1 Timoteo 1 - Tachi Ak'õre Pedea

Pablopa naa bɨda nãɨ k'art'ade

¹ Mɨ Pablopɨ, Jesucristopa peedapɨ. Tachi Ak'õre tachi K'aripaparipa mãɨnepa Tachi Chipari Jesucristopa mɨ nãɨya bɨsidama. Tachia Jesucristode ĩjãapatama mãɨnepa ichi k'orea pia p'ananait'a k'awapatama.

² Timoteo, mɨa nãɨ k'art'a pɨ pae bɨruma. Mɨnepa Cristode ĩjãana pẽra pɨ piarã mɨ warra jĩra bɨma. Mɨa k'ɨ̃ria bɨma Tachi Pajãnepema Ak'õrepa mãɨnepa Tachi Chipari Jesucristo pida ãchi sõpiadepa pɨ k'aripa p'ananamẽrá, k'ĩra chupuria p'ananamẽrá mãɨnepa ne k'ɨ̃risiawẽa bapi p'ananamẽrá.

Sea jarateapataɨrã́ itu jarateapirãse

³ Mɨa pɨá chichupuria idida jĩra Macedonia tuadea wãside, aba mãicha jararuma: Ep'esode beese, chi ne awara jarateapataɨrã́ waa jarateapidaemaapa.

⁴ Ãchiá jarase chõarãenapema nepɨra k'orea mãɨnepa tachi chõarãenapemarã minachia nɨbasi t'ɨ̃ne minachia k'ɨ̃risiapidaemaapa. Mãɨpa k'ĩruu pedea tuaneepiparima. Tachi k'aripak'ama Tachi Ak'õrepa oopi bɨ oodamẽrá. Abapuru ichi pedeade ĩjãa p'anɨnepa p'ue oodaipɨ.

⁵ Mɨa mãɨya jara bɨma ũpẽarãpa k'ɨ̃risia piadepa, sõpiadepa, piarã Tachi Ak'õrene ĩjãa p'anɨnepa chi k'ɨ̃ria tuananamẽrá.

⁶ Maamina waapẽarã o ãyá wãsidama. Maapae paritua pedea tachi k'aripak'á bɨ k'orea pedeapatama.

⁷ Ãchia Moisepa bɨda jarateapataɨrã pa k'ɨ̃ria p'anɨma, maamina minachia k'awa p'anɨ jĩra jarateapatamina atua p'anɨma k'ãre jaratea p'anɨt'a.

⁸ Tachia k'awa p'anɨma mãɨ Moisepa bɨda piapɨ. Maamina arí jarateadai p'anɨma.

⁹ Nãɨt'a k'awadai p'anɨma: Tachi Ak'õrepa mãɨ Moisepa bɨda teaé pasit'a chi jĩp'a be k'orea, mãɨpari teasima chi Tachi Ak'õrepa jara bɨ jĩra oodak'aɨrã k'orea, chi k'ɨɨrɨwẽa be k'orea, chi Tachi Ak'õre nea be k'orea, chi nemietá oo be k'orea, chi Tachi Ak'õre wap'eadak'á be k'orea, chi nãɨ ĩjũanepemarã jĩra p'anapataɨrã, chi ãchi ak'õre peapataɨrã k'orea, chi nae peapataɨrã k'orea, chi mĩa peapataɨrã k'orea,

¹⁰ chi k'ima awaraɨ ome k'ãipataɨrã k'orea, chi ara ãchi abarik'aɨrã ome k'ĩra p'era oopataɨ k'orea, chi ẽpẽrarã jitadak'ari netopataɨrã k'orea, chi seajarapataɨrã k'orea, chi nepɨra ak'ɨparí k'ĩrari seajarapataɨrã k'orea mãɨnepa chi piarã pedea jara bɨt'a oodak'aɨrã k'orea.

¹¹ Tachia chi Tachi Ak'õre k'orea pedea pi-ia jarateautade, mãɨ ãarea k'awapidaipɨ. Tachi Ak'õre pia bɨpa mãɨ mɨá teasima jaratea bamẽrá.

Tachi Ak'õrepa Pablo k'ĩra chupuriada

¹² Tachi Chipari Jesucristopa mɨ jua chaarea bɨpisima ichi pedea jaratea bamẽrá. Ichia k'awasima mɨa nejõma jĩp'a ooit'a ichi pae. Mãɨpuru mɨ bɨsima ichia k'ɨ̃ria bɨt'a oo bamẽrá. Mãɨ k'orea mɨ sõpia bɨade aruma ichiá.

¹³ Naena mɨa ichi k'orea piawẽa pedea bapachima mãɨnepa ichidirã ẽp'ẽ bapachima mĩapii k'orea. Chĩará k'achia pedea bapachima. Ichide waidi ĩjãawẽa bada pẽra mãɨnepa atua bɨdepa mãɨya piawẽa oo bapachima. Maamina ichia mɨ k'ĩra chupuriasima.

¹⁴ Tachi Chipari Jesucristopa ichi sõpiadepa mɨ minachia k'aripasima ichide ĩjãamẽrá mãɨnepa ichi k'ɨ̃ria uru bamẽrá.

¹⁵ Nãɨ pedea piarã arí bɨ pẽra jõmãɨrãpa ĩjãanai p'anɨma: Jesucristo nãɨ ĩjũanea chesima nemietá oopataɨrã k'aripai k'orea. Mãɨrãnepema, mɨt'u chi atepe k'achia pará basima.

¹⁶ Maamina mãɨ k'orea Tachi Ak'õrepa mɨ k'ĩra chupuriasima. Mãɨya Jesucristopa mɨ, chi k'achia badadepema unupisima ichia ãarea pia choa bɨt'a. Mɨnepa chi wapida ĩjãanak'apɨɨrã́ k'awapisima sãmaasã́ ẽpẽra k'achia k'ĩra chupuriaparit'a ewaricha chok'ae p'aneenamẽrá.

¹⁷ Tachi Ak'õre chi ewaricha jõmãɨrã Chiparipɨ. Ichi chi tachia ununak'aɨ piuk'ama. Ichit'u Tachi Ak'õrepɨ. Ichiá tachia ewaricha pia pedeadai p'anɨma mãɨnepa wap'eadai p'anɨma. Mãɨya beese.

^18-19 Mɨ warra Timoteo, mɨa Tachi Ak'õrepa naena jara peeda pɨ k'orea k'ɨ̃risiarude, pɨa ooi bɨt'a jara peeruma. Mãɨne Cristode ĩjãa bɨdepa mãɨnepa k'ɨ̃risia jĩp'a bɨdepa chi pedea piarã uru base waapẽarã t'ãena, papaká bɨ k'ĩruupari jĩra. Waapẽarãpa k'ɨ̃risia pia uru p'anana itu bɨdak'ari ãchia Cristode ĩjãa p'anɨ itu bɨsidama.

²⁰ Mãɨnepemarã aba Himeneo pasima. Abaɨ Alejandro pasima. Ãchi mɨa tiore juade bɨsima k'awadamẽrá Tachi Ak'õre k'orea waa piawẽa pedeapidaemaapa.