2 Pedro 2 - Tachi Ak'õre Pedea

Sea jarateapataɨrã

¹ Israel ĩjũanepemarã t'ãena Tachi Ak'õre pari pedeapataɨrã sea jarateapataɨrã pasima. Mãra t'ãena pida sea jarateapataɨrã pará p'ananaipɨ. Seadepa ãchia tachi o ãyá wãpiparii k'ɨ̃risiat'a, Tachi Ak'õre pedea jĩra jarateadaipɨ. Tachi Chipari Jesupa ãchi k'aripa bada waa k'aripawẽa beesiade adaipɨ. Mãɨ k'orea Tachi Ak'õrepa isapea ɨtɨaipɨ.

² Ãchia waapẽarã taade minachia k'ĩra p'era oopataɨt'a, chok'araɨrãpa ara mãɨya oodaipɨ. Ãchi k'orea ẽpẽrarãpa chi piarã pedea k'orea piawẽa pedeadaipɨ.

³ Erreara k'ɨ̃ria p'anɨ pẽra, mãra erreara atadai k'orea ara ãchi k'ɨ̃risiadepa sea jarateadaipɨ. Minachia tãaraaenapema Tachi Ak'õrepa ãchi nepɨra ak'ɨi k'orea bɨma, mãɨnepa tãaraawẽa bɨde ãchi piarã ɨtɨaipɨ.

⁴ Chi Tachi Ak'õrepa ɨt'aripa peedaɨrãpa nemietá oosidaɨde Ichia k'ĩra chupuriaé pasima. Mãɨpari mietade uria p'ãrio bɨde jirak'oasima. Mãma k'ãnenapa jɨ̃ p'anɨma aba Tachi Ak'õrepa ãchi nepɨra ak'ɨi ewaridea.

⁵ Mãɨnepa chõarãenapemarãpa Tachi Ak'õre itu bɨsidaɨde ichia k'ĩra chupuriaé pasima. Mãɨpari to minachia chepisima mãɨ ẽpẽrarã ãarea todepa piudamẽrá. Maamina Noepa tachi jĩp'a nipadai k'orea jarateapachima. Ichi, ichi ẽpẽrarã siete p'anɨ sida Tachi Ak'õrepa k'aripasima.

⁶ Mãɨnepa Tachi Ak'õrepa Sodoma p'uuru mãɨnepa Gomorra p'uuru ɨtɨaside jõma paa peesima. Mãɨ ãarea et'abarra jora papisima. Mãɨneepuru ichia k'awapisima chi ichi k'ɨ̃rianak'aɨrã́ ãchi sãanait'a.

⁷ Maamina ẽpẽra jĩp'a bɨt'a Lot apataɨt'a Tachi Ak'õrepa Sodoma paa peeidepema k'aripasima. Lot sõp'ua bapachima mãɨ p'uurudepemarãpa nejõma nemietá oo p'anɨ k'orea.

⁸ Mãɨ ẽpẽra jĩp'a bɨ ãchi t'ãena bapachima. Jĩp'a bɨ pẽra ãchia nemietá oo p'anɨ unuru k'orea mãɨnepa ũriru k'orea ewaricha sõp'ua bapachima.

⁹ Mãɨpa unupi bɨma Tachi Chiparipa chi jĩp'a oo berã minachia mĩa p'anɨnepema k'aripayá bɨt'a. Mãɨnepa k'awa bɨma chi jĩp'a oowẽa berã sãmaasã́ uru bait'a aba ichia ɨtɨai ewaridea.

¹⁰ Chi nãɨ k'ak'uapa nemietá oo k'ɨ̃ria bɨ oopataɨrã mãɨnepa chi Tachi Ak'õre ãchi Chipari papidayá k'ɨ̃rianak'aɨrã atepe ɨtɨaipɨ. Sea jarateapataɨrã nemietá oodai k'orea p'eradak'ama. Minachia k'awa be jĩra p'anapatama. Jaore chi minachia berã k'orea, k'achia pedeadai k'orea wap'eadak'ama.

¹¹ Mãɨpari, tachi Ak'õrepa ɨt'aripa peedarã mãɨ sea jarateapataɨrã k'aepẽra atepe jua chaarea bemina, Tachi Chipari k'ĩrari jaore mietaarã chi atepe berã k'orea k'achia pedeadak'ama.

¹² Maamina sea jarateapataɨrãpa ãchia ne atua p'anɨnepema piawẽa pedeapatama. Ãnimara jĩra k'ɨ̃risiawẽa p'anɨma. Aba ãchi k'ak'uapa k'ɨ̃ria bɨt'a oopatama. Ãnimara t'õpatama ẽpẽrarãpa jitadak'ari peadamẽrá. Ara mãɨ jĩra sea jarateapataɨrã piudaipɨ.

¹³ Tachi Ak'õrepa ãchi minachia ɨtɨaipɨ ara ãchia oodada pari. Ãchi nek'oi awaa p'anapatama mãɨnepa it'ua awaa p'anapatama. Mãɨt'a ãchimá arapaapataɨpɨ. Teamasi, ãst'á pida mãɨya oopatama. Ũpẽarã ome ará nek'o p'anɨne mãɨya oopatama. Mãɨya mãra t'ãena p'aru jayoa mietá jĩra p'anɨma.

¹⁴ K'ima awaraɨ ome k'ãii k'orea p'anapatama. Nejõma nemietá oo p'anɨpa k'ĩra sẽnak'ama. Chi minachia ĩjãawẽa berã seapatama. Nejõma k'ɨ̃riapatama. Mãɨ k'orea Tachi Ak'õrepa ãchi ɨtɨaipɨ.

¹⁵ Tachi Ak'õre o jĩp'a bɨ itu bɨdak'ari o ãyá wãsidama. Beor warra Balaampa ooda jĩra oopatama. Balaam erreara awaa bada pẽra erreara k'orea nemietá ooi k'ɨ̃risiasima.

¹⁶ Maamina nemietá oode wãrune mũrapa ichi ɨtɨasima. Mãɨ ãnimara pedeak'apɨ́ ẽpẽra jĩra pedeasima. Tachi Ak'õre pari pedeaparí Balaam poro piawẽa bɨdepa piawẽa oode wãi k'ɨ̃risia bɨmina, chi mũrapa wãpié pasima.

¹⁷ Sea jarateapataɨrã p'ẽya uriadepa pania wea bada p'oa bɨ jĩra p'anɨma. Ãchi jɨ̃ara nãupa ãyá ateeru jĩra p'anɨma. Nãupa jɨ̃ara ãyá ateewãrune k'oe chek'ama. Ara mãɨ jĩra ãchia jaratea p'anɨt'a k'aripak'ama. Tachi Ak'õrepa uria minachia p'ãrio bɨde bɨsima ãchi ɨtɨai k'orea.

¹⁸ Ãchia pedea auk'ará jarateapatamina, mãɨpa tachi k'aripak'ama. Ãchia jarateapatama nãɨ k'ak'uapa nemietá oo k'ɨ̃ria bɨ oodai p'anɨ. Mãɨya chi tãaraawẽa nemietaadepema wãnana berã ãchia seapatama mãicha nemietá oodamẽrá.

¹⁹ Ãchi k'aade wãnaipɨra, pia p'aneenayane apatama, chi chipari pae pari mimiaparí ichi chipari juadepema mĩruwãru jĩra. Maamina nemietá p'ue itu bɨdak'a pẽra pia p'aneenaiwẽma. Mãɨpa ãchi nemietá pae pari mimiapataɨrã papiipɨ. Piarã paritua nemietá p'ue itu bɨdaepɨra, tachi makɨɨ pae pari mimiapataɨrãpɨ.

²⁰ Jesucristo Tachi Chipari mãɨnepa Tachi K'aripaparí k'awa p'anɨ pẽra nãɨ ĩjũane bɨ nemietaadepema k'aripasidama. Maamina jɨ̃k'arade memenea p'aneeuta jĩra waa mãicha nemietá oodaipɨra, naena p'anana k'aepẽra atepe piawẽa p'aneenaipɨ.

²¹ Mãɨpuru Tachi Ak'õre pedea k'awadada itu bɨdai k'aepẽra, pia bɨma Tachi Ak'õrepa oo jĩp'a bɨt'a k'awadaadawẽpara.

²² Ẽpẽrarãpa nãɨya jarapataɨ jĩra p'anɨma: «Usa jat'umaak'ari, mãicha cheparima chi jat'umaana k'oi k'orea». Mãɨnepa nãɨya jarapatama: «Sina k'uik'ari mãicha yooroba susuade pɨrabari beeparima».