1 Pedro 4 - Tachi Ak'õre Pedea

Cristo nipada jĩra nipat'ɨ

¹ Cristo nãɨ k'ak'uade minachia mĩana pẽra mãra pida abarik'a k'ɨ̃risia uru p'anat'ɨ. Chi ẽpẽra ichi k'ak'uade minachia mĩa badapa nemietá itu bɨsima.

² Mãɨ ẽpẽrapa wapida nãɨ ĩjũane bɨde nãɨ k'ak'uapa nemietá oo k'ɨ̃ria bɨt'a oo baiwẽma, mãɨpari Tachi Ak'õrepa k'ɨ̃ria bɨt'a oo baipɨ.

³ Naena mãrapa nemietá oo p'anapachidama, chi Tachi Ak'õrene ĩjãanak'apɨɨrãpa oopata jĩra. ¡Waa mãɨya oorãt'ɨ! Waapẽarã taade ne k'ĩra p'era oo oopachidama, nãɨ k'ak'uapa nemietá oo k'ɨ̃ria bɨ oopachidama, piu nipapachidama, arapá oopataɨde minachia nemietá oopachidama, waapẽarã paara it'ua minachia topachidama mãɨnepa tachi juapa oodada sãdo k'ɨ̃riapachidama. Mãɨ Tachi Ak'õrepa k'ɨ̃riak'ama.

⁴ Naapae mãrapa waa chi Tachi Ak'õrene ĩjãanak'apɨɨrã ome nemietá oodak'a pẽra, ãchia k'awa k'ɨ̃risiadak'ama. Mãɨ k'orea mãra k'orea piawẽa pedeapatama.

⁵ Maamina Tachi Ak'õrepa ãchi nepɨra ak'ɨrude ãchia oodada ichiá ãarea mãɨya jaradaipɨ. Ichia chi chok'ae berã mãɨnepa piudaadarã nepɨra ak'ɨi k'orea bɨma.

⁶ Mãɨpuru piudaadarãpa chi pedea pia Cristo k'orea ũrisidama ãchi jaore chok'ae p'ananamẽrá, Tachi Ak'õre chok'ae bɨ jĩra. Maamina ãchi nãɨ k'ak'uade piusidama, Tachi Ak'õrepa jõmãɨrã piudai p'anɨane ada pẽra.

⁷ Tãaraawẽane nejõma jõipɨ. Mãɨpuru jĩp'a k'ɨ̃risia p'anat'ɨ mãɨnepa jĩrak'aua p'anat'ɨ. Mãɨya Tachi Ak'õrea p'ue ɨt'aa chiididaipɨ.

⁸ Minachia chi k'ɨ̃ria p'anat'ɨ. Mãɨ ne ãareanepema k'aepẽra piipará bɨma. Chi waapẽarã k'ɨ̃ria uru bɨpa ãchia nemietá minachia oodada k'ɨ̃risia atuaparima.

⁹ Chi mãra tiida cheutarã́ k'achia k'ɨ̃risiadawẽa pia pedeat'ɨ.

¹⁰ Tachi Ak'õrepa ichi sõpiadepa tachicha Ichi Jaorepa oopi bɨ teasima, waapẽarã k'aripadamẽrá. Tachi Ak'õre pae pari mimiapataɨrã piarã pẽra ichia machicha teadadepa waapẽarã k'aripat'ɨ.

¹¹ Abaɨpa ne jarateaipɨra, Tachi Ak'õre pedea jaratea bɨ pẽra jĩrak'aua jarateai bɨma. Abaɨpa waapẽarã k'aripaipɨra, Tachi Ak'õre jua chaareadepa k'aripai bɨma. Nejõma oot'ɨ jõmãɨrãpa Jesucristodepa Tachi Ak'õrea pia pedeadamẽrá. Ichiaapuru ewaricha pia pedeadai p'anɨma. Pia bɨma nejõma ichi juade uru bait'a. Minachia pia bɨma mãɨya bait'a.

Cristode ĩjãa bɨ k'orea mĩanai k'orea bɨda

¹² Ũpẽarã, mãra minachia mĩa p'anɨ k'orea minachia k'ɨ̃risia p'aneerãt'ɨ. Mãɨya p'anɨma Cristode minachia ĩjãanai k'orea. Mãɨpuru minachia mĩanaiwẽa p'anɨ k'ɨ̃risiarãt'ɨ.

¹³ Mãɨpari Cristo jĩra minachia mĩa p'anɨ pẽra arapá p'anat'ɨ. Mãɨya Tachi Ak'õrepa Cristo chi atepe bɨ unupirude mãra minachia arapaadaipɨ.

¹⁴ Waapẽarãpa mãra Cristode ĩjãa p'anɨ k'orea k'achia pedeadaipɨra, Tachi Ak'õre k'ĩrari minachia pia p'anɨma. Tachi Ak'õre Jaore k'ĩrawãrea bɨt'a mãra ome bɨma.

¹⁵ Mãra minachia mĩanaimina, nãɨnepa mĩanai pia bɨwẽma: mĩa peada k'orea, nechɨada k'orea, nemietá ooda k'orea wa waapẽarã nepɨrade bada k'orea.

¹⁶ Maamina abaɨpa Cristode ĩjãa bɨ k'orea minachia mĩarupɨra, p'eraiwẽa bɨma. Mãɨpari Cristode pẽra Tachi Ak'õrea pia pedeai bɨma.

¹⁷ Naapae Tachi Ak'õrepa ichidirã ne nepɨra ak'ɨipɨ. Tachi Ak'õrepa tachi nepɨra naa ak'ɨipɨra, ¿chi pedea pia Tachi Ak'õre k'orea ĩjãanak'apɨɨrã sãmaasã́ p'ananaima?

¹⁸ «Chi ẽpẽra jĩp'a bɨt'a k'aripai k'orea chaarea bɨpɨra, ¿chi Tachi Ak'õre itu bɨk'ari nemietá ooparí sãmaasã́ k'aripaima?»

¹⁹ Mãɨ k'orea Tachi Ak'õrepa k'ɨ̃ria bɨ jĩra minachia mĩa p'anɨpa ara ãchi ichi juade bɨdak'ari nepia oodai p'anɨma. Tachi Oodade ĩjãanai p'anɨma, ichia jara bɨ jĩra oopari pẽra.