2 Juan 1 - Tachi Ak'õre Pedea

Nãɨ k'art'ade Juanpa naa bɨda

¹ Mɨ Chõapɨ. Mɨa nãɨ k'art'a bɨruma wẽra Tachi Ak'õrepa jɨrɨ atada pae mãɨnepa ichi warrarã pae pida. Mɨa mãra piarã k'ɨ̃ria bɨma. Mɨapuru mãra k'ɨ̃ria bɨwẽma, mãɨpari jõma chi piarãpẽa pedea k'awapataɨrãpa mãra k'ɨ̃ria p'anɨma.

² Mãɨya k'ɨ̃ria p'anɨma, chi piarã pedea tachi sõne bɨ pẽra. Mãɨnepa tachi sõne ewaricha baipɨ.

³ Mãɨ piarã pedea ĩjãa p'anɨ pẽra mãɨnepa chi k'ɨ̃ria p'anɨ pẽra, mɨa k'ɨ̃ria bɨma Tachi Pajãnepema Ak'õrepa mãɨnepa Tachi Ak'õre Warra Jesucristo ome ãchi sõpiadepa mãra k'aripa p'ananait'a, k'ĩra chupuria p'ananait'a mãɨnepa ne k'ɨ̃risiawẽa p'anapidait'a.

Chi k'ɨ̃ria p'ananai p'anɨ

⁴ Mɨa pɨ warrarã eda waapẽarã unusima. Mɨ sõ arapá beesima ãchi piarãnepa nipadada pẽra, Tachi Pajãnepema Ak'õrepa jara bɨ jĩra.

⁵ Ũpẽawẽra, mɨa chichupuria idiruma tachi chi k'ɨ̃rianamẽrá. Mãɨ Tachi Ak'õrepa oopi bɨ pedea chiwidiwẽma, mãɨpari mãɨ tachia naenaena ũri p'anasima.

⁶ Tachia nãɨya k'ɨ̃ria p'ananai p'anɨma: Tachi Ak'õrepa oopi bɨ pedea oo p'ananait'a. Mãɨ jara bɨeda mãrapa naenaena ũrisidama. Mãɨpa jara bɨma ara machi paara k'ɨ̃rianepa nipadai p'anɨt'a.

Chi seapataɨrã

⁷ Chi seapataɨrã nãɨ ĩjũane minachia p'anɨma. Ãchia ĩjãanak'ama Jesucristo nãɨ k'ak'uade tachi jĩra chesit'a. Chi mãɨya bɨpa waapẽarã seaparima mãɨnepa Cristo nek'ĩramaapɨ.

⁸ Jĩrak'aua p'anat'ɨ mãɨrãpa mãra seadaemaapa. Mãɨya mãrapa chi Tachi Ak'õre pae oopataɨ ichia teada atuadaiwẽma, mãɨpari jõma oodaipɨ.

⁹ Abaɨpa Cristopa jarateada k'aepẽra ichi k'ɨ̃risiadepa ne awara jaratea nipaipɨra, wa mãɨyawẽa Cristopa jarateada itu bɨipɨra, mãɨ Tachi Ak'õre newẽa bɨma. Maamina abaɨpa Cristopa jarateada ĩjãa baipɨra, chi Ak'õre mãɨnepa chi Warra sida uru bɨma.

¹⁰ Chi ẽpẽra mãramá wãrune Cristopa jarateada jĩra jarateawẽpɨra, mãɨ mãra tede eda chepirãt'ɨ mãɨnepa «sõpia p'anɨane pɨ cheda k'orea» arãt'ɨ.

¹¹ Chi «sõpia p'anɨane pɨ cheda k'orea» a bɨpa mãɨ nemietá ichi ome ará oo bɨma.

Juanpa nãɨ k'art'ade k'aadea bɨda

¹² Mɨa ne minachia mãrá jara k'ɨ̃ria bɨma. Maamina nãɨ k'art'ade mãɨ ãarea bɨ k'ɨ̃riawẽma. Mɨa mãra ak'ɨde wã k'ɨ̃ria bɨma. Mãɨne mãra ome ará pedeadaipɨ minachia arapá p'ananai k'orea.

¹³ Pɨ ũpẽawẽra warrarã Tachi Ak'õrepa k'aripadapa k'ɨ̃ria p'anɨma mãra pia tuananait'a.