2 Corintio 11 - Tachi Ak'õre Pedea

Jesucristopa peedaɨrã jĩra be

¹ Mɨ k'ɨ̃risia newẽa bɨ jĩra pedea bɨmina k'ɨ̃ria bɨma mãrapa mɨa pedea bɨ k'orea choadait'a. Mɨ chichupuria idiruma mɨa jara bɨ ũrit'ɨ.

² Tachi Ak'õrepa ak'ɨpi bɨ jĩra mɨa mãra minachia ak'ɨ k'ɨ̃ria bɨma. Ẽpẽrapa ichi k'au k'ima tearu jĩra mɨa mãra Cristoa tea k'ɨ̃ria bɨma abapuru ichidirã p'ananamẽrá. Mɨa k'ɨ̃ria bɨma mãra ichi pae minachia pia p'ananait'a ãwẽra ɨmɨk'ĩra atua bɨ jĩra.

³ Maamina mɨa wap'ea bɨma waapẽarãpa mãra seadait'a taamapa k'ɨ̃risia k'awaadepa Eva seada jĩra. Mãɨyara mãrapa Cristode piarã sõnepa ĩjãa p'anɨt'a itu bɨdaipɨ.

⁴ Tai awaraɨ chedapa Jesú k'orea taipa jarateadada awara jaratearude, wa chi Tachi Ak'õre Jaore mãrapa jitadada k'orea awara jaratearude mãrapa minachia ĩjãapatama. Ichiaba chi pedea pia mãrapa ĩjãanana awara jaratearude minachia ĩjãapatama.

⁵ Chi mãɨya jarateapataɨrã ¿mãramá Jesucristopa peedaɨrã chi atepe piipará p'anɨane a k'ɨ̃risiapatak'ãra? Mɨmá ãchi k'aepẽra mɨ mi ãpia pida ãpia bɨwẽma.

⁶ Mɨ pedea pia bɨdepa pedeak'amina, piarã pedea minachia k'awa bɨma. Mãɨ piarã pedea taipa ne ãareaɨnepa mãrá minachia k'awapisidama.

⁷ Mɨa chi pedea pia Tachi Ak'õre k'orea mãrá pari jarateada pẽra mɨ mãra k'ĩrari ãpia jĩra beesima Tachi Ak'õre ome pia p'ananamẽrá. ¿Mãɨyara nemietá oosik'ãra?

⁸ Waapẽarã ũpẽarãpa erreara mɨá teasidama mãrá p'ue minachia jaratea bamẽrá.

⁹ Mɨ mãramá baside nejõma uru badawẽmina mãrá idié pasima. Mãɨpari mɨa wẽa bada ũpẽarã Macedonianepema chedaadarãpa ãarea teasidama. Mɨa mi ãpia pida mãrá idié pasima mãɨnepa idiwẽa baipɨ.

¹⁰ Cristo mɨ sõne bɨ pẽra piarã jararuma: Mɨa mãranepema erreara jitawẽa bɨade arude, chi waapẽarã k'aepẽra atepe bɨ jĩra jara bɨma. Acaya tuadepemarãpa mi ãpia pida p'ue jaraiwẽma mɨa mãɨ k'orea pia pedeaiwẽa bɨt'a.

¹¹ ¿Mɨa k'ãarea mãɨya erreara idiwẽa bɨma? ¿Mãra k'ɨ̃riawẽa bɨ pẽra mãɨya oo bɨk'ãra? Tachi Ak'õrepa k'awa bɨma mɨa mãra k'ɨ̃ria bɨt'a.

¹² Ara mɨchia oopari jĩra oopodoipɨ. Chi tai jĩra oo p'anɨane apataɨrãpa mãɨya pedeapatama waapẽarã k'aepẽra atepe p'anɨane a k'ɨ̃risia p'anɨẽra. Maamina mi ãpia pida p'ue jaradaiwẽma tai jĩra oo p'anɨt'a.

¹³ Ãchi Cristopa peedaɨrãwẽma, mãɨpari waapẽarã seapataɨrãpɨ. Seadepa k'ɨ̃risiapipatama ãchi Cristopa peedaɨrãpɨ.

¹⁴ Jãɨrã k'orea mãrapa k'awa k'ɨ̃risiadawẽa p'anɨwẽma. Tiore sida Tachi Ak'õrepa ɨt'aripa peeda ɨnaanepema jĩra cheparima.

¹⁵ Mãɨpuru ichi pae pari mimiapataɨrã pida jĩp'a oo p'anɨ jĩra chedaipɨra mãrapa k'ɨ̃risiadawẽa p'anɨma sãmaasã́ jãɨya cheuta. Maamina ãchi piudai ewaride ãchia nemietá oodada jĩra ɨtɨaipɨ.

Pablo minachia mĩa bɨ k'orea arapaada

¹⁶ Mɨa mãicha jararuma: mi abaɨ pida k'ɨ̃risiaiwẽa bɨma mɨ k'ɨ̃risia newẽa bɨt'a. Maamina mãɨya k'ɨ̃risiadaipɨra, mɨ k'ɨ̃risia newẽa bɨ jĩra itu pedeapit'ɨ mɨa pida ara mɨchi k'orea ãpia pia pedeai k'orea.

¹⁷ Ara mɨ k'orea pia pedea bɨde Tachi Chiparipa mãɨya pedeapiwẽa bɨma, mãɨpari mɨ k'ɨ̃risia newẽa bɨ jĩra pedea bɨma.

¹⁸ Chok'araɨrãpa ara ãchi k'orea pia pedeapatama nãɨ ĩjũanepemarãpa oopata jĩra. Mãɨpuru mɨa pida ara mɨ k'orea pia pedeaipɨ.

¹⁹ Mãra chi minachia k'ɨ̃risia pará p'anɨẽra, nãɨ k'ɨ̃risia newẽa bɨpa jaratea bɨt'a mãrapa choapatama.

²⁰ Mãra ãchi pae pari mimiapataɨrã jĩra p'aneepiutade, mãra ik'á barik'outade, itu ne ãarea oopiutade, mãra k'aepẽra atepe p'anɨane a k'ɨ̃risiautade, mãɨyawẽpɨra mãra k'ĩtarramá p'eutade mãrapa itu mãɨya oopipatama.

²¹ Mɨa jararuma: mɨ mãra t'ãena baside, jãɨrã jĩra baé pasima. Mãramá, mɨ mãɨya jua chaareawẽa bada k'orea ¿p'era bai bɨk'ãra? Abaɨ pida ara ichi k'orea p'ue pia pedeaipɨra, mɨa pida ara mɨ k'orea p'ue pia pedeaipɨ. Maamina mãɨya pedeai k'ɨ̃risia newẽa bɨ jĩra pedeai bɨma.

²² Ãchi hebreorãane a p'anɨma. ¿Mɨ sida ara abaɨwẽk'ãra? Ãchi israeldepemarãane a p'anɨma. ¿Mɨ sida ara abaɨwẽk'ãra? Ãchi Abrahán warrarãane a p'anɨma. ¿Mɨ sida ara abaɨwẽk'ãra?

²³ Ãchi Cristo pae pari mimiapataɨrãane a p'anɨma. Maamina ãchi k'aepẽra mɨa atepe pia Cristopa k'ɨ̃ria bɨ ooparima. Mãɨya pedea bɨde k'ɨ̃risia newẽa bɨ jĩra pedea bɨma. Piarã ãchi k'aepẽra mɨa Tachi Ak'õrepa oo bɨt'a atepe ooparima. Ãchi k'aepẽra ẽpẽrarãpa mɨ bari k'ak'o minachia jok'aesidama. Ãchi k'aepẽra mɨ bari k'ak'o minachia eda jɨ̃a nɨbɨpisidama. Bari k'ak'o minachia mɨ piui basima.

²⁴ Bari k'ak'o joesoma judiorãpa mɨ jitasidama. Jitautacha soapa bari k'ak'o 39 p'esidama.

²⁵ Bari k'ak'o ũpea mɨ jitadak'ari pak'urupa usidama. Bari k'ak'o aba mɨ mawarapa bat'asidama peadai k'orea. Bari k'ak'o ũpea mɨ p'usadea wãside p'ãp'orro edá t'aawãsima. Bari k'ak'o aba ãst'á mãɨnepa teamasi pida p'usa estaik'a ũu basima.

²⁶ Mɨ ode wãrune, to k'achiade nipapachima mãɨnepa nechɨapataɨ mietaarã paraamá nipapachima. Ara mɨ ẽpẽrarã judiorã t'ãena mãɨnepa judiorãwẽ t'ãena mɨ nepɨrade basima. Mãɨ p'uuru wawaria bede mãɨnepa p'uuru awaraɨde mɨ nepɨrade basima. P'usade pida nepɨrade basima. Chi ũpẽarã piarãpemawẽmá pida mɨ nepɨrade basima.

²⁷ Mimia bɨde mɨ minachia mĩapachima. Bari k'ak'o minachia k'ãiwẽa bapachima, jarra bapachima, opisia bapachima, nek'owẽa bapachima. K'õresãapa mɨ wɨwɨrrɨa bapachima, mãɨnepa neet'á nea bapachima.

²⁸ Mãɨ awara ewaricha jõma ũpẽarã tuachapema k'orea mɨa minachia k'ɨ̃risia baparima.

²⁹ Aba k'ɨdade beeipɨra, mɨ sida k'ɨdade bee jĩra baparima. Abaɨpa waapẽarã ũpẽa nepɨrade baepiipɨra, mɨ mãɨ ẽpẽra ome k'ĩruuparima.

³⁰ Ara mɨ k'orea pia pedeaipɨra, mɨ ɨbɨwẽa bɨ k'orea pia pedeaipɨ.

³¹ Tachi Pajãnepema Chipari Jesú Ak'õrea ewaricha pia pedeadai p'anɨma. Ichia k'awa bɨma mɨa sea jarak'ama.

³² Damasco p'uurude baside chi minachia k'awa bɨ Aretapa ichi p'uuru ak'ɨpiparia mɨ jɨrɨpisima jitapii k'orea.

³³ Maamina ũpẽarãpa mɨ jabara nepalade eda bɨdak'ari maapae chi p'uuru ik'idá jũk'a bɨ uriade ɨ̃rɨpa edá jira peesidama. Mãɨya ichi juadepa mĩruwãsima.