1 Timoteo 2 - Tachi Ak'õre Pedea

Tachi Ak'õrea ɨt'aa chiididai p'anɨ k'orea

¹ Nãɨ pia jararuma: ẽpẽrarã ãarea k'orea tachia Tachi Ak'õrea chichupuria ididai p'anɨma, ichia k'aripamẽrá ɨt'aa chiididai p'anɨma mãɨnepa sõpia p'anɨane adai p'anɨma.

² Jõma nãɨ ĩjũanepema minachia k'awa berã k'orea mãɨnepa chi poro chaarearã be k'orea Tachi Ak'õrea ɨt'aa chiididai p'anɨma tachi ne k'ɨ̃risiadawẽa p'ananai k'orea, Tachi Ak'õre wap'ea p'ananai k'orea, mãɨnepa ne ãareaɨne jĩp'a p'ananai k'orea.

³ Mãɨya ɨt'aa chiidi p'ananai pia bɨma. Tachi K'aripaparipa mãɨ pia unu bɨma.

⁴ Ichia k'ɨ̃ria bɨma jõmãɨrãpa chi piarã pedea k'awadak'ari, k'achiadepema k'aripait'a.

⁵ Tachi Ak'õre abapuru bɨma. Mãɨnepa chi ẽpẽrarã nepɨra k'aripaparí, Tachi Ak'õre ẽpẽrarã ome, abapuru bɨma. Mãɨ ẽpẽra Jesucristopɨ.

⁶ Ara ichi itu peapisima jõma ẽpẽrarã k'aripa bai k'orea. Tachi Ak'õrepa bɨda ewaride mãɨ k'awapisima.

⁷ Mãɨ k'orea mɨ ichi pedea jaraparí bɨsima. Mɨ ichia peeda bɨsima piarã pedea ichide ĩjãanai p'anɨ k'orea judiorãwẽmá jarateade wãmẽrá. Mɨa piarã jara bɨma. Seawẽma.

⁸ Mãɨpuru ũpẽarã ará nɨbeerude, mɨa k'ɨ̃ria bɨma techa ɨmɨk'ĩrarãpa k'ɨ̃risia piadepa ãchi jua ɨt'aa jiradak'ari, Tachi Ak'õrea ɨt'aa chiididamẽrá. Mãɨne k'ĩruu p'ananaiwẽa p'anɨma mãɨnepa awaraɨ ome k'ĩruu pedea p'ananaiwẽa p'anɨma.

⁹ Mɨa k'ɨ̃ria bɨma wẽerãpa p'aru ãchi ará jɨ̃namẽrá, wẽerãpa jĩp'a p'anɨrãpa ãchi ará jɨ̃pataɨ jĩra. Ãchi puda minachia pia irudaiwẽa p'anɨma. Nee wa ne achiterrea be minachia jɨ̃naiwẽa p'anɨma. K'ak'apia neepɨa bɨ sida jɨ̃naiwẽa p'anɨma.

¹⁰ Mãɨpari Tachi Ak'õre wap'ea be pẽra, wẽerãpa pia oo p'anɨnepa minachia k'ak'apia p'anɨ jĩra p'ananai p'anɨma.

¹¹ Ũpẽarã ará jere nɨbeeutade wẽerãpa k'ĩup'ea ũrinai p'anɨma mãɨnepa chi ũpẽarã ak'ɨpataɨrã wap'ea p'ananai p'anɨma.

¹² Ará nɨbeeutade mɨa itu wẽrapa ɨmɨk'ĩrá jarateapik'ama wa ɨmɨk'ĩra ichi juade ua bait'a. Mãɨpari wẽrapa k'ĩup'ea ũri bai bɨma.

¹³ Mãɨya bai pia bɨma, Tachi Ak'õrepa Adán naa ooda pẽra. Mãɨ ɨ̃ari Eva oosima.

¹⁴ Mãɨ awara tiorepa Adán seaé pasima, mãɨpari wẽra seasima. Mãɨya seaside wẽrapa nemietá oosima.

¹⁵ Maamina warra t'õ p'anɨnepa wẽrarã k'aripaipɨ Cristode ĩjãa p'ananaipɨra, piarã waapẽarã k'ɨ̃ria uru p'ananaipɨra mãɨnepa Tachi Ak'õre pae pia p'ananaipɨra. Jõma mãɨ jĩp'a p'ananai p'anɨma.