2 Pedro 1 - Tachi Ak'õre Pedea

Pedropa nãɨ k'art'ade naa bɨda

¹ Mɨ Simón Pedropɨ, Jesucristo pae pari mimiaparipɨ mãɨnepa ichia peedapɨ. Mɨa nãɨ k'art'a bɨruma chi Tachi Ak'õrene mãɨnepa Tachi K'aripaparí Jesucristode ĩjãapataɨrã pae. Ichi jĩp'a bɨ pẽra, mãra tai ome abarik'a pia ĩjãa p'anɨma.

² Mãrapa Tachi Ak'õre mãɨnepa Tachi Chipari Jesú k'awa p'anɨ pẽra, mɨa k'ɨ̃ria bɨma ãchi sõpiadepa mãra minachia k'aripa p'ananait'a mãɨnepa minachia ne k'ɨ̃risiawẽa p'anapiit'a.

Tachi Ak'õrepa t'ɨ̃naɨrã sãmaasã́ p'ananai p'anɨ

^3-4 Tachi Ak'õre k'awa p'anɨ pẽra, ichi jua chaareadepa tachiá nejõma teasima ichia k'ɨ̃ria bɨ jĩra nipadamẽrá mãɨnepa ewaricha ichi ome chok'ae p'ananamẽrá. Ichi chi atepe bɨ pẽra mãɨnepa jĩp'a bɨ pẽra tachi t'ɨ̃k'ari ne waibɨa mãɨnepa minachia pia bɨt'a, tachi pae ooyade asima. Mãɨya oo bɨ pẽra nãɨ ĩjũanepemarãpa nemietá oo k'ɨ̃ria p'anɨt'a mãrapa itu bɨdak'ari p'ue ichi jĩra jĩp'a p'ananaipɨ.

⁵ Mãɨpuru Cristode ĩjãa p'anɨ pẽra jĩp'a nipadai k'orea minachia jɨrɨt'ɨ; jĩp'a nipa p'anɨne k'ɨ̃risia k'awaa p'ananai k'orea jɨrɨt'ɨ;

⁶ k'ɨ̃risia k'awaa p'anɨne mãra k'ak'ua jĩp'a uru p'ananai k'orea jɨrɨt'ɨ; mãra k'ak'ua jĩp'a uru p'anɨne jõma choadai k'orea jɨrɨt'ɨ; jõma choa p'anɨne Tachi Ak'õrepa k'ɨ̃ria bɨ jĩra p'ananai k'orea jɨrɨt'ɨ;

⁷ Tachi Ak'õrepa k'ɨ̃ria bɨ jĩra p'anɨne ũpẽarã k'ɨ̃rianai k'orea jɨrɨt'ɨ; ũpẽarã k'ɨ̃ria p'anɨne jõmãɨrã k'ɨ̃rianai k'orea jɨrɨt'ɨ.

⁸ Mãrapa mãɨ jõma pia oodaipɨra, mãɨpa tachiá Tachi Chipari Jesucristo waa pia k'awapipododaipɨ mãɨnepa tachi nepia oodai k'orea chok'ea p'anapidaipɨ.

⁹ Maamina chi mãɨya oowẽa bɨt'a tau t'aua bɨ jĩra bɨma wa tau p'ãrio bɨ jĩra bɨma. Ichia k'ɨ̃risia atuasima chi naena nemietá oo bada Tachi Ak'õrepa jõma sɨɨsit'a.

¹⁰ Ũpẽarã, Tachi Ak'õrepa mãra t'ɨ̃k'ari jɨrɨ atasima. Piarã mãɨya be unupidai k'orea chok'ea p'anat'ɨ. Mãɨya oodaipɨra baedaiwẽma.

¹¹ Mãɨne Tachi Chipari Jesucristopa mãra itu wãpiipɨ ichi p'uurudea, te eda wãpataɨ ewa bɨ jĩra. Tachi K'aripaparipa tachi ewaricha pia uru baipɨ.

¹² Jõma makɨɨ k'awa p'anɨmina mãɨnepa chi piarã pedea minachia ĩjãa p'anɨmina, mɨa jõma makɨɨ mãrá k'ɨ̃risiapi baipɨ.

¹³ Mɨmá pia bɨma wapida chok'ae bɨmisa mãɨ mãrá k'ɨ̃risiapi bait'a.

¹⁴ Tachi Chipari Jesucristopa mɨá pia k'awapisima tãaraawẽa bɨde mɨ piuit'a.

¹⁵ Mãɨpuru mɨa jõma ooipɨ mɨ piuk'ari mãrapa jõma makɨɨ ewaricha k'ɨ̃risiadamẽrá.

Jesú k'orea jaradada piarãpɨ

¹⁶ Tachi Chipari Jesucristo jua chaarea k'orea mãɨnepa ichi mãicha chei k'orea taipa mãrá jarateasidaɨde ara tachi k'ɨ̃risiadepa jaradada jarateadaé pasima. Mãɨpari Tachi Chipari Jesú k'ĩrawãrea achiterrea ununana pẽra mãɨya jarateasidama.

¹⁷ Tachi Pajãnepema Ak'õrepa ichi k'orea pia jaraside mãɨnepa chi atepe unupiside tai mãma p'anasidama. Mãɨne Tachi Ak'õre chi atepe minachia k'ĩrawãrea bɨpa nãɨya jarasima: «Nãɨt'a mɨ Warrapɨ. Mɨa ichi minachia k'ɨ̃ria bɨma. Mɨ ichi k'orea arapá bɨma».

¹⁸ Taipa mãɨ pedea piarã pajãne ũrisidama Jesú ome, Tachi Ak'õre eyade p'anasidaɨde.

¹⁹ Mãɨ awara k'awa p'anɨma Tachi Ak'õre pari pedeapataɨrãpa jaradada piarãt'a. Mãɨ pedea ĩpira p'ãrione urua bɨ jĩra bɨ pẽra mãrapa minachia jĩrak'aua ũrinai p'anɨma. Ĩpira uruaparima aba ewari wãrunea, aba chi tap'edepema k'ãk'ãi ochiarudea. Ara mãɨ jĩra tachi nãɨ ĩjũa nemietaade p'anɨmisa mãɨ pedeapa tachi sõne k'awapi bɨma sãmaasã́ nipadai p'anɨt'a aba Cristo cherudea.

²⁰ Nãɨ minachia k'awat'ɨ: Tachi Ak'õre pari pedeapataɨrãpa Ichi Pedeade bɨdada ara ãchi k'ɨ̃risiadepa mi ãpia pida bɨdaé pasima.

²¹ Ãchia k'ɨ̃riauta jaradak'a pasima, mãɨpari Tachi Ak'õre pae p'anasida pẽra, ara Ichi Jaoredepa pedeasidama.