1 Tesalonicense 5 - Tachi Ak'õre Pedea

Tachi Chiparipa ɨtɨai ewari k'orea bɨda

¹ Ũpẽarã, mɨa nãɨ k'art'ade bɨwẽma mãɨ ewari parudea cheit'a,

² mãrapa pia k'awa p'anɨ pẽra Tachi Chiparipa ɨtɨai ewari mãɨya bɨde cheit'a, nechɨaparí teamasi chepari jĩra.

³ Ẽpẽrarãpa nãɨya jara p'ananaipɨ: «Ãarea ne k'ɨ̃risiawẽa p'anɨma, p'eradawẽa p'anɨma». Mãɨya p'anɨne chi jõma jõi ewari cheipɨ wẽra warra t'õyá bi p'ua bɨ jĩra. Mãɨne ãchi mi ãpia pida mĩrunaiwẽma.

⁴ Maamina ũpẽarã, mãra p'ãrione p'anɨwẽma. Mãɨpuru Tachi Chiparipa ɨtɨade cheru ewaride mãra p'eradaiwẽma nechɨaparí cherude p'erapata jĩra.

⁵ Jõma mãra ewari ɨnaanepemapɨ. Tachi teamasi p'ãrionepemawẽma.

⁶ Mãɨpuru tachi k'ãi p'anɨwẽma waapẽarã k'ãi p'anapari jĩra, mãɨpari tau p'it'á p'ananai p'anɨma mãɨnepa k'ĩra jĩp'a p'ananai p'anɨma.

⁷ Chi k'ãi berã teamasi k'ãipatama mãɨnepa chi it'ua to berã teamasi it'ua topatama.

⁸ Mãɨt'u tachi chi ãst'aapema pẽra ẽrea p'ananai p'anɨma. Cristode ĩjãa p'ananai p'anɨma, waapẽarã k'ɨ̃ria p'ananai p'anɨma, mãɨnepa Tachi Ak'õrepa ɨtɨai pada k'aripait'a nɨ p'ananai p'anɨma. Mãɨya ara tachi pia ak'ɨ p'ananai p'anɨma, papaká bɨpa ichi poro ɨ̃rɨ ne chaarea jɨ̃pari jĩra, mãɨnepa k'ak'uade ne chaarea bɨ jɨ̃pari jĩra.

⁹ Tachi Ak'õrepa tachi t'ɨ̃é pasima ɨtɨai k'orea, mãɨpari t'ɨ̃sima Tachi Chipari Jesucristodepa k'aripamẽrá.

¹⁰ Ichi tachi pari piusima. Mãɨpuru tachi chok'ae p'anɨpɨra mãɨyawẽpɨra piudaadapɨra, ichi cherude ichi ome ará chok'ae p'ananaipɨ.

¹¹ Mãɨ k'orea waapẽarã paara sõpia p'anapit'ɨ. Mãɨnepa chi k'aripa p'anat'ɨ pia ĩjãanai k'orea mãrapa oo p'anɨ jĩra.

Pablopa ũpẽarã́ k'aadea jarateada

¹² Mãɨ awara ũpẽarã, taipa chichupuria idi p'anɨma chi ũpẽarãpa mãra t'ãena chi Tachi Ak'õrepa oo bɨt'a oopataɨrã minachia wap'eadamẽrá. Ãchia Tachi Chipari Jesucristodepa mãɨnepa ãchi jua chaareadepa mãra ak'ɨpatama. Mãra sãmaasã́ nipadai p'anɨ jarateapatama.

¹³ Ãchi k'orea pia k'ɨ̃risiat'ɨ. Ãchia oo p'anɨ k'orea minachia k'ɨ̃riat'ɨ. Jõmãɨrã ome pia tuanat'ɨ.

¹⁴ Ũpẽarã, taipa chichupuria idi p'anɨma chi mãra t'ãena k'oa p'anɨa ũraat'ɨ. Ãchi sõne k'ĩra piawẽa berã́ sõpiapit'ɨ mãɨnepa chi ẽpẽerã p'ue choadawẽa berã mãɨnepa chi ɨbɨwẽa berã k'aripat'ɨ. Jõmãɨrã ome choat'ɨ.

¹⁵ ¡Ũrit'ɨ! Abaɨ pida mãra piawẽa oosira ichi jõnea piawẽa oorãt'ɨ. Mãɨpari ewaricha ara machi paara nepia oot'ɨ, mãɨnepa waapẽarã paara pida.

¹⁶ Nejõmane arapá p'anat'ɨ.

¹⁷ Ɨ̃apaadawẽa Tachi Ak'õrea ɨt'aa chiidi p'anat'ɨ.

¹⁸ Nejõma k'orea Tachi Ak'õrea sõpia p'anɨane a p'anat'ɨ. Mãɨt'a Tachi Ak'õrepa k'ɨ̃ria bɨma, mãra Jesucristode ĩjãapataɨrã pẽra.

¹⁹ Tachi Ak'õre Jaorepa oo bɨt'a itu bɨrãt'ɨ.

²⁰ Tachi Ak'õre pari pedeaparipa jara bɨ itu bɨrãt'ɨ.

²¹ Jõma mãɨ jĩrak'aua ũrit'ɨ, maapae aba chi piadepuru ĩjãat'ɨ.

²² Nemietá mi ãpia pida oorãt'ɨ.

²³ Mɨa k'ɨ̃ria bɨma Tachi Ak'õrepa mãra ichi pae ãarea pia p'anapimẽrá. Ichia tachi ne k'ɨ̃risiawẽa p'anapiparima. Mɨa k'ɨ̃ria bɨma Tachi Ak'õrepa mãra jaore, mãra k'ɨ̃risia mãɨnepa mãra k'ak'ua ãarea pia ak'ɨmẽrá. Mãɨya Tachi Chipari Jesucristo cherude, waapẽarãpa mãra mi ãpia pida nemietaade p'anɨane a jaradawẽa p'ananaipɨ.

²⁴ Chi mãra T'ɨ̃napa jõma mãɨya ooipɨ ichia jarada jĩra.

Pablopa k'aadea bɨda

²⁵ Ũpẽarã, tai k'orea Tachi Ak'õrea ɨt'aa chiidit'ɨ.

²⁶ Piarã k'ɨ̃ria p'anɨnepa jõma ũpẽarã́ pia p'anapadade a jarat'ɨ.

²⁷ Mɨa Tachi Chiparidepa jararuma: nãɨ k'art'a ũpẽarã ãarea k'ĩrari eda jarat'ɨ.

²⁸ Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bait'a.