2 Corintio 4 - Tachi Ak'õre Pedea

¹ Tachi Ak'õrepa tachi mãɨya k'ĩra chupuria bɨdepa ichi pedea itu jarateapi bɨ pẽra, taipa k'ĩra sẽ p'anɨ jĩra k'ɨ̃risiadak'ama.

² Nejõma k'achia ẽpẽrarãpa mẽra oopataɨ mãɨnepa p'era oopataɨ taipa itu bɨsidama. Waapẽarã seadak'ama. Tachi Ak'õre pedea k'ĩra ãyá jarateadak'ama, mãɨpari chi piarã pedea pia jarateapatama. Mãɨya Tachi Ak'õre k'ĩrari taipa jõmãɨrã́ k'awapipatama jĩp'a oo p'anɨ.

³ Maamina chi pedea pia Cristo k'orea taipa jaratea p'anɨ waidi pia ũriwẽpɨra, aba chi atuai p'anɨrãmaapuru mãɨya bɨma.

⁴ Tachi Ak'õrene ĩjãanak'apɨɨrãmá chi mãɨ pia ũrinak'ama. Nãɨ ĩjũane tiore ãchi chiparipɨ. Ãchirã́ chi piarã pedea pia Cristo k'orea itu k'awapiwẽa bɨma tau p'ãrio oo bɨ jĩra. Mãɨya ãchia Cristo pia bɨ k'orea p'ue k'awadaiwẽma. Cristo Tachi Ak'õre pẽra mãɨya pia bɨma.

⁵ Ara tai k'orea jaratea p'anɨwẽma, mãɨpari jaratea p'anɨma Jesucristo jõmãɨrã Chiparit'a. Mãɨnepa taipa jara p'anɨma Jesú k'orea tai mãra pae pari mimiapataɨrãpɨ.

⁶ Nãɨ ĩjũa jõma p'ãrio nɨbada Tachi Ak'õrepa ɨnaapisima. Ara mãɨ jĩra ichi ɨnaa bɨt'a tachi sõne ɨnaapisima. Mãɨpa jara bɨma ichi k'ĩrawãrea Cristodepa tachiá k'awapisit'a.

Cristode ĩjãa bɨdepa nipadai p'anɨ

⁷ Cristo k'orea pedea pia bɨt'a taipa uru p'anɨmina, nãɨ k'ak'ua ɨbɨwẽa bɨma. Chok'o jĩra ãrii bɨma. Mãɨpuru jõmãɨrãpa k'awa p'anɨma tai jua chaareadepa mãɨ pedea jaratea p'anɨwẽt'a, mãɨpari Tachi Ak'õre jua chaarea waibɨa bɨdepa jaratea p'anɨt'a.

⁸ Tai ne ãareaɨne minachia mĩa p'anɨmina mãɨne p'ue ãyá wãnaiwẽ k'ɨ̃risiadak'ama. Sãmaasã́ oodai k'awadawẽa p'anɨne p'ue oodaiwẽ k'ɨ̃risiadak'ama.

⁹ Ẽpẽrarãpa tai piawẽa oo p'anɨmina Tachi Ak'õrepa itu bɨwẽa bɨma. Tai minachia jeeda baepiutamina p'ue peadaiwẽma.

¹⁰ Tai wãutacha ẽpẽrarãpa tai pea k'ɨ̃ria p'anɨma Jesú peadada jĩra. Maamina Jesupa tai k'aripa bɨ pẽra ãchia taidepa Jesú chok'ae bɨt'a unupatama.

¹¹ Piarã tai wapida chok'ae p'anɨne Jesú k'orea ẽpẽrarãpa tai pea k'ɨ̃ria p'ananaipɨ. Mãɨya tai k'ak'ua piui bɨdepa jõmãɨrãpa Jesú chok'ae bɨt'a ununaipɨ.

¹² Piarã ẽpẽrarãpa tai pea k'ɨ̃ria p'anɨmina taipa jaratea p'anɨt'a mãrapa ĩjãasidama. Mãɨpuru ewaricha Tachi Ak'õre ome chok'ae p'ananaipɨ.

¹³ Tachi Ak'õre pedeade bɨ bɨma: «Mɨa Tachi Ak'õrene ĩjãana pẽra pedeasima». Ara mãɨ jĩra taipa Tachi Ak'õre piarã ĩjãa p'anɨ pẽra ichi k'orea pedea p'anɨma.

¹⁴ Tachi Ak'õrepa Tachi Chipari Jesú chok'ae p'irabaripisima mãɨnepa taipa k'awa p'anɨma tai sida Jesú jĩra chok'ae p'irabaripiit'a. Maapae tai mãra ome ará ichi k'ĩrari bɨipɨ.

¹⁵ Tai mãɨ ãarea minachia mĩa p'anɨma mãra pia p'ananamẽrá. Mãɨne Tachi Ak'õrepa ichi sõpiadepa ẽpẽrarã chok'ará k'ariparuma. Mãɨya chok'araɨrãpa ichiá pia bɨade adaipɨ mãɨnepa ichi k'orea pia jaradaipɨ.

¹⁶ Mãɨpuru taipa waa jarateadaiwẽ k'ɨ̃risiadak'ama. Tai k'ak'ua ewaricha jõpodoutamina Tachi Ak'õrepa k'aripa bɨma tai sõne chaarea p'ananamẽrá.

¹⁷ Tai ara nãɨena minachia mĩapatamina, mãɨ naa tai k'aripa bɨma chi Tachi Ak'õre k'ĩrawãrea pia bɨde ewaricha p'ananai k'orea. Mãɨ k'ĩrawãrea atepe pia baipɨ chi idiapae ãpia mĩapataɨ k'aepẽra.

¹⁸ Mãɨ k'orea taupa unupataɨ taipa k'ɨ̃risia p'anɨwẽma, mãɨpari taupa ununak'aɨ k'ɨ̃risia p'anɨma. Tachi taupa unupataɨ isapea jõparima, maamina taupa ununak'aɨ jõk'ama.