1 Timoteo 4 - Tachi Ak'õre Pedea

Sea jarateapataɨrã

¹ Tachi Ak'õre Jaorepa arí jara bɨma nãɨ k'aadeapema ewaride waapẽarãpa Cristode ĩjãa p'anana itu bɨdak'ari jaore mietá seapataɨrã, mãɨnepa ãchia jarateapataɨ ĩjãanaipɨ.

² Mãɨ jaore mietaarãpa jarateapi p'anɨ, ẽpẽrarã chi pia jĩra bepa jarateapatama. K'achia minachia oopataɨdepa mãɨ ẽpẽrarãpa nepɨra pia wa nepɨra nemietá atua p'anɨma.

³ Ãchia wẽra itu atapidak'ama mãɨnepa chi chik'o be sida itu k'opidak'ama. Maamina Tachi Ak'õrepa ãarea teasima ichide ĩjãapataɨrãpa, chi piarã pedea k'awa berãpa ichiá sõpia p'anɨane adak'ari k'odamẽrá.

⁴ Nejõma Tachi Ak'õrepa ook'oada pia bɨma. Mãɨpuru Tachi Ak'õrea sõpia p'anɨane adaipɨra mi ãpia pida tachia p'ue k'odai p'anɨnepema abaɨ pida p'ue k'owẽa beeyade aiwẽa bɨma.

⁵ Mãɨ k'odai Tachi Ak'õre k'ĩrari pia bɨma Tachi Ak'õre pedeapa mãɨya jara bɨ pẽra mãɨnepa ichiá pia p'anɨane apata pẽra.

Jesucristo pae pari mimiaparí pia

⁶ Timoteo, pɨa jõma mãɨ ũpẽarã́ jaratea baipɨra, Jesucristo pae pari mimiaparí pia baipɨ. Tachi Ak'õre chi piarã pedea tachia ĩjãa p'anɨ ĩjãapodoutadepa pɨ jaore chaarea wari baipɨ, pia nek'o bɨ jĩra.

⁷ Chõarãenapema nepɨrɨpataɨ piawẽa be itu bɨse. Tachi Ak'õrepa k'ɨ̃ria bɨ jĩra oo nipase.

⁸ Piarã tachi k'ak'ua chaareapidayá oo p'ananaipɨra, ara tachi k'ak'ua puru k'aripadaipɨ. Maamina Tachi Ak'õrepa oo k'ɨ̃ria bɨ oodaipɨra, mãɨpa tachi ne ãareaɨne k'aripaipɨ. Idiapae mãɨnepa k'aadeapema ewaride k'aripaipɨ.

⁹ Mãɨ pedea piarãpɨ. Jõmãɨrãpa mãɨ ĩjãanai p'anɨma.

¹⁰ Mãɨ k'orea tachia choa nɨp'anɨne, mimia p'anɨma. Nɨ p'anɨma Tachi Ak'õre chok'ae bɨpa k'aripamẽrá. Ichit'a chi jõmãɨrã K'aripaparipɨ. Piarã, chi ichide ĩjãautat'a k'aripaparipɨ.

¹¹ Jõma mãɨ jaratease mãɨnepa jarase oodamẽrá.

¹² Pɨ k'ũtã́ bɨmina abaɨa itu k'aepe bɨ jĩra k'ɨ̃risiapirãse. Mãɨpari pɨa pedearudepa, ne oo bɨdepa, awaraɨrã piarã k'ɨ̃ria bɨdepa, k'ĩra jĩp'a bɨdepa mãɨnepa Cristode ĩjãa bɨdepa ũpẽarã́ unupise sãmaasã́ p'ananai p'anɨt'a.

¹³ Mɨ jãmá wãrumisa, jõmãɨrã k'ĩrari Tachi Ak'õre pedea jĩk'ua eda jarapariese, jarateapariese, mãɨnepa ũpẽarã k'aripapariese pia ĩjãanamẽrá.

¹⁴ Tachi Ak'õrepa pɨá oopi bɨ teada k'ɨ̃risia atuarãse. Ũpẽarã ak'ɨpataɨrãpa ãchi jua pɨ ɨ̃rɨ bɨsidaɨde Tachi Ak'õrenepa jarasidama ichia mãɨ tearut'a.

¹⁵ Jõma mãɨ k'ĩra jĩp'a oo base jõmãɨrãpa k'awadamẽrá pɨa ewaricha pia oopodorut'a.

¹⁶ Ara pɨchi k'orea mãɨnepa pɨa jaratea bɨ k'orea jĩrak'aua base. Jõma makɨɨ jĩp'a oo nipase. Mãɨya oo baipɨra pɨ k'aripaipɨ. Pɨa jaratea bɨ ũri p'anɨrã sida k'aripadaipɨ.