1 Tesalonicense 4 - Tachi Ak'õre Pedea

Sãmaasã́ nipadai p'anɨ Tachi Ak'õrepa pia unumẽrá

¹ Mãɨ awara ũpẽarã, taipa mãrá jarateasidama sãmaasã́ Tachi Ak'õre k'ĩrari nipadai p'anɨ ichia pia unumẽrá. Tachi Chipari Jesú t'ɨ̃ne taipa mãrá chichupuria idi p'anɨma ara mãɨ jĩra nipadamẽrá. Piarã mãrapa mãɨya oomaa p'anɨma, maamina pia oot'ɨ.

² Tachi Chipari Jesudepa taipa jarateadada mãrapa k'awa p'anɨma.

³ Tachi Ak'õrepa k'ɨ̃ria bɨma mãra ichi pae pia p'ananamẽrá. Mãɨpuru mãra k'ak'uapa nemietá ooyá bɨ oorãt'ɨ.

⁴ Mãra k'ak'ua jĩp'a k'awa uru p'anat'ɨ nemietá oopidaemaapa Tachi Ak'õre k'ĩrari mãɨnepa ẽpẽrarã k'ĩrari pia p'ananamẽrá.

⁵ Nãɨ k'ak'uapa nemietá ooyá bɨ oorãt'ɨ Tachi Ak'õrene ĩjãanak'apɨɨrãpa oopata jĩra.

⁶ Mãɨneepuru tachi ũpẽarã nemietá oorãt'ɨ, mãɨnepa mãɨya searãt'ɨ. Jõma makɨɨ Tachi Chiparipa ɨtɨaipɨ taipa mãrá jaradada jĩra.

⁷ Tachi Ak'õrepa tachi jɨrɨ ataé pasima k'achiade p'ananamẽrá, mãɨpari jɨrɨ atasima ichi pae jĩp'a p'ananamẽrá.

⁸ Chi mãɨ mɨa jarateada itu bɨrupa, ẽpẽrapa jarada itu bɨwẽma, mãɨpari Tachi Ak'õrepa jara bɨt'u itu bɨruma. Ara mãɨ Tachi Ak'õrepa ichi Jaore mãrá teasima nemietá newẽa p'ananamẽrá.

⁹ Mãɨ awara mãra sãmaasã́ ũpẽarã ome chi k'ɨ̃ria p'ananai p'anɨ k'orea, mɨa nãɨ k'art'ade ¿k'ãre bɨima? Ara Tachi Ak'õrepa mãrá mãɨ jarateasima.

¹⁰ Mãrapa jõma ũpẽarã Macedonia ĩjũanepema mãɨya k'ɨ̃ria p'anɨma. Maamina ũpẽarã, taipa mãrá chichupuria idi p'anɨma atepe chi k'ɨ̃ria p'ananamẽrá.

¹¹ Mãɨnepa jɨrɨt'ɨ jõmãɨrã paara ne k'ɨ̃risiadawẽa tuananai k'orea. Waapẽarã nepɨrade barirãt'ɨ. Mãra juapa mimiat'ɨ taipa jaradada jĩra.

¹² Mãɨya p'anɨpɨra, mãrapa nɨnaiwẽa p'ananaipɨ awaraɨrãpa mãrá ne teadait'a. Ichiaba Jesude ĩjãanak'apɨɨrãpa mãra pia ununaipɨ.

Jesú mãicha chei k'orea bɨda

¹³ Ũpẽarã, taipa k'ɨ̃ria p'anɨma mãrapa chi Jesude ĩjãapataɨrã piudaadarã k'orea k'awadamẽrá. Mãɨya mãra sõp'ua p'ananaiwẽma Tachi Ak'õrene ĩjãanak'apɨɨrã sõp'ua p'anapata jĩra. Ãchi sõp'ua p'anapatama chi piuda sãmaasã́ bai k'awadawẽ pẽra.

¹⁴ Maamina tachia Jesú piu bada chok'ae p'irabarisit'a ĩjãa p'anɨma. Mãɨpuru k'awa p'anɨma Jesude ĩjãapataɨrã piudaadarã Tachi Ak'õrepa jõma chok'ae p'irabaripik'ari ichi ome ateewãipɨ.

¹⁵ Mãɨ k'orea Tachi Chiparipa jarada taipa mãrá jarautama: Tachi Chipari cherude tachi, chi wapida chok'ae berã chi piudaadarã naa ichimá wãnaiwẽma.

¹⁶ Mãɨ k'aepẽra Tachi Chipari pajãnepa cheipɨ. Tachi Chipari pedearu jĩk'ua ũrinaipɨ mãɨnepa chi Tachi Ak'õrepa ɨt'aripa peeda chi minachia k'awa bɨ pedearu ũrinaipɨ. Ichiaba chi Tachi Ak'õre ãnimara k'achu chaaru jĩk'ua ũrinaipɨ. Mãɨne chi Cristode ĩjãapataɨrã piudaadarã naa chok'ae p'irabaridaipɨ.

¹⁷ Ara mãɨne tachi, chi chok'ae berã, ãchi ome ará ɨt'aa wãnaipɨ Tachi Chipari ome jɨ̃arane chi ununai k'orea. Mãɨya Tachi Chipari ome ewaricha tuananaipɨ.

¹⁸ Mãɨ pedeapa ara machi paara sõpia p'aneepit'ɨ.