1 Timoteo 3 - Tachi Ak'õre Pedea

Chi ĩjãapataɨrã ak'ɨparí sãmaasã́ bai bɨ

¹ Nãɨ pedea piarã arí bɨ pẽra, mãɨne ĩjãanai p'anɨma: abaɨpa ĩjãapataɨrã ak'ɨparí pa k'ɨ̃ria bɨpɨra, nepia oo k'ɨ̃ria bɨma.

² Mãɨpuru chi ĩjãapataɨrã ak'ɨparí nepɨra pará bɨade adaiwẽa bai bɨma, k'ima aba uru bai bɨma, minachia bɨ jĩra baiwẽa bɨma, k'ɨ̃risia piadepa bai bɨma, k'ĩrip'a bai bɨma, ichi tede cheutarã́ pia pedeai bɨma mãɨnepa pia k'awa jaratea bai bɨma.

³ It'uapa piu nipawẽa bai bɨma. K'ĩruuyá baiwẽa bɨma, mãɨpari awaraɨrã ome sõpia bai bɨma. Jõmãɨrã ome ne k'ɨ̃risiawẽa bai bɨma. Erreara awaa baiwẽa bɨma.

⁴ Ichi tedepemarã minachia ak'ɨ bai bɨma, ichi warrarã wap'eapa chok'ea p'ananamẽrá.

⁵ Ara ichi tedepemarã ak'ɨi atua bɨpɨra, ¿sãmaasã́ ẽpẽrarã Tachi Ak'õrenepemarã pia ak'ɨima?

^6-7 Cristode ĩjãanak'apɨɨrã pida ichi k'orea pia k'ɨ̃risiadai p'anɨma. Mãɨya ẽpẽrarãpa ichi k'orea piawẽa pedeadaiwẽma mãɨnepa tiorepa ẽpẽrarã k'ĩrari ichi nepɨra pará bɨade aiwẽma. Tachi Ak'õre pedea chiwidi ĩjãana chi ĩjãapataɨrã ak'ɨparí paiwẽa bɨma, mãɨ ichi atepe bɨ jĩra k'ɨ̃risiapiemaapa. Mãɨya k'ɨ̃risiasira Tachi Ak'õrepa mãɨ ɨtɨaipɨ tiore ɨtɨada jĩra.

Ũpẽarã k'aripaparí sãmaasã́ bai bɨ

⁸ Ara mãɨ jĩra ũpẽarã k'aripapataɨrã sida jĩp'a nipadai p'anɨma ẽpẽrarãpa wap'eadamẽrá. Ãchia sea jara p'ananaiwẽa p'anɨma, piu nipadaiwẽa p'anɨma mãɨnepa erreara awaa p'ananaiwẽa p'anɨma.

⁹ Tachia ĩjãa p'anɨ pedea Tachi Ak'õrepa k'awapida, k'ɨ̃risia piadepa minachia ak'ɨdai p'ananai p'anɨma.

¹⁰ Ũpẽarã k'aripapataɨrã bɨdai naena minachia jĩrak'aua ak'ɨdai p'anɨma. Maapae nepɨra nea bɨade a p'anɨpɨra, ũpẽarã k'aripapataɨrã p'ananai p'anɨma.

¹¹ Ara mãɨ jĩra wẽrarã jĩp'a nipadai p'anɨma ẽpẽrarãpa wap'eadamẽrá. Waapẽarã k'orea minachia k'achia pedeadaiwẽa p'anɨma. Minachia k'ĩrip'a p'ananaiwẽa p'anɨma mãɨnepa ne ãareaɨne oodai p'ananai p'anɨma ãchia jaradada jĩra.

¹² Ũpẽarã k'aripaparipa k'ima aba uru bai bɨma. Ichi warrarã mãɨnepa ichi tedepemarã minachia ak'ɨ bai bɨma.

¹³ Ũpẽarã k'aripapataɨrã oodai p'anɨ jĩp'a oodaipɨra, jõmãɨrãpa ãchi k'orea pia pedeadaipɨ. Mãɨya ne wap'eawẽa ãchia Jesucristode ĩjãa p'anɨ k'orea atepe p'ue pedeadaipɨ.

Chi piarã pedea Tachi Ak'õrepa k'awapida

^14-15 Mɨ isapea pɨ ak'ɨde wã k'ɨ̃ria bɨma. Maamina mɨ tãaraai jĩra bɨma. Mãɨpuru nãɨ k'art'a pɨ pae bɨruma ẽpẽrarã Tachi Ak'õre chok'ae bɨderã sãmaasã́ ará p'ananai p'anɨ k'awadamẽrá. Tachia Tachi Ak'õre piarã pedeapataɨ te tĩitau jĩra bɨma mãɨnepa k'ɨda jĩra bɨma.

¹⁶ Piarã Tachi Ak'õrepa mãɨ pedea k'awapida minachia pia bɨma: Cristo nãɨ k'ak'uade chesima. Tachi Ak'õre Jaorepa k'awapisima ichi jĩp'a bɨt'a. Tachi Ak'õrepa ɨt'aripa peedaɨrãpa ichi unusidama. Ũpẽarãpa ichi k'orea tua awaraɨdepemarãmá jarateasidama. Chok'araɨrãpa nãɨ ĩjũane ichide ĩjãasidama. Tachi Ak'õrepa ichi pajã k'ĩrawãrea bɨde mãicha ateewãsima.