1 Timoteo 5 - Tachi Ak'õre Pedea

Ũpẽarã ome sãmaasã́ bai bɨ

¹ Chõarã ɨtɨarãse, mãɨpari pɨ ak'õre ome pedeapari jĩra ãchi ome sõpiadepa pedease ũrinamẽrá. K'ũtãrã́ pedease pɨchi ũpẽarã ome pedeapari jĩra.

² Chõtãarã́ pedease pɨ nae ome pedeapari jĩra. Ãwẽrarã́ k'ɨ̃risia piadepa pedease pɨ ũpẽawẽra ome pedeapari jĩra.

³ P'ẽtãarã chi k'aripadawẽa k'ede k'aripase.

⁴ Maamina p'ẽtãpa warrarã uru bɨpɨra, ãichaerã uru bɨpɨra, mãɨrãpa k'aripadai p'anɨma. Ãchia minachia k'awadai p'anɨma sãmaasã́ ãchi tiidapemarã k'aripadai p'anɨt'a. Ãchi ak'õre, nae mãɨnepa ak'õrechõarã ne teadai p'anɨma mãɨrãpa ãchiá ne tea p'anana jĩra. Mãɨ Tachi Ak'õre k'ĩrari jĩp'a bɨma.

⁵ P'ẽtã́ piarã ichi tuaba k'ɨrɨpa Tachi Ak'õret'u nɨparima. Ãst'á mãɨnepa teamasi Tachi Ak'õrea ɨt'aa chiidi baparima k'aripamẽrá.

⁶ Maamina p'ẽtãpa bɨsi oo bai k'orea jɨrɨ baipɨra, chok'ae bɨmina piuda jĩra bɨma.

⁷ Jõma ũpẽarã́ mãɨ oopise p'ẽtãarã k'orea k'achia pedeadawẽa p'ananamẽrá.

⁸ Abaɨpa ara ichi ẽpẽrarã mãɨnepa ichi tedepemarã sida k'aripak'á baipɨra, Tachi Ak'õre pedea itu bɨ bɨma. Cristode ĩjãanak'apɨɨrã k'aepẽra piawẽa oo bɨma.

⁹ Ũpẽarãpa paritua p'ẽtã́ t'ɨ̃ k'art'ade bɨdaiwẽa p'anɨma k'aripadai k'orea. Mãɨpari nãɨya p'anɨrã bɨdai p'anɨma: sesenta ãyo waa k'ede mãɨnepa ɨmɨk'ĩra abapuru uru k'edeada.

¹⁰ Ãchia pia oodada k'orea t'ɨ̃ p'oa p'ananai p'anɨma. Ãchi warrarã pia taup'ãepachidapɨra, ãchi tedea chedaadarã́ pia pedeapachidapɨra, ũpẽarã jĩru sɨɨpachidapɨra, chi mĩa k'ede k'aripapachidapɨra mãɨnepa nejõma pia oopachidapɨra, mãɨ p'ẽtã́ t'ɨ̃ k'art'ade bɨdai p'anɨma.

¹¹ Maamina p'ẽtã́ wapida chõtã́wẽa be t'ɨ̃ k'art'ade bɨrãt'ɨ. Ãchi k'ak'uapa oo k'ɨ̃ria bɨ ooparideepuru mãicha k'ima ata k'ɨ̃riapatama. Mãɨya ãchia Cristo pae mimianai k'orea waa k'ima atadawẽane adada itu bɨpatama.

¹² Ãchia chi naa pedea jaradada itu bɨdada pẽra nepɨra pará p'anɨma.

¹³ Mãɨ awara ãchi techa nipapatama mãɨnepa k'oa p'aneepatama. K'oa p'aneenak'ari, chi sea nepɨrɨ p'aneepatama, chĩara nepɨrade p'aneepatama, mãɨnepa ne jarai piawẽa bɨt'a pedea p'aneepatama.

¹⁴ Mãɨ k'orea mɨa k'ɨ̃ria bɨma p'ẽtã́ wapida warra be k'ima atadait'a, warra t'õnait'a, mãɨnepa ãchi te sida pia ak'ɨdait'a. Mãɨya tachi nek'ĩramaapa p'ue piawẽa pedeaiwẽma.

¹⁵ Mɨa mãɨ jara bɨma waapẽarã p'ẽtãarã o ãyá wãnak'ari tiore k'aade wã p'anana pẽra.

¹⁶ Cristode ĩjãa bɨ wẽrapa p'ẽtãarã ichi tiidapemarã k'aripai bɨma. Mãɨ p'ẽtãarã chi Cristode ĩjãapataɨrãpa k'aripadaiwẽa p'anɨma. Mãɨpari chi p'ẽtã́ piarã chichupuria berãt'u k'aripadai p'anɨma.

Ũpẽarã ak'ɨpataɨrã ome sãmaasã́ oodai p'anɨ

¹⁷ Ũpẽarãpa chi ũpẽarã ak'ɨpataɨrãpa pia oo p'anɨnepa ũpẽarã k'ɨ̃risia piadepa ãchi k'aripadai p'anɨma, ne uru p'ananamẽrá, pia oo p'anɨẽra. Mãɨnepema chi Tachi Ak'õre pedea jarateapataɨrã mãɨnepa tachi sãmaasã́ nipadai k'orea jarateapataɨrã atepe k'aripadai p'anɨma.

¹⁸ Tachi Ak'õre pedea nãɨya jara bɨma: «P'ak'apa trigo k'ɨmɨ edá pistiamaa bɨde ichi it'ae jɨ̃parí jɨ̃rãse». Mãɨnepa nãɨya jara bɨma: «Chi mimiaparipa ichi erreara jitai bɨma».

¹⁹ Abaɨpa ũpẽarã ak'ɨparí nepɨra pará bɨade aipɨra, maamina ẽpẽra umeepa wa ũpẽapa abarik'a jaradaepɨra, mãɨ pedea ĩjãarãse.

²⁰ Maamina ũpẽarã ak'ɨparipa nemietá oo k'ãri bɨpɨra, jõmãɨrã k'ĩrari ɨtɨase waapẽarãpa wap'eadamẽrá.

²¹ Tachi Ak'õre k'ĩrari, Cristo k'ĩrari mãɨnepa Tachi Ak'õrepa ɨt'aripa peedarã k'ĩrari mɨa pɨá jararuma: jõma mɨa jarada oose. Mãɨya oorude, ẽpẽra aba bɨ lawari barãse, mãɨpari jõmãɨrã ome abarik'a k'ĩra jĩp'a oo base.

²² Jĩrak'aua k'ɨ̃risiawẽa, pɨ jua abaɨ ɨ̃rɨ bɨrãse ũpẽarã ak'ɨparí bamẽrá. Pɨa mãɨya ooipɨra, ichia nemietá oosira, pɨ sida nepɨra pará bayade aipɨ mãɨ nemietá k'orea. Jõma k'ɨ̃risia piadepa k'ɨ̃risia base.

²³ Pɨ k'ak'ua piawẽa bapari pẽra paniawa torãse. Mãɨpari uvaba sida pɨ bi p'ua k'orea ãpia topariese.

²⁴ Waapẽarãpa nemietá oo p'anɨt'a tachia pia ak'ɨpatama, ãchi nemietá ak'ɨdai naena. Maamina waapẽarãpa nemietá oo p'anɨt'a mãɨ mãɨya bak'ari k'awadaipɨ.

²⁵ Ara mãɨ jĩra waapẽarãpa pia oo p'anɨt'a tachia pia ak'ɨpatama, mãɨnepa waapẽarãpa pia oo p'anɨt'a pia ak'ɨdak'amina mẽra beeiwẽma.