2 Tesalonicense 1 - Tachi Ak'õre Pedea

Pablopa nãɨ k'art'ade naa bɨda

¹ Mɨ Pablopɨ. Nãɨ k'art'a bɨruma ũpẽarã Tesalónica p'uurudepemarã pae. Mãra Tachi Ak'õre Pajãnepemanepɨ mãɨnepa Tachi Chipari Jesucristodepɨ. Ũpẽa Silvano mãɨnepa Timoteo mɨ ome p'anɨma.

² Taipa k'ɨ̃ria p'anɨma Tachi Pajãnepema Ak'õrepa mãɨnepa Tachi Chipari Jesucristo pida ãchi sõpiadepa mãra k'aripamẽrá mãɨnepa ne k'ɨ̃risiadawẽa p'anapidamẽrá.

Tachi Ak'õrepa ichi pedea ĩjãanak'apɨɨrã ɨtɨaipɨ

³ Ũpẽarã, taipa ewaricha mãra k'orea Tachi Ak'õrea sõpia p'anɨane apatama. Taipa mãɨya oodai pia bɨma. Mãrapa ewaricha Cristode pia ĩjãa p'anɨma mãɨnepa machicha pia chi k'ɨ̃ria p'anɨma.

⁴ Mãɨ k'orea taipa ẽpẽrarã Tachi Ak'õrenepemarã p'anɨmá mãra k'orea arapá nepɨrɨpatama. Jarapatama ẽpẽrarãpa mĩapidai k'orea ẽp'ẽ p'anɨmina mãrapa wapida Cristode ĩjãa p'anɨ mãɨnepa minachia mĩa p'anɨmina jõma choa p'anɨ.

⁵ Mãɨpa k'awapi bɨma Tachi Ak'õrepa ichi jĩp'a bɨdepa ẽpẽerã ɨtɨaparit'a. Mãɨya ichia mãra pia unu bɨma ichi juade ua bai k'orea. Mãɨ k'orea idiapae ãarea mĩa p'anɨma.

⁶ Tachi Ak'õrepa jĩp'a bɨpa ẽpẽrarã ɨtɨaparima. Ichia chi mãra mĩapi p'anɨrã mĩapiipɨ.

^7-8 Maamina mãra, chi mĩa berã ɨ̃apaapiipɨ tai ɨ̃apaapii bɨ jĩra. Mãɨyaipɨ Tachi Chipari Jesú ichi ɨt'aripa peedaɨrã jua chaarea berã ome t'ɨpɨ tau urua nɨbɨde pajãnepa cherude. Mãɨne jõma Tachi Ak'õrene ĩjãanak'apɨɨrã mãɨnepa chi pedea pia Tachi Chipari Jesú k'orea ĩjãanak'apɨɨrã ɨtɨaipɨ.

⁹ Ãchi t'ɨpɨ tau uruade ewaricha minachia mĩapiipɨ. Tachi Chipari k'ĩraripema mãɨnepa ichi minachia jua chaareadepema t'ɨmɨa p'ananaipɨ.

¹⁰ Ichi cherude, mãɨ ewaride ichidirãpa ichiá pia pedeadaipɨ. Ãchi ome pia ooda k'orea jõma ichide ĩjãapataɨrãpa ichi minachia pia ununaipɨ. Taipa ichi k'orea jarateasidaɨde mãra pida ĩjãasidama.

¹¹ Mãɨ k'orea taipa ewaricha Tachi Ak'õrea ɨt'aa chiidipatama ichia mãra pia unumẽrá. Ichia mãra mãɨ k'orea t'ɨ̃sima. Taipa ɨt'aa chiidi p'anɨma Tachi Ak'õrepa ichi jua chaareadepa mãra ãareane k'aripamẽrá. Mãɨya ichide ĩjãa p'anɨnepa chi nepia oo k'ɨ̃ria p'anɨt'a jõma oodaipɨ.

¹² Mãɨya mãra k'orea jõmãɨrãpa Tachi Chipari Jesucristo k'orea pia jaradaipɨ mãɨnepa ichidepa mãra k'orea pia jaradaipɨ, Tachi Ak'õrepa mãɨnepa Tachi Chipari Jesucristopa ãchi sõpiadepa k'aripa p'anɨ pẽra.