2 Corintio 8 - Tachi Ak'õre Pedea

Ũpẽarãpa sõpiadepa erreara teadada

¹ Mãɨ awara ũpẽarã, taipa k'awapii k'ɨ̃ria p'anɨma Tachi Ak'õrepa ichi sõpiadepa ũpẽarã Macedonia tuadepema k'aripa bɨt'a.

² Ãchi minachia mĩa p'anɨmina arapá p'anɨma. Nenea p'anɨmina arapaapa erreara minachia teasidama.

³ Mɨa jararuma: ãchia erreara jitapata jĩra sõpiadepa teasidama. Mãɨnepa ãchia p'ue teadai p'anana wãyá teasidama.

⁴ Taiyá minachia chichupuria idisidama ãchia pida ũpẽarã Jerusalenepemarã k'aripadai k'orea.

⁵ Mãɨne ãchia abapuru taipa k'ɨ̃risia p'anana jĩra oodaé pasima. Mãɨpari naa ara ãchit'u teasidama Tachi Chiparipa k'ɨ̃ria bɨ jĩra oodai k'orea. Mãɨ ɨ̃ari taipa jaradada oosidama. Mãɨya Tachi Ak'õrepa k'ɨ̃ria bɨ jĩra arí oosidama.

⁶ Mãɨ k'orea taipa Titoa chichupuria idisidama mãrá jarade wãmẽrá jõma mãrapa sõpiadepa teadayade adada piarã jɨrɨp'edamẽrá.

⁷ Mãrapa ne ãareaɨne minachia pia oo p'anɨma: Jesude minachia ĩjãa p'anɨma, minachia pedea k'awa p'anɨma, Tachi Ak'õrenepa minachia ne k'awa p'anɨma, Tachi Ak'õrepa k'ɨ̃ria bɨ jĩra minachia oo k'ɨ̃ria p'anɨma mãɨnepa tai minachia k'ɨ̃ria p'anɨma. Mãɨpuru mãrapa machi sõpiadepa erreara jɨrɨp'e p'anɨ minachia teat'ɨ.

⁸ Mɨa mãɨ oopadade awẽa bɨma, mãɨpari mɨa k'ɨ̃ria bɨma mãrapa unupidait'a ũpẽarã piarã k'ɨ̃ria p'anɨt'a. Mãɨ k'orea mɨa mãrá k'awapi bɨma sãmaasã́ waapẽarãpa erreara ũpẽarã Jerusalenepema pae jɨrɨp'e p'anɨt'a.

⁹ Mãrapa minachia k'awa p'anɨma Tachi Chipari Jesucristopa ichi sõpiadepa oodat'a. Ichi pajãne nejõma uru bɨmina, mãra pae nãɨ k'ak'uade nenea bɨ jĩra basima mãrapa nejõma Tachi Ak'õrepa tea bɨdepema uru p'ananamẽrá.

¹⁰ Mɨmá mãrapa nãɨya oodaipɨra pia p'ananaipɨ: mãɨ warí ãyo paside, mãrapuru waapẽarã k'aepẽra naa erreara jɨrɨp'e p'aneesidama mãɨnepa mãɨya oo k'ɨ̃riasidama.

¹¹ Mãrapa naa erreara jɨrɨp'e p'anasidaɨde sõpiadepa mãɨya oo p'anasidama. Ara mãɨ jĩra mãrapa sõpiadepa teadayade adada jõma mãɨya teat'ɨ. Mãracha p'ue teadai p'anɨt'u teat'ɨ.

¹² Piarã abaɨpa p'ue tearu jĩra sõpiadepa teaipɨra, mãɨ teada Tachi Ak'õrepa pia unuipɨ. Abaɨpa ne teai newẽa bɨpɨra, Tachi Ak'õrepa teapade ak'ama.

¹³ Mɨa mãɨya jarawẽa bɨma waapẽarã k'aripa p'anɨnepa mãra minachia mĩanamẽrá. Mãɨpari mɨa k'ɨ̃ria bɨma abarik'a chi k'aripadamẽrá.

¹⁴ Mɨa jara bɨma idiapae mãrapa minachia uru p'anɨ pẽra ũpẽarã k'aripadai p'anɨ. Ara mãɨ jĩra mãra newẽa p'anɨne ãchia minachia uru p'anɨnepemanepa mãra k'aripadai p'anɨma. Mãɨya jõmãɨrã abarik'a chi k'aripa p'ananaipɨ.

¹⁵ Tachi Ak'õre pedeade nãɨya jara bɨma: «Chi waibɨa jɨrɨp'edapa minachia uru baé pasima mãɨnepa chi ãpia jɨrɨp'edapa newẽaé pasima».

Pablopa Tito Corinto p'uurudea peeda

¹⁶ Mɨa Tachi Ak'õrea sõpia bɨade aparima. Ichia ũpẽa Tito sõne bɨsima mãra k'ɨ̃ria bamẽrá mɨa mãra k'ɨ̃ria bɨ jĩra.

¹⁷ Taipa ichiá jarasidama mãra ak'ɨde wãmẽrá. Ara mãɨya ichi wã k'ɨ̃ria bada pẽra, wãsima.

¹⁸ Ichi ome taipa ũpẽa aba peeutama. Mãɨ ũpẽapa chi pedea pia Cristo k'orea k'aripa jaratea nipapari pẽra ũpẽarã p'uuru bechadepemarãpa ichi k'orea pia pedeapatama.

¹⁹ Mãɨ awara ũpẽarã p'uuru bechadepemarãpa ichi jɨrɨ atasidama tai ome erreara ũpẽarã pae jɨrɨp'edada Jerusalenea teade wãmẽrá. Mãɨ taipa oo p'anɨma ũpẽarãpa Tachi Chiparia pia pedeadamẽrá mãɨnepa taipa piarã k'aripa k'ɨ̃ria p'anɨt'a ak'ɨpidai k'orea.

²⁰ Taipa jĩrak'aua oo p'anɨma mãɨ erreara waibɨa jɨrɨp'edada ateeutade mi ãpia pida k'achia pedeapidaemaapa.

²¹ Piarã taipa Tachi Chipari k'ĩrari mãɨnepa ẽpẽrarã k'ĩrari jĩp'a oo k'ɨ̃ria p'anɨma.

²² Mãɨ ũpẽarã ume p'anɨ mãramá wãutade abaɨ ũpẽa ãchi ome peedaipɨ. Mãɨ ũpẽapa ewaricha taiyá unupisima ũpẽarã minachia k'aripa k'ɨ̃ria bɨt'a. Idiapae mãra minachia k'aripa k'ɨ̃ria bɨma mãrapa jĩp'a oodai k'awa bɨ pẽra.

²³ Abaɨpa Tito k'orea ne idisidara jarat'ɨ ichi mɨ ome p'ɨrrɨaparit'a mãɨnepa mɨ ome mãra t'ãena Tachi Ak'õrepa oo bɨt'a ooparit'a. Abaɨpa waapẽarã ume p'anɨ k'orea ne idisidara jarat'ɨ chi ũpẽarãpa peedaadat'a mãɨnepa ãchi k'orea ẽpẽrarãpa Cristo k'orea pia pedeapatat'a.

²⁴ Mãɨ ũpẽarã́ unupit'ɨ mãrapa ãchi piarã k'ɨ̃ria p'anɨt'a. Mãɨya ãchia k'awadaipɨ taipa mãra k'orea pia jaradada piarã pasit'a. Waapẽarã ũpẽarã pida ara mãɨ jĩra k'awadaipɨ.