2 Pedro 3 - Tachi Ak'õre Pedea

Tachi Chiparipa ɨtɨade chei k'orea bɨda

¹ Ũpẽarã, nãɨ chi mãɨ ɨ̃aripema k'art'a mɨa mãra pae bɨruma. Nãɨ k'art'a bari k'ak'o ume bɨdade, mɨa k'ɨ̃risiapii bɨma chi naena k'awa p'anana k'orea, jĩp'a k'ɨ̃risiadamẽrá.

² Mɨa k'ɨ̃ria bɨma Tachi Ak'õre pari pedeapataɨrãpa naena jaradaadade mãrapa k'ɨ̃risiadamẽrá. Mãɨnepa k'ɨ̃ria bɨma Jesucristo Tachi Chipari mãɨnepa Tachi K'aripaparipa jarateadade k'ɨ̃risiadamẽrá. Mãɨ ichia peedaɨrãpa mãrá jarateasidama.

³ Nãɨ minachia k'awat'ɨ: k'aadeapema ewaride Tachi Ak'õre oo p'aneenak'ari ee p'anapataɨrã paraɨpɨ. Ãchi k'ak'uapa nemietá oo k'ɨ̃ria bɨ oo p'ananaipɨ.

⁴ Nãɨya oo uru p'ananak'ari jaradaipɨ: «Cristo chei jarada ¿k'ãasãasima? Tachi chõarãenapemarã ãarea piusidama. Maamina nãɨ ĩjũa oodaedapema jõma ara mãɨya bɨma».

⁵ Mãɨ ẽpẽrarãpa ĩjãa k'ɨ̃rianawẽma chõarãena Tachi Ak'õre pedeapa pajã oosit'a, ĩjũa p'usa ek'aripa ochiapisit'a, mãɨnepa panianepa mãɨya oosit'a.

⁶ Ara mãɨ paniapa jõma nãɨ ĩjũane naena p'anana ãarea piupisima to minachia chesidepa.

⁷ Ara mãɨ jĩra Tachi Ak'õre pedeapa nãɨ ĩjũa mãɨnepa pajã ak'ɨ bɨma mãɨnepa ichia ɨtɨai ewaride t'ɨpɨ taude paaipɨ. Mãɨ ewaride chi ichi k'ɨ̃rianak'aɨrã nepɨra ak'ɨk'ari ãarea ɨtɨaipɨ.

⁸ Maamina ũpẽarã, nãɨ k'ɨ̃risia atuarãt'ɨ: Tachi Chiparimá ewari aba bɨt'a mil ãyo p'anɨ jĩra bɨma mãɨnepa mil ãyo p'anɨt'a ewari aba bɨ jĩra bɨma.

⁹ Tachi Chipari cheyade adaedapema tãaraaru pẽra, waapẽarãpa cheiwẽane a k'ɨ̃risia p'anɨma. Maamina mãɨyawẽma. Mãɨpari mãra k'orea ãarea choa bɨ pẽra tãaraaruma. Ichia k'ɨ̃riawẽa bɨma mi aba pida atuait'a. K'ɨ̃ria bɨma ãareaɨrãpa nemietá itu bɨdak'ari ichimá chedait'a.

¹⁰ Tachi Chiparipa ɨtɨai ewari paipɨ nechɨaparí chepari jĩra. Mãɨ ewaride ɨbɨa chi jĩk'ua baek'ari pajã wẽpapiipɨ. Nejõma tachia pajãne unupataɨ paawãipɨ. Mãɨnepa nãɨ ĩjũa mãɨnepa nejõma nãɨ ĩjũane be paawãipɨ.

¹¹ Nejõma jõi pẽra Tachi Ak'õrepa k'ɨ̃ria bɨ jĩra, mãra jĩp'a mãɨnepa nemietá newẽa nipadai p'anɨma.

¹² Tachi Ak'õrepa ɨtɨai ewari piarã nɨ p'anɨmisa Tachi Ak'õrepa k'ɨ̃ria bɨ oo p'anat'ɨ mãɨ ewari isapea pamẽrá. Mãɨ ewaride Tachi Ak'õrepa pajã paaipɨ. Mãɨne nejõma tachia pajãne unupataɨ mãɨnepa nãɨ ĩjũane unupataɨ t'ɨpɨ taupa torbariipɨ.

¹³ Maamina Tachi Ak'õrepa pajã chiwidi mãɨnepa ĩjũa chiwidi ooyade a basima. Mãɨ tachia nɨ p'anɨma. Mãma jõmãɨrãpa jĩp'a oo p'ananaipɨ.

¹⁴ Ũpẽarã, mãrapa jõma mãɨ nɨ p'anɨ pẽra ne ãareaɨne k'ĩra jĩp'a nipat'ɨ Tachi Ak'õrepa mãra pia, ne k'achiawẽa, ichi ome ne k'ɨ̃risiawẽa p'anɨ unumẽrá.

¹⁵ K'ɨ̃risiat'ɨ Tachi Chiparipa ẽpẽrarã k'aripai k'orea jõma choa bɨt'a. Ara mãɨya tachia k'ɨ̃ria p'anɨ ũpẽa Pablo pida k'art'ade mãrá bɨsima, Tachi Ak'õrepa ichiá teada k'ɨ̃risiadepa.

¹⁶ Ichia k'art'acha mãɨ k'orea bɨsima. Mãɨnepema k'ɨ̃risia ichia bɨda t'aju bɨma k'awadai k'orea. Chi piarã pedea k'awadak'aɨrãpa mãɨnepa chi minachia ĩjãanak'apɨɨrãpa ichia bɨda piawẽa jarateapatama, jõma Tachi Ak'õre pedea bɨdada piawẽa jarateapataɨ jĩra. Mãɨ k'orea Tachi Ak'õrepa ãchi ɨtɨaipɨ.

¹⁷ Ũpẽarã, mãrapa mãɨ k'awa p'anɨ pẽra jĩrak'aua p'anat'ɨ ẽpẽra k'achiarãpa piawẽa jaratea p'anɨnepa seapidaemaapa. Mãɨya mãrapa minachia ĩjãa p'anɨt'a itu bɨdaiwẽma.

¹⁸ Jesucristo Tachi Chipari mãɨnepa Tachi K'aripaparí ewaricha pia k'awapariet'ɨ. Ichi sõpiadepa warit'ɨ. Idi mãɨnepa ewaricha ichiá pia pedeadai p'anɨma. Mãɨya beese.