2 Corintio 13 - Tachi Ak'õre Pedea

Pablopa nãɨ k'art'ade k'aadea bɨda

¹ Tachi Ak'õre pedeade nãɨya jara bɨma: «Nepɨracha ak'ɨutade ẽpẽra ume wa ũpea arí p'ananai p'anɨma. Mãɨne ichi nepɨra k'orea mãɨ ume wa ũpea p'anɨrãpa abarik'a jaradaipɨra, k'awadaipɨ piarã mãɨya basit'a». Nãɨpa bari k'ak'o ũpea mɨ mãramá wãru pẽra ɨtɨaipɨ Tachi Ak'õre pedeade jara bɨ jĩra.

² Bari k'ak'o ume mãramá wãside mɨa nemietá oo berã́ jarasima waa oopidaemaapa. Mãɨya oodaepɨra, mãicha cherude mɨa ãchi k'ĩra chupuriawẽane asima. Mãɨnepa ara nãɨena mɨ mãra ome bɨwẽmina abarik'a jararuma: nemietá oo berãpa itu bɨdaepɨra, mɨ mãicha wãrune ãchi k'ĩra chupuriaiwẽma.

³ Mãrapa Cristo piarã mɨnepa pedea bɨt'a k'awa k'ɨ̃ria p'anɨẽra mɨa mãɨya unupiipɨ. Cristopa ara ichi ɨbɨwẽa bɨt'a mãrá unupik'ama, mãɨpari chaarea bɨ unupi bɨma.

⁴ Ichi ɨbɨwẽa bɨ jĩra k'urusude barijira bɨdaadamina Tachi Ak'õre chaareadepa chok'ae bɨma. Tai sida ɨbɨwẽa p'anɨma ichi ɨbɨwẽa bada jĩra, maamina ichi ome tai Tachi Ak'õre chaareadepa p'ananait'a mãrá unupidaipɨ.

⁵ Ara machicha minachia k'ɨ̃risiat'ɨ piarã Jesude ĩjãa p'anɨt'a k'awadai k'orea. Ara machicha minachia ak'ɨt'ɨ jĩp'a nipapata k'awadai k'orea. ¿Mãrapa atua p'anɨk'ãra Jesucristo mãra sõne bɨ? Mãra sõne bɨwẽpɨra ichidirãwẽma.

⁶ Maamina mãra sõne bɨ k'awasidara mɨa k'ɨ̃risia bɨma mãrapa k'awadait'a tai piarã Jesucristopa peedaɨrã.

⁷ Taipa Tachi Ak'õrea idi p'anɨma mãrá nemietá oopidaemaapa. Maamina mãɨya idi p'anɨwẽma ak'ɨpidai k'orea tai Jesucristopa peedaɨrãt'a. Mãɨpari idi p'anɨma mãrapa jõma pia oodamẽrá, tai Jesucristopa peedaɨrãt'a k'ɨ̃risiadawẽa p'anɨmina.

⁸ Taipa chi piarã pedea p'ue k'ĩra awara oodaiwẽma, mãɨpari piarã pedea jõma oodai p'anɨma.

⁹ Mãrapa minachia ĩjãa p'anɨpɨra tai ɨbɨwẽa p'anɨmina arapá p'anɨma. Mãɨ awara taipa Tachi Ak'õrea ɨt'aa chiidi p'anɨma mãrapa jĩp'a oo p'ananamẽrá.

¹⁰ Mãɨ k'orea mãramá wãi naena mɨa nãɨ k'art'a tea peeipɨ. Mãrapa mãɨne bɨda ĩjãasidara mãramá cherude mɨa ɨtɨaiwẽma. Piarã Tachi Chiparipa mɨ chaareapié pasima mãra piawẽa p'ananamẽrá, mãɨpari mɨ bɨsima mãrapa pia ĩjãanamẽrá.

¹¹ Ũpẽarã, k'aadea mɨa nãɨya bɨruma: arapá p'anat'ɨ, mãicha jĩp'a oo p'anayá jɨrɨt'ɨ, mɨa jara bɨt'a oo p'anat'ɨ, abarik'a k'ɨ̃risia uru p'anat'ɨ mãɨnepa ne k'ɨ̃risiawẽa p'anat'ɨ. Mãɨya chi Tachi Ak'õre tachiá k'ɨ̃riapiparí mãɨnepa ne k'ɨ̃risiawẽa bapiparí mãra ome baipɨ.

¹² Piarã k'ɨ̃rianepa waapẽarã́ pia p'anapade at'ɨ.

¹³ Jõma nãmapema ũpẽarãpa k'ɨ̃ria p'anɨma mãra pia tuananait'a.

¹⁴ Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bait'a, Tachi Ak'õrepa minachia k'ɨ̃ria bait'a mãɨnepa ewaricha Tachi Ak'õre Jaorepa ará pia uru bait'a.