1 Juan 5 - Tachi Ak'õre Pedea

Tachi Ak'õre Warrade ĩjãanai p'anɨ k'orea bɨda

¹ Jesú Tachi Ak'õrepa Tachi K'aripaparí teai jarada abaɨpa ĩjãaipɨra, mãɨ ẽpẽra Tachi Ak'õrenepa t'õnapɨ. Chi Tachi Pajãnepema Ak'õre k'ɨ̃ria bɨpa ichi warrarã sida k'ɨ̃ria bɨma.

² Tachia Tachi Ak'õre k'ɨ̃ria p'anɨpɨra mãɨnepa ichia oopi bɨ pedeat'a oo p'anɨpɨra, k'awa p'anɨma ichi warrarã sida k'ɨ̃ria p'anɨt'a.

³ Tachi Ak'õre piarã k'ɨ̃ria p'anɨpɨra, ichia oopi bɨ pedea ãarea oodaipɨ. Ichia oopi bɨ pedea t'ajuwẽa bɨma.

⁴ Jõma Tachi Ak'õrenepa t'õnaanapa nãɨ ĩjũanepema nemietá itu bɨpatama. Piarã tachia Jesucristode ĩjãa p'anɨ pẽra mãɨ p'ue itu bɨdaipɨ.

⁵ ¿K'aipa nãɨ ĩjũanepema nemietá p'ue itu bɨima? Abaɨpa Jesú piarã Tachi Ak'õre Warrat'a ĩjãa bɨpɨra, mãɨ ẽpẽrapa mãɨ p'ue itu bɨipɨ.

Jesú piarã Tachi Ak'õre Warrapɨ

⁶ Mãɨ Jesucristo, chi nãɨ ĩjũanea chek'ari paniane porochoadapɨ mãɨnepa ichi oa k'urusude ãrinapɨ. Nãɨ ĩjũanea chek'ari abapuru paniane porochoaé pasima, mãɨpari ichi oa sida k'urusude ãrisima. Tachi Ak'õre Jaorepa k'awapi bɨma mãɨ piarãt'a, ichia chi piarã pedea k'awapipari pẽra.

⁷ Mãɨnepa pajãne ũpea p'anɨpa mãɨ piarã abarik'a jara p'anɨma; Tachi Pajãnepema Ak'õrepa mãɨya jara bɨma, chi «Pedea» apataɨpa mãɨya jara bɨma mãɨnepa ichi Jaore pida mãɨya jara bɨma. Mãɨ ũpea p'anɨt'a ãchi aba bɨpɨ.

⁸ Nãɨya chi ũpea p'anɨrãpa k'awapipatama chi Jesú k'orea pedea piarãt'a: Jesú porochoada pẽra, ichi oa k'urusude ãrina pẽra, mãɨnepa Tachi Ak'õre Jaorepa k'awapi bɨ pẽra. Mãɨ ũpea p'anɨrãpa abarik'a k'awapi p'anɨma.

⁹ Ẽpẽrapa ununa piarãane aipɨra tachia ĩjãapatama. Maamina Tachi Ak'õrepa jara bɨt'a atepe ĩjãanai p'anɨma, ichi Warra k'orea piarã jara bɨ pẽra.

¹⁰ Chi Tachi Ak'õre Warrade ĩjãa bɨpa ichi sõne k'awa bɨma Tachi Ak'õrepa jara bɨ piarãt'a. Maamina chi Tachi Ak'õrepa jara bɨt'a ĩjãawẽa bɨpa Tachi Ak'õrepa sea jara bɨade a k'ɨ̃risia bɨma, ichi Warra k'orea jara bɨt'a ĩjãawẽa bɨ pẽra.

¹¹ Tachi Ak'õrepa jara bɨ nãɨpɨ: ichi Warradepa tachi ewaricha ichi ome chok'ae p'anapiipɨ.

¹² Piarã chi Tachi Ak'õre Warrade ĩjãa bɨ ichi ome ewaricha chok'ae p'anapiipɨ. Maamina chi Tachi Ak'õre Warrade ĩjãawẽa bɨpa ichi ome ewaricha chok'ae baiwẽma.

Juanpa nãɨ k'art'ade k'aadea bɨda

¹³ Mɨa nãɨ k'art'a mãra chi Tachi Ak'õre Warrade ĩjãa be pae bɨruma k'awadamẽrá ewaricha Tachi Ak'õre ome chok'ae p'ananait'a.

¹⁴ Tachi Ak'õrepa k'ɨ̃ria bɨ jĩra tachia ididaipɨra, k'awa p'anɨma ichia ũriparit'a. Mãɨpuru ne wap'eawẽa ichiá ididai p'anɨma.

¹⁵ Tachia idiuta ũriparit'a k'awa p'anɨ pẽra, k'awa p'anɨma mãɨ idiuta ichia teait'a.

¹⁶ Mãranepema abaɨpa pɨ ũpẽapa nemietá tachi piupik'apɨ́ ooru unuipɨra, ɨt'aa chiidii bɨma. Mãɨya Tachi Ak'õrepa mãɨ k'ɨ̃risia atuak'ari, chok'ae bapiipɨ. Maamina ichiaba tachi piupiparí nemietá paraapɨ. Mɨa ɨt'aa chiidipade a jara bɨwẽma, chi mãɨ nemietá oopataɨrã k'orea.

¹⁷ Jõma Tachi Ak'õre k'ĩrari piawẽa ooda nemietaapɨ. Maamina mãɨ awara nemietá bɨpɨ, chi mãɨpa tachi piupik'apɨ.

¹⁸ Tachia k'awa p'anɨma chi Tachi Ak'õrenepa t'õnapa nemietá ook'at'a, Tachi Ak'õre Warra Jesucristopa ãchi ak'ɨ bɨ pẽra. Mãɨpuru tiorepa ãchi p'ue piawẽa ooiwẽma.

¹⁹ Tachia k'awa p'anɨma tachi Tachi Ak'õrené. Mãɨnepa k'awa p'anɨma jõma chi nãɨ ĩjũane Tachi Ak'õre atua be tiore juade p'anɨrãt'a.

²⁰ Tachia k'awa p'anɨma Tachi Ak'õre Warra chesit'a mãɨnepa k'ɨ̃risia k'awa bɨ tachiá teasit'a Tachi Ak'õre piarã k'awadamẽrá. Ichi Warra Jesucristo ome p'anɨ pẽra tachi piarã Tachi Ak'õre ome p'anɨma. Ichi piarã Tachi Ak'õrepɨ. Ichia ẽpẽrarã́ ichi ome ewaricha chok'ae p'anapiparima.

²¹ Mɨ warrarã, juapa oodada sãdo bede ĩjãarãt'ɨ.