1 Pedro 5 - Tachi Ak'õre Pedea

Pedropa ũpẽarã ak'ɨpataɨrã́ jarada

¹ Mãra ũpẽarã ak'ɨpataɨrã́ mɨa chichupuria idiruma, mɨ sida ũpẽarã ak'ɨparí pẽra. Cristo minachia mĩana mɨa unusima. Mãɨnepa Tachi Ak'õrepa Cristo chi atepe bɨ unupirude mɨ sida ichi ome baipɨ. Mãɨpuru nãɨya chichupuria idiruma:

² Tachi Ak'õrepa ũpẽarã mãra juade bɨda minachia ak'ɨt'ɨ. Mãɨya oorãt'ɨ waapẽarãpa mĩesa oopi p'anɨ pẽra. Mãɨpari ak'ɨ k'ɨ̃ria p'anɨ pẽra mãɨya oot'ɨ. Erreara awaa p'anɨnepa mãɨ oorãt'ɨ, mãɨpari sõnepa ak'ɨ k'ɨ̃ria p'anɨ pẽra mãɨya oot'ɨ.

³ Chi mãrapa ak'ɨ p'anɨrã, machi pae pari mimiapataɨrã jĩra uru p'anarãt'ɨ, mãɨpari machi nipautadepa unupit'ɨ sãmaasã́ nipadai p'anɨ.

⁴ Maapae Cristo tachi Ak'ɨparí chi Atepe bɨ cherude mãra chi atepe k'awa p'anɨrã bɨipɨ poro jũra jɨ̃parí jõk'apɨ́ tearu jĩra.

⁵ K'ũtãarã, chõarãpa jarauta oot'ɨ. Jõmãɨrã chi k'aripa p'ananai p'anɨma waapẽarã k'aepẽra chi atepe bɨ k'ɨ̃risiadawẽa. Tachi Ak'õre pedeade nãɨya bɨ bɨma: «Chi waapẽarã k'aepẽra chi ãchi k'ak'ua atepe k'ɨ̃riapataɨrã Tachi Ak'õrepa itu pia p'anapik'ama. Maamina chi atepe k'ɨ̃risiawẽa be Tachi Ak'õrepa ichi sõpiadepa k'aripaparima».

⁶ Mãɨpuru Tachi Ak'õre juade p'anat'ɨ, chi nejõma p'ue oo bɨ Ichi k'ĩrari chi atepe jĩra p'anapidaemaapa. Mãɨya ichia bɨi ewaride mãra chi atepe p'anɨ jĩra bɨipɨ.

⁷ Mãrapa minachia k'ɨ̃risia p'anɨ k'orea Tachi Ak'õrea ãarea jarat'ɨ, ichia mãra ak'ɨ bɨ pẽra.

⁸ Jĩrak'aua p'anat'ɨ mãɨnepa ẽrea p'anat'ɨ. Tiore mãra ome chi nek'ĩramá imama jĩra ɨrrɨa p'ɨrrɨa bɨma, k'aiyá Tachi Ak'õre p'ue itu bɨpii k'awayá.

⁹ Maamina tiore jua choat'ɨ. Cristode minachia ĩjãa p'anat'ɨ, k'awa p'anɨ pẽra mãra ũpẽarã jõma tuacha berã abarik'a minachia mĩa p'anɨt'a.

¹⁰ Mãra tãaraa mĩanak'ari Tachi Ak'õrepa ne ãareaɨne pia bɨipɨ. Ichia mãra k'aripaipɨ pia ĩjãanamẽrá, jõma choadamẽrá mãɨnepa chaarea p'ananamẽrá. Tachi Ak'õrepa ichi sõpiadepa ne ãareaɨne k'aripaparima. Ichia mãra Jesucristodepa t'ɨ̃sima ichi ome ewaricha chi atepe p'ananamẽrá.

¹¹ Pia bɨma ewaricha nejõma ichi juade uru bait'a. Mãɨya beese.

Pedropa nãɨ k'art'ade k'aadea bɨda

¹² Ũpẽa Silvanopa nãɨ k'art'a chak'e k'aripa bɨsima. Mɨa k'awa bɨma ara ichia jara bɨ jĩra nejõma ooparit'a. Nãɨ k'art'adepa mɨa mãra k'aripa k'ɨ̃ria bɨma pia ĩjãanamẽrá. Mãɨnepa k'awapii k'ɨ̃ria bɨma piarã Tachi Ak'õrepa ichi sõpiadepa k'aripa bɨt'a. Mãɨ ĩjãa p'anat'ɨ.

¹³ Ũpẽarã Babilonianepemarãpa mãrá pia p'anapade a jara peeutama. Mãra jɨrɨ atada jĩra ãchi sida Tachi Ak'õrepa jɨrɨ atasima. Mɨ warra jĩra bɨ Marco pida pia p'anapade a jara peeruma.

¹⁴ K'ɨ̃ria p'anɨnepa, ara machi paara jua jitadak'ari, pia pedeat'ɨ. Mɨa k'ɨ̃ria bɨma mãra ãarea, Jesucristo ome berã ne k'ɨ̃risiadawẽa p'ananait'a.