2 Corintio 10 - Tachi Ak'õre Pedea

Pablopa ara ichi k'orea ũpẽarã́ k'awapida

¹ Mɨ Pablopɨ. Cristo k'ɨ̃rianepa mãɨnepa ichi sõpiadepa mɨa mãrá chichupuria idiruma mɨ pedea ũrinamẽrá. Waapẽarãpa jara p'anɨma mãra ome bɨde, mɨa wap'ea baparit'a mãra ɨtɨai k'orea, maamina mãra ome bɨwẽne wap'eak'ama mãra k'art'adepa ɨtɨai k'orea.

² Mãɨya jara p'anɨmina mãramá cherude tai k'orea k'achia pedea p'anɨrã mɨa piarã ɨtɨaipɨ. Ãchia jara p'anɨma tai nãɨ k'ak'uapa k'ɨ̃ria bɨ jĩra nipada. Mãɨpuru mãra sida ɨtɨaemaapa mɨa chichupuria idiruma jĩp'a oodamẽrá.

³ Tai nãɨ k'ak'uade p'anɨma maamina nemietá p'uedai k'orea nãɨ k'ak'uadepa chõo p'anɨwẽma.

⁴ Taipa chõonai k'orea uru p'anɨt'a nãɨ ĩjũanepemawẽma, mãɨpari Tachi Ak'õre jua chaareadepa taipa jõma nãɨ ĩjũanepema k'ɨ̃risiapataɨ p'uepatama.

⁵ Jõma k'ɨ̃risia piawẽa be mãɨnepa chi tachi k'ak'ua atepe k'ɨ̃riapataɨ Tachi Ak'õre k'orea itu k'awapidak'aɨ, taipa mãɨ seat'a k'awapipatama. Ẽpẽrarãpa ãchi nek'ĩramá eda jɨ̃a nɨbɨuta jĩra taipa chi mãɨya k'ɨ̃risia be jĩp'a k'ɨ̃risiapipatama Cristode ĩjãanamẽrá.

⁶ Taipa ũpẽarã k'ɨɨrɨwẽa be ɨtɨadai k'orea p'anɨma. Maamina naa nɨ p'anɨma mãrapa Cristode nejõmane ĩjãa p'anɨt'a unupidamẽrá.

⁷ Mãrapa chi ɨ̃rɨpema ak'ɨ p'anɨma. Abaɨpa piarã Cristodé k'ɨ̃risia bɨpɨra, k'awa bai bɨma tai sida Cristoderã.

⁸ Pia jaraideepara, Tachi Ak'õrepa taiyá oopi bɨ k'orea mɨa atepe pedea bɨmina mãɨ k'orea k'ĩra p'era bɨwẽma. Tachi Chiparipa taiyá mãɨya oopi bɨma mãrapa pia ĩjãanamẽrá. Ichia tai bɨé pasima mãrapa ĩjãapataɨ itu bɨdamẽrá.

⁹ Mɨa k'ɨ̃riawẽma mãrapa k'ɨ̃risiadait'a mɨ k'art'adepa mãra p'erapi k'ɨ̃ria bɨ.

¹⁰ Waapẽarãpa nãɨya jara p'anɨma: «Pablopa k'art'adepa mãrá minachia ɨtɨaparima mãɨnepa ne minachia oopiparima. Maamina mãra ome bɨde wap'ea nɨbɨ jĩra bɨma mãɨnepa piawẽa pedeapariade apatama».

¹¹ Chi mãɨya jara p'anɨpa k'awadai p'anɨma taipa t'ɨmɨɨpa k'art'adepa minachia ɨtɨa p'anɨ jĩra, mãra ome p'anɨne mãɨya ɨtɨadait'a.

¹² Maamina ¿sãmaasã́ tachi k'ɨ̃ría chi waapẽarã ãchit'u chi piipará beade apataɨrã jĩra k'ɨ̃risiadaima? Ara ãchit'u chaapatama, mãɨnepa ara ãchi waapẽarã paara ak'ɨpatama, k'ai piipará bɨ k'awadai k'orea. Mãɨya oodadepa, k'ɨ̃risia nea p'anɨt'a unupipatama.

¹³ Ara tai k'orea minachia pedeadaiwẽma, mãɨpari Tachi Ak'õrepa taiyá oopi bɨ k'orea pia pedeadaipɨ. Ichia oopi bɨt'a oo p'anɨ pẽra tai mãramá chesidama.

¹⁴ Tai mãrá naa chi pedea pia Cristo k'orea jarateade wãsidama. Mãɨya baépara idiapae mãrá jarateautade Tachi Ak'õrepa peedawẽmá p'ananaiwẽ pasima.

¹⁵ Waapẽarãpa oodada k'orea ara tai k'orea pia pedeadak'ama ara taipa oodada jĩra. Mãɨpari taipa k'ɨ̃ria p'anɨma mãrapa Cristode pia ĩjãanait'a. Mãɨya taipa mãra tuade p'ue pia jarateadaipɨ ara Tachi Ak'õrepa oopi bɨ jĩra.

¹⁶ Naapae chi pedea pia Cristo k'orea waapẽarã tuade pida jarateadaipɨ. Maamina waapẽarãpa jarateadaadamá wãnaiwẽma waapẽarãpa oodada taipuru oosidade adaemaapa.

¹⁷ Tachi Ak'õre pedeade bɨ bɨma: «Abaɨpa ara ichi k'orea pia pedeaipɨra, Tachi Chipari k'orea pia pedeai bɨma».

¹⁸ Abaɨpa ara ichi k'orea pia jaraipɨra, mãɨ jara bɨwẽma Tachi Chiparipa mãɨ ẽpẽra pia unu bɨt'a. Mãɨpari chi Tachi Chiparipa chi ẽpẽra pia bɨade a bɨt'a, mãɨt'u pia unu bɨma.