1 Tesalonicense 2 - Tachi Ak'õre Pedea

Pablopa Tesalónica p'uurude ooda

¹ Ũpẽarã, mãrapa k'awa p'anɨma tai mãramá wã p'anasidaɨde tai pari wãnaé pasima.

² K'awa p'anɨma mãramá wãnai naena P'ilipodepemarãpa tai k'orea k'achia pedeasidaɨt'a mãɨnepa piawẽa oosidaɨt'a. Mãɨ awara mãramá chesidaɨde chok'araɨrãpa k'ɨ̃rianaé pasima taipa jaratea p'anɨt'a. Maamina Tachi Ak'õrepa sõpiapisima ichi pedea pia mãrá ne wap'eawẽa jarateadamẽrá.

³ Taipa mãrá mãɨya k'ɨ̃risiapidaé pasima piarãpẽawẽne jarateadada ĩjãanamẽrá. Mãɨnepa seadawẽa p'anasima mãra seadai k'orea.

⁴ Mãɨpari Tachi Ak'õrepa pia ununa pẽra tai bɨsima ichi pedea pia jarateadamẽrá. Mãɨpuru taipa jarateautade, mãɨyanak'ama chi ẽpẽrarãpa tai ak'ɨdak'ari, k'ɨ̃rianamẽrá. Aba jarateapatama tai Tachi Ak'õre ome pia p'ananamẽrá. Ichia k'awa bɨma tachi sõnepa k'ɨ̃risiapataɨt'a.

⁵ Mãrapa k'awa p'anɨma taipa seadepa mãra ẽpẽerã piade adaé pasima. Mãɨnepa erreara jɨrɨdayá seadepa jarateadaé pasima. Mãɨ Tachi Ak'õrepa k'awa bɨma.

⁶ Taipa jɨrɨdaé pasima mãrapa, waapẽarã pida tai k'orea pia jaradamẽrá. Mãɨ awara tai Cristopa peedaɨrã pẽra tai jua chaareadepa p'ananai p'anasima mãra t'ãena. Maamina mãɨya oodaé pasima.

⁷ Mãɨpari k'ɨ̃ria p'anɨnepa taipa mãra k'aripa p'anasidama chi naepa chi warra chak'erã ak'ɨpari jĩra.

⁸ Taipa mãra minachia k'ɨ̃ria p'anɨ pẽra abapuru chi pedea pia Tachi Ak'õre k'orea mãrá jarateadaé pasima, mãɨpari ne ãareanepa k'aripadai k'orea p'anasidama.

⁹ Ũpẽarã, mãrapa k'awa p'anɨma ãst'á mãɨnepa teamasi pida ɨ̃apaadawẽa mimiapachidama erreara ununai k'orea. Taipa pedea pia Tachi Ak'õre k'orea mãrá jaratea p'anasidaɨde k'ɨ̃rianaé pasima mãrapa taiyá ne teadait'a mãra pae chaarea bɨpidaemaapa.

¹⁰ Mãrapa k'awa p'anɨma, Tachi Ak'õre pida k'awa bɨma tai mãra chi Cristode ĩjãapataɨrã t'ãena pia, jĩp'a mãɨnepa nepɨra pará bɨade adawẽa nipasidama.

¹¹ Mãɨ awara k'awa p'anɨma ak'õrepa ara ichi warrarã ome oopari jĩra taipa machicha mãɨya oo p'anasidama.

¹² Taipa minachia ũraasidama mãra Tachi Ak'õrepa k'ɨ̃ria bɨ jĩra nipadamẽrá. Ichia mãra t'ɨ̃sima ichi juade ua bai k'orea mãɨnepa ichi pia bɨdepema uru p'ananamẽrá.

¹³ Taipa ewaricha mãra k'orea Tachi Ak'õrea sõpia p'anɨane apatama. Taipa Tachi Ak'õre pedea jarateadada mãrapa ũrisidaɨde, ẽpẽrarãpa k'ɨ̃risia p'anɨ jĩra ĩjãanaé pasima. Mãɨpari mãɨ pedea piarã Tachi Ak'õre pedeat'a k'awadada pẽra ĩjãasidama. Ara mãɨ pedeapa mãra chi Cristode ĩjãapataɨrã́ pia oopi bɨma.

¹⁴ Ũpẽarã, mãrapa ĩjãa p'anɨ k'orea ara machi tuadepemarãpa mãra piawẽa oo p'anasidama ẽpẽrarã Tachi Ak'õrenepemarã judiorã tuade mãɨyana jĩra. Mãma Jesucristode ĩjãapataɨrã judiorã chi ĩjãanak'apɨɨrãpa piawẽa oo p'anasidama.

¹⁵ Ara ãchi mãɨrãpa Tachi Chipari Jesú mãɨnepa Tachi Ak'õre pari pedeapataɨrã peasidama. Mãɨ awara tai ãyá jeret'aasidama. Ãchi Tachi Ak'õrepa pia unuk'ama. Ãchi jõmãɨrã ome chi nek'ĩramaapɨ.

¹⁶ Taipa jarateadai p'anɨne judiorãwẽmá Tachi Ak'õrepa k'aripamẽrá, ãchia itu jarateapidaemaa p'anasidama. Mãɨya nemietá atepe oo p'anɨ pẽra Tachi Ak'õrepa ichi k'ĩruu bɨdepa ãchi minachia ɨtɨaipɨ.

Pablo Tesalonicadepema ũpẽarã ak'ɨde wã k'ɨ̃ria bada

^17-18 Ũpẽarã, tãaraawẽa bɨma tai mãra ome p'anana ãyá wãnana. Ara nãɨena taipa mãra ununawẽa p'anɨmina k'ɨ̃risiadepa mãra ome p'anɨma. Taipa piarã mãra ak'ɨde wã k'ɨ̃ria p'anasidama maamina tiorepa itu peek'aemaa bɨ jĩra basima. Mɨ piarã mãramá wãyá oo bapachima.

¹⁹ Piarã tai mãra k'orea arapá p'anɨma. Mãɨ awara k'awa p'anɨma Tachi Chipari Jesucristo cherude taipa mãra jĩp'a p'anɨt'a ichiá unupidaipɨ. Mãɨne ichi k'ĩrari mãra k'orea tai sõpia p'ananaipɨ.

²⁰ Piarã mãra k'orea pia pedea k'ɨ̃ria p'anɨma awaraɨrã́, mãɨnepa mãra k'orea tai sõpia p'anɨma.