1 Pedro 3 - Tachi Ak'õre Pedea

K'ima pará be sãmaasã́ p'ananai k'orea

^1-2 Mãra wẽra k'ima pará berã, mãra k'ima pedea ũrit'ɨ. Mãɨya chi eda wẽerã k'imanepemarãpa Tachi Ak'õre pedea ĩjãanawẽa p'anɨmina mãra jĩp'a be mãɨnepa Tachi Ak'õre wap'ea be ununak'ari ĩjãanaipɨ. Mãrapa ãchiá ĩjãanamẽrá jaradawẽmina, pia oo p'anɨ k'orea ĩjãapidaipɨ.

³ Mãra mip'it'á ɨ̃rɨpemawapuru baiwẽa bɨma; puda atepe k'ak'apia baiwẽa bɨma, k'ak'apia nee ooda jɨ̃ bɨdepa baiwẽa bɨma, p'aru atepe pia bɨ jɨ̃ bɨdepa baiwẽa bɨma.

⁴ Mãɨpari mãra sõnepuru mip'it'á bai bɨma; sõpiadepa mãɨnepa ne k'ɨ̃risiawẽa bɨdepa bai bɨma. Mãɨ mip'it'á jõk'ama mãɨnepa Tachi Ak'õrepa pia unu bɨma.

⁵ Ara mãɨ jĩra chõarãenapema wẽrarã Tachi Ak'õre pae beada mip'it'á p'anasima. Tachi Ak'õrepa ooi jarada ãchia sõnepa piarã ĩjãa p'anapachidama mãɨnepa ãchi k'ima pedea ũripachidama.

⁶ Sarapa Abrahán pedea ũripachima mãɨnepa «mɨ chipariade» apachima. Ne wap'eawẽa mãrapa nejõma pia oo p'ananaipɨra, Sara k'au jĩra p'ananaipɨ.

⁷ Ɨmɨk'ĩrarã k'ima pará berã, k'ɨ̃risia piadepa mãra k'ima ome pia p'anat'ɨ. Mãra k'ima pia bapii k'ɨ̃ria p'anɨnepa ãchi pia ak'ɨt'ɨ, wẽra ɨmɨk'ĩra k'aepẽra ɨbɨwẽa bɨ pẽra mãɨnepa mãra ome ará p'anɨrã́ Tachi Ak'õrepa, ichi sõpiadepa chok'ae p'ananait'a pari teada pẽra. Mãɨya oodaepɨra, mãrapa ɨt'aa chiidiutat'a Tachi Ak'õrepa pia ũriwẽma.

Pia oo p'anɨnepa nepɨrade p'aneenai k'orea

⁸ Mãɨ awara ũpẽarã, abarik'a k'ɨ̃risiadepa jõma mãra ará pia tuanat'ɨ. Waapẽarã k'aripai k'ɨ̃risiadepa p'anat'ɨ. Ũpẽarã pẽra chi k'ɨ̃riat'ɨ. Chi k'ĩra chupuriat'ɨ mãɨnepa waapẽarã k'aepẽra atepe bɨ jĩra k'ɨ̃risiarãt'ɨ.

⁹ Abaɨ pida mãra piawẽa oosira ara mãɨya oorãt'ɨ. K'achia pedeasira ara mãɨya k'achia pedearãt'ɨ. Mãɨpari ɨt'aa chiidit'ɨ Tachi Ak'õrepa ichi k'aripamẽrá. K'awa p'anɨma Tachi Ak'õrepa mãra atasit'a, mãɨya p'ananamẽrá. Mãɨya p'ananaipɨra, Tachi Ak'õrepa mãra sida k'aripaipɨ.

¹⁰ «Tachi Ak'õre pedeade nãɨya bɨ bɨma: Paritua arapá ba k'ɨ̃ria bɨpɨra, k'achia pedea amaak'ari ichi k'ĩrame ak'ɨi bɨma. Tãaraa pia ba k'ɨ̃ria bɨpɨra, sea amaak'ari ichi it'ae ak'ɨi bɨma.

¹¹ Ichia nejõma nemietá itu bɨk'ari pia oo bai bɨma. Waapẽarã ome ne k'ɨ̃risiawẽa bai k'orea jɨrɨk'ari mãɨya bai bɨma.

¹² Tachi Chiparipa ẽpẽra jĩp'a be ak'ɨ bɨma. Ãchia ɨt'aa chiidiuta pia ũri bɨma. Maamina ichimá, chi nemietá oopataɨrã pia p'anɨwẽma».

¹³ Mãrapa pia oo p'ananaipɨra, ¿k'aipa mãra piawẽa ooima?

¹⁴ Maamina mãrapa pia oo p'anɨ k'orea minachia mĩanaipɨra, Tachi Ak'õre k'ĩrari minachia pia p'aneenaipɨ. Mãɨpuru chi mãra piawẽa oouta wap'earãt'ɨ. Minachia k'ɨ̃risiarãt'ɨ.

¹⁵ Cristo mãra Chipari pẽra sõnepa ichit'a wap'eat'ɨ. Chi Cristodepa ne atadai nɨ p'anɨ k'orea pia pedeadayá p'anat'ɨ. Mãɨya abaɨpa idisira, p'ue k'ĩruu pedeadawẽa pia p'anoonaipɨ.

¹⁶ Ara machi tuaba k'awa p'anat'ɨ nemietá oodawẽa p'anɨt'a. Mãɨya mãra Cristodepa pia nipada k'orea chi piawẽa pedeapataɨrã p'eradaipɨ.

¹⁷ Tachi Ak'õrepa mãra nepɨrade baepiipɨra, pia bɨma pia oo p'anɨ k'orea minachia mĩanai, mãɨ piawẽa oo p'anɨ k'orea minachia mĩanai k'aepẽra.

¹⁸ Cristo jĩp'a bɨmina nemietá k'orea bari k'ak'o aba mĩasima. Mãɨpa tachi chi jĩp'a bewẽ Tachi Ak'õre ome pia bɨsima. Ichi nãɨ k'ak'ua piusima, maamina Tachi Ak'õre Jaoredepa chok'ae p'irabarisima.

¹⁹ Mãɨnepa Tachi Ak'õre Jaoredepa chi jaore eda jɨ̃a nɨbɨ berãmá wãsima. Wãk'ari jarasima jõma nemietá p'uesit'a.

²⁰ Mãɨrã jaorepa Noé ewaride Tachi Ak'õre pedea ĩjãanaé pasima. Mãɨne Noepa p'ãp'orro nepalá oo bɨmisa Tachi Ak'õrepa jõma choa bɨdepa nɨ basima ãchia ĩjãanamẽrá. Maamina ẽpẽra chok'araawẽa to minachia cheside k'aripasima. Pia jaradaipɨra, ocho k'aripasima.

²¹ Mãɨ to minachia che bɨt'a idiapae tachi porochoapataɨ k'orea jara bɨma. Porochoautade Jesucristo chok'ae p'irabaridadepa tachi k'aripa bɨma. Porochoarupa tachi k'ak'ua nemietá sɨɨk'ama mãɨpari mãɨya oopatama, tachi k'ɨ̃risia jĩp'a bɨdepa, piarã Tachi Ak'õre ome nipadai k'ɨ̃ria p'anɨ pẽra.

²² Mãɨ Jesucristo chok'ae p'irabarik'ari, pajãnea wãk'ari Tachi Ak'õre juaraari bɨma. Jõma Tachi Ak'õrepa ɨt'aripa peedarã, jõma jaore mietaarã chi atepe k'awa p'anɨrã, chi jua chaarea berã sida ichi juade uru bɨma.