2 Corintio 5 - Tachi Ak'õre Pedea

¹ Nãɨ ĩjũane tachi k'ak'ua tãaraa choak'a pẽra, te mẽa p'ãemari k'obɨ jĩra bɨma. Tachia k'awa p'anɨma nãɨ k'ak'ua piuk'ari Tachi Ak'õrepa tachiá tachi pajãnepema piuk'apɨ́ k'ak'ua teait'a. Mãɨ k'ak'ua ẽpẽrarãpa juapa p'ue oodaiwẽma.

² Mãɨ k'orea nãɨ k'ak'uade p'anɨne tachia chi pajãnepema k'ak'ua minachia jita k'ɨ̃ria p'anɨma.

³ Tachia mãɨ pajãnepema k'ak'ua uru p'ananai pẽra k'ak'ua nea p'ananaiwẽma.

⁴ Piarã tachi nãɨ k'ak'uade p'anɨne minachia mĩapatama mãɨnepa sõp'ua bɨdepa pedeapatama. Maamina mɨa jarawẽa bɨma tachi piu k'ɨ̃ria p'anɨ, nãɨ k'ak'ua uru p'aneenaemaapa. Mãɨpari pajãnepema k'ak'ua jita k'ɨ̃ria p'anɨma. Mãɨya tachi k'ak'ua piui bɨt'a jõk'ari tachi k'ak'ua piuk'apɨɨt'u beeipɨ.

⁵ Piarã Tachi Ak'õrepa tachi mãɨ k'orea oosima. Ichi Jaore tachiá teasima k'awadamẽrá jõma ichia teai jarada piarã atadait'a.

⁶ Mãɨpuru ewaricha tachi ne k'ɨ̃risiadawẽa mãɨnepa wap'eawẽa p'anɨma. K'awa p'anɨma nãɨ k'ak'uade p'anɨne Tachi Chipari bɨmá p'anɨwẽma.

⁷ Tachi taupa unu p'anɨnepa nipadak'ama, mãɨpari Tachi Ak'õrene ĩjãa p'anɨnepa nipapatama.

⁸ Mãɨya tachi ne k'ɨ̃risiadawẽa mãɨnepa wap'eawẽa p'anɨma. Tachi nãɨ k'ak'uadepema minachia wã k'ɨ̃ria p'anɨma Tachi Chipari ome ará p'ananai k'orea.

⁹ Mãɨ k'orea nãɨ k'ak'uade p'anɨne wa piusidara, tachia jõma oo k'ɨ̃ria p'anɨma Tachi Ak'õrepa pia unumẽrá.

¹⁰ Piarã Cristopa jõma tachia oodada ak'ɨipɨ. Ichia tachicha teaipɨ tachia nãɨ k'ak'uade oo bada jĩra. Pia oo badapɨra, ara mãɨ jĩra teaipɨ. Piawẽa oo badapɨra, ara mãɨ jĩra teaipɨ.

Tachi Ak'õrepa nãɨ ĩjũanepemarã ichi ome pia bɨda

¹¹ Tachi Chipari wap'ea p'anɨ pẽra taipa ẽpẽrarã́ jara p'anɨma ichide ĩjãanamẽrá. Tachi Ak'õrepa k'awa bɨma taipa k'ɨ̃risia piadepa jaratea nipadada. Mɨa k'ɨ̃risia bɨma mãra pida mãɨ k'awa p'anɨt'a.

¹² Mãicha ara tai k'orea mãrá pia pedea p'anɨwẽma, mãɨpari k'ɨ̃ria p'anɨma mãrapa tai k'orea p'ue pia k'ɨ̃risiadait'a. Mãɨya chi eda waapẽarãpa tai k'orea k'achia pedeautade mãrapa tai k'orea p'ue pia jaradaipɨ. Jãɨrãpa ãchi taupa pia unu bɨt'a pia bɨade a k'ɨ̃risiapatama. Maamina sõnepema k'ɨ̃risiadak'ama.

¹³ Waapẽarãpa jara p'anɨma tai k'ĩra piawẽa p'anɨt'a. Tai mãɨya p'anɨpɨra, Tachi Ak'õrepa jara bɨ oodai k'orea mãɨya p'anɨma. Tai k'ĩrip'a p'anɨpɨra, mãra k'aripadai k'oreapuru mãɨya p'anɨma.

¹⁴ Cristopa tai k'ɨ̃ria bɨ pẽra ichia k'ɨ̃ria bɨt'a oo p'anɨma. Mãɨ k'ɨ̃risiadak'ari, piarã k'awa p'anɨma Ẽpẽra Aba piusit'a jõmãɨrã k'orea. Mãɨpuru Tachi Ak'õre k'ĩrari jõmãɨrã piusidama.

¹⁵ Piarã Cristo jõmãɨrã k'orea piuk'ari chok'ae p'irabarisima tachi chok'ae berãpa ara tachia oo k'ɨ̃ria p'anɨ jĩra waa oopidaemaapa, mãɨpari ichia k'ɨ̃ria bɨ jĩra oo p'ananamẽrá.

¹⁶ Mãɨ k'orea nãɨ ĩjũanepemarãpa waapẽarã ak'ɨpata jĩra naapae taipa mãɨya ak'ɨdak'ama. Naena taipa Cristo k'orea mãɨya k'ɨ̃risia p'anɨmina naapae mãɨya oodak'ama.

¹⁷ Piarã abaɨ Cristo ome bɨpɨra, ichi naena bada jĩra bɨwẽma mãɨpari ichi ẽpẽra chiwidi jĩra bɨma.

¹⁸ Jõma mãɨ Tachi Ak'õrepa oosima. Cristodepa tachi ichi ome pia bɨsima mãɨnepa tai bɨsima mãɨ k'orea ẽpẽrarã́ jarateadamẽrá.

¹⁹ Piarã Cristodepa Tachi Ak'õrepa nãɨ ĩjũanepemarã ichi ome pia bɨsima. Tachia nemietá oodada jõma k'ɨ̃risia atuasima. Mãɨnepa mãɨ pedea ichi ome pia bai k'orea taiyá teasima jarateadamẽrá.

²⁰ Mãɨpuru Cristopa tai peesima ichi pari pedeadamẽrá. Taidepa Tachi Ak'õrepa mãrá t'ɨ̃ bɨma ichi ome pia p'ananamẽrá. Taipa Cristo t'ɨ̃nepa chichupuria idiutama: Tachi Ak'õre ome pia p'anat'ɨ.

²¹ Cristopa nemietá ook'a pasima. Maamina tachi k'orea Tachi Ak'õrepa ichi nemietá ooparí jĩra unusima. Mãɨya Cristodepa Tachi Ak'õre jĩp'a bɨt'a waapẽarã́ p'ue unupipatama.