1 Timoteo 6 - Tachi Ak'õre Pedea

Chipari pae pari mimiapataɨrã sãmaasã́ p'ananai p'anɨ

¹ Cristode ĩjãa p'anɨ pae pari mimiapataɨrãpa ãchi chipari wap'ea p'ananai p'anɨma. Mãɨya waapẽarãpa k'achia pedeadaiwẽma Tachi Ak'õre mãɨnepa tachia jarateapataɨ k'orea.

² Ãchi chiparipa Cristode ĩjãa bɨpɨra, ãchi p'ue wap'eadaiwẽa p'anɨane adaiwẽa p'anɨma, ũpẽarã pẽra. Mãɨpari ichi pae atepe pia mimianai p'anɨma. Ãchi mimianepa ãchi Cristode ĩjãa bɨ chiparipa erreara jitaparima. Mãɨpuru k'ɨ̃rianepa ichi pae mimianai p'anɨma. Mãɨ jaratea base. Mãɨnepa ãchiá jarase mãɨya oodamẽrá.

Erreara awaa be

³ Abaɨ pida k'ĩra awara jaratea baipɨra, Tachi Chipari Jesucristopa jĩp'a jarateada piawẽa bɨade aipɨra, mãɨnepa tachi jĩp'a nipadai k'orea pida k'ĩra awara jaratea baipɨra,

⁴ mãɨnepa jõma k'awa bɨade a k'ɨ̃risia bɨmina piarã atua bɨma. Sõpiawẽa bɨdepa k'ĩruu pedeayá awaa baparima. Paritua pedeauta k'orea k'ĩruu pedea baparima. Mãɨ k'orea nãɨrã unuparima: waapẽarãpa ne uru bɨ k'orea sõ ãyá bait'a, waapẽra ome k'ĩruu jɨrɨ bait'a, waapẽra k'orea k'achia pedea bait'a, mãɨnepa waapẽra k'orea piawẽa k'ɨ̃risia bait'a.

⁵ Mãɨ ẽpẽrarã k'ɨ̃risia mietá p'anɨ mãɨnepa chi piarã pedea atua p'anɨ paritua k'ĩruu pedeapatama. Ãchia k'ɨ̃risiapatama Tachi Ak'õrene ĩjãa bɨdepa erreara ununait'a.

⁶ Piarã tachia ne minachia uru p'anɨma jĩp'a ninanepa. Maamina, aba ara tachia nãɨ ĩjũane uru p'anɨnepa arapá p'anɨpɨra, mãɨya baipɨ.

⁷ Tachi t'õsidaɨde nãɨ ĩjũanea mi ãpia pida ne enemeenaé pasima. Piuutade mi ãpia pida ne ateewãnaiwẽma.

⁸ Mãɨpuru nek'odai uru p'anɨpɨra, neet'á uru p'anɨpɨra, ara mãɨpa ne k'ɨ̃risiawẽa p'ananai p'anɨma.

⁹ Maamina erreara minachia uru k'ɨ̃ria berãpa nejõma awaa p'anɨnepa k'achiade baepatama. Chi ne tachi k'aripak'aɨ mãɨnepa ne tachi nemietá oopataɨ k'ɨ̃ria p'anɨnepa k'achiade p'aneepatama ãnimara k'idap'ede baeda jĩra. Mãɨne ãchi ãarea chichupuria p'aneepatama, toeda t'aawãru jĩra.

¹⁰ Erreara awaa bɨdeepuru ne k'achia unuparima. Ara mãɨ awaa p'anɨnepa waapẽarãpa Cristode ĩjãa p'anana itu bɨsidama. Mãɨya ãchi minachia mĩa p'aneesidama.

Pablopa Timoteoa oopida

¹¹ Maamina pɨa Cristode ĩjãa bɨ pẽra jõma mãɨnepema ãyá wãse. Jĩp'a nipase. Tachi Ak'õre ode wãse. Sõnepa piarã Cristode ĩjãa base. Jõmãɨrã k'ɨ̃ria base. Jõma choase. Mãɨ atepe k'awa bɨmina, jõmãɨrã ome sõpia base.

¹² Ne ãareaɨne Cristode ĩjãa base pia papaká bɨ k'ĩruupari jĩra. Mãɨya pɨ ewaricha Tachi Ak'õre ome baipɨ. Chok'ará p'anɨ k'ĩrari, pɨa Cristode ĩjãa bɨade a jaraside, Tachi Ak'õrepa pɨ t'ɨ̃sima mãɨya chok'ae bamẽrá.

^13-14 Ãarea chok'ae berã Tachi Ak'õrenepa chok'ae p'anɨma. Ara mãɨ Tachi Ak'õre k'ĩrari mɨa jararuma pɨa oo bamẽrá. Jesucristo k'ĩrari pida abarik'a jararuma ichia piarã pedea Poncio Pilato k'ĩrari jarada jĩra. Mɨa nãɨ jararuma: mɨa jaratea bɨ k'ĩra jĩp'a oo base waapẽarãpa pɨ k'orea k'achia pedeadaemaapa, aba Tachi Chipari Jesucristo cherudea.

¹⁵ Tachi Ak'õrepa bɨda ewaride ichi unupiipɨ. Abapuru Tachi Ak'õret'u chi piapɨ, mãɨnepa jõmãɨrã chi Chiparipɨ. Ichi jõmãɨrã poro jũra jɨ̃parí jɨ̃ p'anɨrã k'aepẽra ichit'u chi Atepe Bɨpɨ, ichiaba jõmãɨrã chiparirã k'aepẽra ichit'u chi Atepe Bɨpɨ.

¹⁶ Abapuru ichit'u piuk'ama. Ichi bɨmá achiterrea jẽrat'ĩu nɨbɨ pẽra mi ãpia pida p'ue ara k'ait'a wãnaiwẽma. Ichit'a mi ãpia pida ununawẽa p'anɨma mãɨnepa p'ue ununak'ama. Mɨa k'ɨ̃ria bɨma ewaricha jõmãɨrãpa ichiá pia pedea p'ananait'a mãɨnepa jua chaareadepa jõmãɨrã ua bait'a. Mãɨya beese.

Erreara pará berãpa sãmaasã́ oodai p'anɨ

¹⁷ Nãɨ ĩjũane erreara pará berã́ jarase waapẽarã k'aepẽra chi atepe berã k'ɨ̃risiapidaemaapa. Ãchia ne uru p'anɨ tãaraa choak'a pẽra jarase mãɨ k'orea pia p'ananai k'ɨ̃risiapidaemaapa. Tachi Ak'õret'u k'ɨ̃risiadai pia bɨma. Ichiapuru tachiá nejõma minachia teaparima ne k'ɨ̃risiadawẽa p'ananamẽrá.

¹⁸ Chi ne pará berã́ jarase jõmãɨrã ome nepia oodamẽrá. Mãɨnepa jarase ãchia uru p'anɨnepema sõpiadepa waapẽarã́ teadai k'orea p'ananai p'anɨ.

¹⁹ Mãɨya pia oo p'anɨnepa ne yaamaa p'anɨma chi mãɨ ewari cherude pia p'ananai k'orea. Mãɨne ãchi piarã chok'ae p'ananaipɨ.

Pablopa nãɨ k'art'ade k'aadea bɨda

²⁰ Timoteo, jõma Tachi Ak'õrepa jara peeda minachia ak'ɨse. Chi Tachi Ak'õremá piawẽa bɨ k'orea pedeapataɨ itu bɨse. Mãɨnepa jõma k'ɨ̃risia Tachi Ak'õre pedea ome k'ĩra awara be itu bɨse. Waapẽarãmá mãɨ k'ɨ̃risia pia bɨma. Maamina pia bɨwẽma.

²¹ Waapẽarãpa mãɨ k'ɨ̃risia awara ĩjãapatama. Mãɨ k'orea ãchia Cristode ĩjãa p'anana itu bɨsidama. Mɨa k'ɨ̃ria bɨma Tachi Ak'õrepa ichi sõpiadepa pɨ k'aripa bait'a.