2 Corintio 3 - Tachi Ak'õre Pedea

Tachi Ak'õrepa ẽpẽra ome pedea chiwidi bɨda

¹ ¿Mãɨ jara p'anɨnepa mãicha ara tai k'orea pia pedea p'anɨk'ãra? ¿Tai pia nipadada k'orea k'art'a mãrá ak'ɨpidai p'anɨk'ãra jarateadai k'orea? ¿Taipa mãrá k'art'a ididai p'anɨk'ãra jarateade wãnai k'orea waapẽarãpa oopata jĩra?

² Mãrat'a chi tai sõne k'art'a bɨ bɨ jĩra p'anɨma. Jõmãɨrãpa mãɨ k'art'a ak'ɨdak'ari k'awa p'anɨma taipa jĩp'a jarateapataɨt'a.

³ Taidepa Cristode ĩjãanana pẽra mãra k'art'a Cristopa bɨ teada jĩra p'anɨma. Ichia mãɨ k'art'a tintapa bɨé pasima, mãɨpari chi chok'ae bɨ Tachi Ak'õre Jaoredepa bɨsima. Mawara p'ep'edea pedade bɨé pasima, mãɨpari tachi sõne bɨsima.

⁴ Tachi Ak'õre k'ĩrari taipa Cristodepa mãɨ piarã k'awa p'anɨma.

⁵ Taipa p'ue jaradawẽma ara tai tuaba Tachi Ak'õrepa oo bɨt'a p'ue oodait'a. Mãɨpari k'awa p'anɨma Tachi Ak'õrenepa jõma p'ue oodait'a.

⁶ Tachi Ak'õrepa tai bɨsima ichia ẽpẽrarã ome pedea chiwidi bɨda p'ue jarateadamẽrá. Mãɨ pedea chiwidi bɨda chi Moisepa bɨda jĩra juapa bɨdawẽma, mãɨpari Tachi Ak'õre Jaorepa k'awapi bɨma. Chi Moisepa bɨdapa k'awapi bɨma nemietá oo p'anɨ k'orea ẽpẽrarã piudai p'anɨt'a, maamina Tachi Ak'õre Jaorepa tachiá chok'ae p'anapiparima.

^7-8 Tachi Ak'õrepa Moisea chi ley mawara p'ep'edea bɨde teak'ari, ichi k'ĩrawãreapa chi Moisé k'ĩra ãarea achiterrea beepisima. Mãɨ k'orea israel ĩjũanepemarãpa Moisé k'ĩra p'ue ak'ɨdaé pasima. Mãɨ k'ĩrawãrea bɨ pik'ã́ jõi pasimina waidi p'ue ak'ɨdawẽa p'anasidama. Piarã Tachi Ak'õrepa ichi k'ĩrawãreapa unupisima mãɨ Moisepa bɨda minachia pia bɨt'a. Maamina ichia pedea chiwidi bɨda ichi Jaorepa k'awapi bɨ pẽra ¿chi Moisepa bɨda k'aepẽra atepe pia bɨwẽk'ãra?

⁹ Piarã mãɨ Moisepa bɨdapa ẽpẽrarã piudai p'anɨane a jara bɨmina minachia pia bɨma. Maamina Tachi Ak'õrepa pedea chiwidi bɨda atepe piipará bɨma. Mãɨpa k'awapi bɨma sãmaasã́ Tachi Ak'õrepa tachi nepɨra newẽa p'anɨane aparit'a.

¹⁰ Moisepa bɨda minachia pia badamina idiapae ãpia piawẽa bɨma ichia pedea chiwidi bɨda atepe piipará bɨ pẽra.

¹¹ Chi Moisepa bɨda naena minachia pia basimina mãɨ ewaricha pae baé pasima. Maamina ichi pedea chiwidi bɨda jõk'a pẽra piipará bɨma.

¹² Mãɨ pedea chiwidi bɨda piarã jõk'apɨ́ k'awa p'anɨ pẽra taipa pia jarateapatama.

¹³ Taipa ãpia pida mẽranak'ama Moisepa ichi k'ĩra mẽrana jĩra. Moisepa ichi k'ĩra neet'aadepa mẽrapachima israel ĩjũanepemarãpa chi k'ĩrawãrea jõrut'a minachia unupiemaapa.

¹⁴ Maamina ãchia mãɨ k'awadaé pasima. Idiapae pida Moisepa bɨda ak'ɨutade judiorãpa k'awadak'ama. Ãchi k'ɨ̃risiat'a wapida neet'apa mẽra pɨra uru p'anɨ jĩra bɨma aba Cristodeepuru mãɨ wẽai bɨ pẽra.

¹⁵ Idiapae pida Moisepa bɨda eda jarautade neet'apa ãchi sõ mẽra pɨra uru p'anɨ jĩra p'anɨma.

¹⁶ Piarã abaɨ Tachi Ak'õremá jĩitea wãrune ichi k'ɨ̃risia neet'apa mẽra pɨra uru bɨ jĩra bɨt'a Tachi Chiparipa wẽaipɨ.

¹⁷ «Tachi Chipariade» arude «Tachi Ak'õre Jaore» jara bɨma. Tachi Chipari Jaoredepa nipautade, ichia nemietaade mãɨnepa Moisepa bɨdade jɨ̃ uru p'anana jĩra bɨdepema k'ẽet'aapiparima.

¹⁸ Tachia Cristode ĩjãa p'anɨ pẽra tachi k'ĩra neet'apa mẽra pɨra uru p'anɨ jĩra p'anɨwẽma. Mãɨpuru tachidepa waapẽarãpa Tachi Chipari k'ĩrawãrea unu p'anɨma k'ĩra ak'ɨpataɨde ak'ɨ p'anɨ jĩra. Mãɨne Tachi Chipari Jaorepa tachi ewaricha pia oopodo bɨma Tachi Chipari jĩra p'ananamẽrá.