1 Tesalonicense 3 - Tachi Ak'õre Pedea

^1-2 Taipa waa p'ue choadaé pasi pẽra tai tuaba Atena p'uurude p'anɨmisa, k'ɨ̃risiasidama tachi ũpẽa Timoteo mãramá peedait'a. Tachi Ak'õre pae mimiaparí Timoteopa tai ome abarik'a pedea pia Cristo k'orea jarateaparima. Ara mãɨne ichi peesidama mãra Cristode pia ĩjãa p'anɨ k'orea tausia p'ananamẽrá,

³ mãɨnepa mãra mĩa p'anɨne ne minachia k'ɨ̃risiapidaemaapa. Mãrapa k'awa p'anɨma Cristode ĩjãa p'anɨ k'orea tachi nepɨra paraadai p'anɨma.

⁴ Mãra ome p'anasidaɨde taipa jarapachidama ẽpẽrarãpa tachi nepɨra paraapidai. Mãrapa k'awa p'anɨma piarã mãɨyasit'a.

⁵ Mãɨ k'orea mɨa waa p'ue choawẽ pẽra Timoteo mãramá peesima wapida Cristode ĩjãa p'anɨ k'awai k'orea. Mɨa k'ɨ̃risia basima tiorepa mãrá Cristo itu bɨpisit'a. Mãɨyanapara taipa mãrá Cristo k'orea jarateadada pari beei pasima.

⁶ Maamina Timoteo mãramá bada taimá chesima. Mãrapa Cristode ĩjãa p'anɨ k'orea mãɨnepa mãra k'ɨ̃ria k'orea ichia pia jarade chesima. Ichia jarasima mãrapa tai k'ɨ̃ria p'anɨane a p'anɨẽra, tai k'ɨ̃risia atuadawẽa p'anɨt'a, ichiaba tai unu k'ɨ̃ria p'anɨt'a taipa mãra unu k'ɨ̃ria p'anɨ jĩra.

⁷ Mãɨpa ũpẽarã, taipa k'awasidama mãrapa Jesude wapida ĩjãa p'anɨ. Mãɨpuru tai minachia mĩa p'anɨmina sõpiasidama.

⁸ Jãapae tai piarã sõpia p'aneesidama, k'awa p'anɨ pẽra mãrapa Tachi Chiparide choa p'anɨt'a.

⁹ ¿Sãmaasã́ jaradaima, tai sõ arapá p'anɨt'a Tachi Ak'õre ome, mãra k'orea?

¹⁰ Ãst'á mãɨnepa teamasi taipa Tachi Ak'õrea ɨt'aa chiidipatama mãra ak'ɨde wãnai k'orea. Mãɨya mãrapa Cristo k'orea waidi atua p'anɨ, taipa p'ue jarateadaipɨ jõma atepe ĩjãanamẽrá.

¹¹ Taipa Tachi Ak'õrea mãɨnepa Tachi Chipari Jesua ɨt'aa chiidi p'anɨma tai mãramá mãicha wãpidamẽrá.

¹² Taipa k'ɨ̃ria p'anɨma Tachi Chiparipa mãra k'aripa bai jõmãɨrã ome minachia chi k'ɨ̃ria p'ananamẽrá taipa mãra minachia k'ɨ̃ria p'anɨ jĩra.

¹³ Mãɨnepa ɨt'aa chiidi p'anɨma Cristopa mãra k'aripak'ari, sõnepa minachia ĩjãanamẽrá. Mãɨya Tachi Chipari Jesú jõma ichidirã ome cherude mãra Tachi Ak'õre, tachi Pajãnepema Ak'õre taade nemietá newẽa p'ananaipɨ.