'achia bɨ chei k'orea bɨda

^1-2 Mãɨ awara ũpẽarã, taipa chichupuria idi p'anɨma Tachi Chipari Jesucristo chei k'orea mãɨnepa tachi ichi ome ará p'ananai k'orea mãrapa minachia k'ɨ̃risiarãt'ɨ. Abaɨ pida Tachi Chiparipa ɨtɨai ewari ará pasiade aipɨra, ne k'ɨ̃risia pará p'anarãt'ɨ. Parituapa Tachi Ak'õrenepa pedea bɨ jĩra mãɨya jaraipɨra, wa mãɨya jarateaipɨra, wa taipa k'art'ade mãɨya bɨsidade aipɨra, ĩjãarãt'ɨ.

³ Mi ãpia pida abaɨa itu seapirãt'ɨ. Tachi Chiparipa ɨtɨai ewari pai naena chok'araɨrãpa Tachi Ak'õre itu bɨdaipɨ. Mãɨne chi ẽpẽra k'achia bɨt'a unupiipɨ. Mãɨ ẽpẽra Tachi Ak'õrepa t'ɨpɨ uruadea jira peeipɨ.

⁴ Mãɨ ẽpẽra k'achia bɨpa Tachi Ak'õre k'ɨ̃riawẽa baipɨ. Ichiaba jõmãɨrãpa nãɨ ĩjũanepema tachi ak'õreane apataɨ k'ɨ̃riawẽa baipɨ. Ichia ãarea mãɨ k'aepẽra chi atepe minachia k'awa bɨade aipɨ. Mãɨpuru Tachi Ak'õre te minachia bɨde suak'abari beek'ari ichit'a Tachi Ak'õreane aipɨ.

⁵ Mãramá baside mɨa ¿mãɨ k'orea jaraé pasik'ãra? ¿K'ɨ̃risiadawẽk'ãra?

⁶ Mãɨpuru k'awa p'anɨma k'ãrepa mãɨ ẽpẽra itu papiwẽa bɨt'a. Maamina ichi chei ewari paipɨ.

⁷ Idiapae tiorepa, ichia ne k'achia mẽra badadepa, nãɨ ĩjũane ne oomaa bɨma. Maamina chi itu bɨwẽa bɨpa mãɨ ẽpẽra k'achia bɨt'a itu papiwẽa bɨma. Mãɨya baipɨ aba Tachi Ak'õrepa chi itu bɨwẽa bɨ ãyá ateewãrunea.

⁸ Maapaepuru chi ẽpẽra k'achia bɨpa unupiipɨ. Maamina Tachi Chipari Jesú k'ĩrawãrea achiterrea cherude ara pedearupa mãɨ ẽpẽra peaipɨ.

⁹ Chi ẽpẽra k'achia bɨt'a tiorepa chepiipɨ. Mãɨpa tiore jua chaareapa ẽpẽrarãpa ne p'ue oodak'apɨ́ wawaria ook'oaipɨ, ẽpẽrarãpa Tachi Ak'õrepa mãɨya oo bɨade a k'ɨ̃risiadamẽrá.

¹⁰ Ne wawaria nemietá oo bɨdepa ẽpẽrarã t'ɨpɨ uruadea wãnai p'anɨ seaipɨ. Ãchia chi piarã pedea k'ɨ̃rianak'a pẽra Tachi Ak'õrepa k'aripaiwẽma.

¹¹ Mãɨpuru Tachi Ak'õrepa itu chi seat'a ĩjãapiipɨ. Mãɨya ara ãchi tuaba chi sea ĩjãa p'ananaipɨ.

¹² Mãɨ ẽpẽrarã chi piarã pedea ĩjãawẽa p'anɨrãpa nemietá oo k'ɨ̃ria p'anɨ pẽra Tachi Ak'õrepa nepɨra pará p'anɨane aipɨ.

Tachi Ak'õrepa ichi ĩjãapataɨrã k'aripada

¹³ Ũpẽarã, taipa ewaricha mãra k'orea Tachi Ak'õrea sõpia p'anɨane apatama. Tachi Chiparipa mãra k'ɨ̃ria bɨma. Ichia jua chiwidieda mãra jɨrɨ atasima k'aripai k'orea. Mãrapa ichi piarã pedea ĩjãa p'anɨ pẽra mãɨnepa ichi Jaorepa mãra ichi pae pia bɨda pẽra k'aripaipɨ.

¹⁴ Taipa chi pedea pia jaratea p'anɨnepa Tachi Ak'õrepa mãra t'ɨ̃sima Tachi Chipari Jesucristo pia bɨdepema atadamẽrá.

¹⁵ Mãɨpuru ũpẽarã, chaarea p'anat'ɨ. Taipa jarateadada mãɨnepa k'art'ade bɨdada k'ɨ̃risia atuarãt'ɨ.

^16-17 Tachi Ak'õrepa tachi k'ɨ̃riasima. Ichi sõpiadepa sõpiapisima ewaricha mãɨya p'ananamẽrá. Mãɨnepa k'awapisima piarã ichidepa nepia atadait'a. Taipa k'ɨ̃ria p'anɨma Tachi Chipari Jesucristopa mãɨnepa Tachi Pajãnepema Ak'õrepa mãra sõpiapidait'a mãɨnepa chaarea bɨdait'a. Mãɨya mãrapa pedea p'anɨ mãɨnepa oo p'anɨ ãarea pia baipɨ.