1 Pedro 2 - Tachi Ak'õre Pedea

¹ Mãɨpuru waapẽarã piawẽa oodai itu bɨt'ɨ. Waapẽarã searãt'ɨ. Waapẽarãpa ara ãchia jarapataɨ jĩra oodak'ama. Mãɨ ẽpẽrarã jĩra p'anarãt'ɨ. Abaɨpa uru bɨ k'orea piawẽa k'ɨ̃risiarãt'ɨ. Waapẽarã k'orea k'achia pedearãt'ɨ.

^2-3 Tachi Chiparipa piadepa mãra k'aripaparit'a k'awasidama. Mãɨpuru warra chak'e chiwidi t'õnapa juto k'ɨ̃ria bapari jĩra, Tachi Ak'õre pedea pia k'awa k'ɨ̃riat'ɨ. Ichi pedea jubaara jĩra bɨma. Mãɨ chi pedea k'awa p'ananaipɨra, waridaipɨ ichia mãra k'ariparudea.

Tachi Ak'õrepa jɨrɨ atada ẽpẽerã

⁴ Tachi Chipari Jesucristomá chet'ɨ. Ichi chok'ae bɨma mãɨnepa mawara te oopataɨ jĩra bɨma. Ẽpẽrarãpa ichi itu bɨsidama, maamina Tachi Ak'õrepa mãɨ mawara pia, neepɨa k'ɨrɨt'a jɨrɨ atasima.

⁵ Mãra ichidepa chok'ae p'anɨ pẽra mawara te oopataɨ jĩra p'anɨma. Mãranepa Tachi Ak'õrepa ichi te ooruma. Mãɨnepa mãra p'aarerã ichi pae papi bɨma. Mãrapa Jesucristodepa Tachi Ak'õre pae ne oo p'anɨne, ichiá ãnimara paateauta jĩra oo p'anɨma. Mãɨya oo p'anɨt'a ichia pia unu bɨma.

⁶ Tachi Ak'õre pedeade Jesucristo k'orea nãɨya bɨ bɨma: «Ũrit'ɨ, Sión p'uurude mɨa mawara te oopataɨ chi piipará bɨt'a bɨruma. Mãɨ mawara pia, neepɨa k'ɨrɨt'a mɨa atasima. Mãɨpuru chi ichide ĩjãa bɨpa pari ĩjãa bɨwẽma».

⁷ Mãra chi Cristode ĩjãapataɨrãmá, ichi minachia pia bɨma. Maamina chi ichi ĩjãanak'apɨɨrã k'orea Tachi Ak'õre pedeade nãɨya bɨ bɨma: «Chi te oopataɨrãpa mawara amaanana pada, mãɨ mawara chi atepe piipará beesima».

⁸ Mãɨnepa nãɨya bɨ bɨma: «Mãɨ mawaramá ẽpẽrarã t'enabaridak'ari baedaipɨ». Ãchia Tachi Ak'õre pedea ĩjãanawẽa p'anɨ pẽra mawaramá t'enabariuta jĩra p'anɨma. Tachi Ak'õrepa ãchi bɨsima mãɨya p'ananamẽrá.

⁹ Maamina mãra Tachi Ak'õrepa jɨrɨ atadaɨrãpɨ, Tachi Chipari p'aarerãpɨ, ichi pae bɨda ẽpẽrarãpɨ mãɨnepa ichi p'uurupɨ. Mãɨya Tachi Ak'õrepa ne minachia pia ooda k'orea mãrapa pedeapatama. Tachi Ak'õrepa mãra p'ãrionepema t'ɨ̃sima ichi ɨnaa minachia pia bɨde p'ananamẽrá.

¹⁰ Naena mãra Tachi Ak'õre p'uuruwẽ pasima, maamina naapae Tachi Ak'õre p'uurupɨ. Naena Tachi Ak'õrepa mãra k'ĩra chupuriawẽa basima, maamina naapae k'ĩra chupuria bɨma.

Chi ĩjãanak'apɨɨrã t'ãena jĩp'a p'anat'ɨ

¹¹ Mɨ ũpẽarã, nãɨ ĩjũane mãra tua awaraɨdepemarãpɨ. Mãɨpuru mɨa mãrá chichupuria idiruma nãɨ k'ak'uapa nemietá oo k'ɨ̃ria bɨt'a itu bɨdamẽrá. Mãɨ ara tachi ome chõo bɨma.

¹² Tachi Ak'õrene ĩjãanak'apɨɨrã t'ãena jĩp'a nipat'ɨ. Mãɨya ãchia mãra nemietá oopataade a p'anɨmina, mãrapa pia oo p'anɨt'a unu p'anɨma. Maapae Tachi Ak'õre cherude mãra k'orea ichiá pia pedeadaipɨ.

¹³ Tachi Chipari Jesucristo k'orea jõma nãɨ ĩjũanepema minachia berã pedea ĩjãat'ɨ. Nãɨ tuadepema minachia k'awa bɨpa jararu ĩjãat'ɨ ichi chi atepe bɨ pẽra.

¹⁴ Chi p'uurudepemarã ak'ɨpataɨrãpa jarauta sida ĩjãat'ɨ. Chi minachia k'awa bɨpa ãchi bɨsima nemietá oopataɨrã ɨtɨadamẽrá mãɨnepa pia oopataɨrã k'orea pia jaradamẽrá.

¹⁵ Tachi Ak'õrepa k'ɨ̃ria bɨma mãrapa pia oo p'ananait'a. Mãɨya mãrapa chi pia k'ɨ̃risiawẽa berã k'ĩup'eapidaipɨ, atua p'anɨnepa mãra k'orea k'achia pedeapataɨ pẽra.

¹⁶ Mãra jɨ̃ uru p'anana jĩra bɨdepema Cristopa k'ẽet'aasi pẽra, mãɨya nipat'ɨ. Maamina mãɨya ãjã́ pari p'anɨ pẽra k'ɨ̃risiarãt'ɨ nemietá oodai k'orea. Mãɨpari Tachi Ak'õre pae pari mimiapataɨrã jĩra p'anat'ɨ.

¹⁷ Jõmãɨrã wap'eat'ɨ. Ũpẽarã minachia k'ɨ̃riat'ɨ. Tachi Ak'õre wap'eat'ɨ. Nãɨ ĩjũanepema chi minachia k'awa bɨ wap'eat'ɨ.

¹⁸ Chi chipari pae pari mimiapataɨrã, mãra chipari wap'ea p'anat'ɨ. Ãchia jarauta oot'ɨ. Abapuru mãra chipari chi pia p'anɨrã mãɨnepa k'ĩra chupuriapataɨrã ome mãɨya p'anarãt'ɨ, mãɨpari chi k'achia p'anɨrã ome pida mãɨya p'anat'ɨ.

¹⁹ Edaɨde nepia oo bɨ k'orea tachi minachia mĩapatama. Maamina Tachi Ak'õrepa tachi mĩa p'anɨt'a k'awa bɨma. Tachia mãɨne k'ɨ̃risiadak'ari, mãɨ jõma choadaipɨra, Ichia pia unuipɨ.

²⁰ Mãrapa nemietá oo p'anɨ k'orea chi chiparipa mãra ɨtɨaipɨra, mãrapa choautamina ¿k'aipa mãra k'orea pia pedeaima? Maamina pia oo p'anɨ k'orea nepɨrade p'anɨne choadaipɨra, Tachi Ak'õrepa pia unuipɨ.

²¹ Cristo mãra k'orea minachia mĩana pẽra Tachi Ak'õrepa mãra t'ɨ̃sima mĩanamẽrá. Cristo mĩaside unupisima mãra nepɨra paraautade sãmaasã́ nipadai p'anɨt'a.

²² Cristopa nemietá ook'a pasima mãɨnepa sea jarak'a pasima.

²³ Ẽpẽrarãpa ichiá k'achia pedeasidaɨde ãchiá k'achia pedeaé pasima. Ichi piawẽa oosidaɨde ichia jõnea piawẽa ooyade a jaraé pasima. Mãɨpari Tachi Ak'õrepa jĩp'a nepɨra ak'ɨpari pẽra ichi piawẽa oo p'anɨt'a Tachi Ak'õre juade bɨpachima.

²⁴ Cristopa tachi nemietá ichi ɨ̃rɨ k'urusude ateewãsima tachi nemietaadepema piudak'ari jĩp'a p'ananamẽrá. Ichi k'ak'ua p'uak'oa p'anasidaɨdepa mãra jɨpa p'aneesidama.

²⁵ Mãra naena oveja atua nipada jĩra nipapachidama, maamina naapae Cristomá jĩitea chesidama. Ichia mãra ak'ɨ bɨma oveja ak'ɨparipa ichi oveja ak'ɨpari jĩra.