1 Pedro 1 - Tachi Ak'õre Pedea

Pedropa nãɨ k'art'ade naa bɨda

¹ Mɨ Pedro, Jesucristopa peedapɨ. Mɨa nãɨ k'art'a bɨruma Tachi Ak'õrepa jɨrɨ atadaɨrã Ponto tuade, Galacia tuade, Capadocia tuade, Asia tuade, Bitinia tuade mãɨnepa chi tua awaraɨrãnepa chedak'ari p'anɨrã pae.

² Tachi Pajãnepema Ak'õrepa mãra jɨrɨ atasima ichia naenaena k'ɨ̃risia bada jĩra. Tachi Ak'õre Jaorepa mãra ichi pae bɨsima Jesucristode ĩjãanamẽrá mãɨnepa ichi oadepa Tachi Ak'õre k'ĩrari nemietá newẽa p'ananamẽrá. Mɨa k'ɨ̃ria bɨma Tachi Ak'õrepa ichi sõpiadepa mãra k'aripa bait'a mãɨnepa ne k'ɨ̃risiawẽa bapiit'a.

Pedropa Tachi Ak'õrea pia pedeada

³ Tachi Chipari Jesucristo, Pajãnepema Ak'õrea pia pedeadai p'anɨma. Ichia tachi minachia k'ĩra chupuriada pẽra Jesucristo piu bada chok'ae p'irabaridadepa tachi chok'ae chiwidi jĩra p'aneepisima. Mãɨpuru piarã k'awa p'anɨma

⁴ ichia tachi pae pajãne uru bɨt'a jõma jitadaipɨ. Mãɨ ãrik'ama, jõk'ama, mãɨnepa nemietaawẽma.

⁵ Jesucristode ĩjãa p'anɨ pẽra Tachi Ak'õrepa ichi jua chaareadepa mãra ak'ɨ uru baipɨ aba chi k'aadeapema ewaride k'ariparudea.

⁶ Mãɨ k'orea minachia arapá p'anɨma. Ara nãɨena ne wawariadepa mãra minachia mĩa p'anɨmina,

⁷ mãɨ choa p'anɨnepa unupidaipɨ Jesucristode piarã ĩjãa p'anɨt'a. Mãrapa ĩjãa p'anɨt'a nee jĩra bɨma. Nee t'ɨpɨ taude tort'iiparima mãɨ wariara piipará beemẽrá. Ara mãɨ jĩra mãra minachia mĩautade, choa p'anɨnepa unupii p'anɨma Jesucristode piarã ĩjãa p'anɨt'a. Mãɨ nee k'aepẽra piipará bɨma, nee jõpari pẽra. Mãrapa Jesucristode piarã ĩjãa p'anɨt'a unupi p'anɨ pẽra, ichi unuutade Tachi Ak'õrepa mãra pia unuipɨ, mãra k'orea pia jaraipɨ mãɨnepa chi atepe k'awa p'anɨrã bɨipɨ.

⁸ Mãrapa ununak'amina Jesucristo k'ɨ̃ria p'anɨma. Nãɨena ununawẽa p'anɨmina ichide ĩjãa p'anɨma. Ichi k'orea minachia arapá p'anɨma. Jãɨya arapá p'anɨ pẽra mãɨ arapá sãmaasã́ bɨ k'orea p'ue k'awa jaradawẽma.

⁹ Mãɨya arapá p'anɨma Jesucristode ĩjãa p'anɨnepa Tachi Ak'õrepa k'aripai pẽra.

¹⁰ Tachi Ak'õre pari pedeapataɨrãpa chõarãena jarapachidama Tachi Ak'õrepa ichi sõpiadepa mãra k'aripait'a. Mãɨ k'orea k'awadai k'orea ãchia jĩrak'aua k'ɨ̃risiapachidama mãɨnepa ak'ɨdak'ari idipachidama.

¹¹ Cristo Jaore ãchi sõne bɨpa pedeapipachima Cristo minachia mĩak'ari Tachi Ak'õrepa pia bɨi k'orea. Mãɨpa pedeak'ari k'awa k'ɨ̃ria p'anasidama k'ai k'orea Cristo Jaorepa ãchiá pedeapisit'a mãɨnepa sãapae jõma mãɨ mãɨyai.

¹² Maamina Tachi Ak'õrepa k'awapida ãchia pedeadada ãchi paewẽ pasima, mãɨpari mãra paepuru pasima. Ãchia pedeadada naapae chi pedea pia Cristo k'orea jarateapataɨrãpa tachiá pia k'awapi p'anɨma, Tachi Ak'õre Jaore pajãnepa peedadepa. Makɨɨ Tachi Ak'õrepa ɨt'aripa peedarã pida k'awa k'ɨ̃ria p'anɨma.

Tachi Ak'õre pae pia p'anat'ɨ

¹³ Mãɨpuru k'ɨ̃risia k'awaa p'anɨnepa p'anat'ɨ, pia oodai k'orea. K'ĩra jĩp'a p'anat'ɨ. Sẽnawẽa nɨ p'anat'ɨ Jesucristo unuuta ewaride Tachi Ak'õrepa ichi sõpiadepa mãrá nepia teamẽrá.

¹⁴ Warra chok'ea bɨ jĩra p'anat'ɨ. Nãɨ k'ak'uapa nemietá oo k'ɨ̃ria bɨt'a waa oorãt'ɨ, Tachi Ak'õre atua p'anasidaeda oopachidaɨ jĩra.

¹⁵ Tachi Ak'õrepa mãra t'ɨ̃sima. Ichi ne ãareaɨne jĩp'a bɨma. Mãɨpuru machia ooutacha jĩp'a p'anat'ɨ.

¹⁶ Tachi Ak'õre pedeade nãɨya bɨ bɨma: «Jĩp'a p'anat'ɨ mɨ jĩp'a bɨ pẽra».

¹⁷ Mãrapa Tachi Ak'õrea pedeautade mãra Ak'õreane apatapɨra, k'awat'ɨ Ichia ẽpẽra waapẽarã k'aepẽra atepe k'ɨ̃riawẽanepa jõma ak'ɨipɨ, tachicha oodada k'orea. Mãɨpuru wapida nãɨ ĩjũane p'anɨmisa tua awaraɨdepemarã jĩra ewaricha ichi wap'ea p'anɨnepa jĩp'a nipat'ɨ.

^18-19 Mãra naena piawẽa be k'ɨ̃risiadepa nipapachidama mãra chõarãenapemarãpa mãɨya jarateapachida pẽra. Maamina k'awa p'anɨma Tachi Ak'õrepa mãra mãɨnepema k'aripasit'a. Mãra ataé pasima nee jõpariidepa, wa p'arat'a jõpariidepa, mãɨpari Cristo oa chi neepɨa bɨdepa atasima. Cristo chi piipará bɨ oveja chak'e Tachi Ak'õrea paateada jĩra basima.

²⁰ Nãɨ ĩjũa ooi naena Tachi Ak'õrepa Cristo jɨrɨ atak'ari nãɨ k'aadeapema ewaride peesima mãra pia p'ananamẽrá.

²¹ Cristodepa mãrapa Tachi Ak'õrene ĩjãa p'anɨma. Tachi Ak'õrepa ichi piu bada chok'ae p'irabaripik'ari atepe bɨsima. Mãɨpuru mãrapa Tachi Ak'õrene piarã ĩjãa p'anɨma mãɨnepa nɨ p'anɨma Ichia jarada ãarea oomẽrá.

²² Chi piarã pedea oo p'anɨ pẽra mãra nemietaawẽa p'aneesidama. Mãɨpuru ũpẽarã piarã k'ɨ̃ria p'anɨma. Sõnepa piarã minachia chi k'ɨ̃ria p'anat'ɨ.

²³ Nãɨ k'ak'ua piui bɨdepa mãra mãicha chiwidi t'õnaé pasima, mãɨpari Tachi Ak'õre piuk'apɨɨdepa mãicha chiwidi t'õsidama. Tachi Ak'õre pedea jõk'apɨɨpa, chok'ae babiparima. Mãɨ pedeadepa mãra chiwidi t'õsidama.

²⁴ Tachi Ak'õre pedeade nãɨya bɨ bɨma: «Jõmãɨrã sirua jĩra bepɨ. Ãchi k'ĩrawãrea nep'ono jĩra bɨma. Sirua p'urpak'ari chi nep'ono baeparima.

²⁵ Maamina Tachi Chipari pedea jõk'ama». Mãɨ jõk'apɨ́ pedea pia Cristodepemapɨ. Mãɨt'a tachi ũpẽarãpa mãrá jarasidama.