1 Juan 4 - Tachi Ak'õre Pedea

Sea jarateapataɨrã sãmaasã́ k'awadai p'anɨ

¹ Ũpẽarã, Tachi Ak'õre Jaoredepa pedea p'anɨane apataɨrã jõma ĩjãarãt'ɨ, mãɨpari jĩrak'aua ak'ɨt'ɨ ãchia piarã Tachi Ak'õre Jaoredepa wa waapẽarãnepa pedea p'anɨ k'awadai k'orea. Mãɨya oot'ɨ chi seapataɨrã nãɨ ĩjũane minachia p'anɨ pẽra.

² Nãɨya mãrapa k'awadaipɨ k'ai Tachi Ak'õre Jaoredepa pedea bɨt'a: abapa Jesucristo nãɨ k'ak'uade piarã chesiade aipɨra, Tachi Ak'õre Jaoredepa pedea bɨma.

³ Maamina abaɨpa Jesucristo nãɨ k'ak'uade chewẽ pasiade aipɨra, Tachi Ak'õre Jaoredepa pedea bɨwẽma. Cristo nek'ĩramaanepa pedea bɨma. Mãrapa ũrisidama Cristo nek'ĩramá chei bɨt'a. Piarã ichi ara nãɨ ĩjũane bɨma.

⁴ Mɨ warrarã, mãra Tachi Ak'õrenepɨ. Mãrapa mãɨrã́ itu seapidaé pasima, chi mãra sõne bɨ chi nãɨ ĩjũane be k'aepẽra jua chaarea bɨ pẽra.

⁵ Mãɨrã nãɨ ĩjũa nemietaadepemarãpɨ. Mãɨpuru nãɨ ĩjũanepema k'ɨ̃risia jarateapatama mãɨnepa ãchia jaratea p'anɨ nãɨ ĩjũane Tachi Ak'õrene ĩjãanak'a berãpa ĩjãapatama.

⁶ Maamina tachi Tachi Ak'õrenepɨ. Chi Tachi Ak'õre k'awa bɨpa tachia jaratea p'anɨt'a ĩjãaparima. Chi Tachi Ak'õre atua bɨpa tachia jaratea p'anɨt'a ĩjãak'ama. Mãɨnepa tachia k'awa p'anɨma k'aipa Tachi Ak'õre Jaoredepa piarã pedea jaratea bɨt'a mãɨnepa k'aipa awaraɨ jaoredepa sea jaratea bɨt'a.

Tachi Ak'õrepa ẽpẽrarã k'ɨ̃ria bɨ bɨda k'orea

⁷ Ũpẽarã, tachi chi k'ɨ̃ria p'ananai p'anɨma, Tachi Ak'õrepa tachiá tachi ũpẽarã piarã k'ɨ̃riapipari pẽra. Jõma chi k'ɨ̃ria uru be Tachi Ak'õrenepa t'õnaanarãpɨ mãɨnepa Tachi Ak'õre k'awa p'anɨma.

⁸ Tachi Ak'õrepa ne ãareaɨne k'ɨ̃ria bɨ pẽra mãɨ chi abaɨ k'ɨ̃riawẽa bɨpa Tachi Ak'õre atua bɨma.

⁹ Tachi Ak'õrepa tachi k'ɨ̃ria bɨt'a unupisima ichi Warra aba bɨ nãɨ ĩjũanea peeside ichidepa ewaricha chok'ae p'ananamẽrá.

¹⁰ Mãɨ k'ɨ̃ria bɨt'a nãɨya bɨma: k'ɨ̃rianepa Tachi Ak'õrepa ichi Warra peesima piumẽrá tachi nemietá k'ɨ̃risia atuai k'orea. Tachi Ak'õrepa mãɨya ooé pasima tachia ichi k'ɨ̃ria p'anana pẽra, mãɨpari mãɨya oosima ichia tachi k'ɨ̃riana pẽra.

¹¹ Ũpẽarã, Tachi Ak'õrepa tachi mãɨya k'ɨ̃riana pẽra tachi sida chi k'ɨ̃ria p'ananai p'anɨma.

¹² Abaɨ pida Tachi Ak'õre taupa ununak'ama. Maamina tachi chi k'ɨ̃ria p'anɨpɨra, Tachi Ak'õre tachi ome bɨma mãɨnepa ichi k'ɨ̃rianepa tachia piarã jõmãɨrã k'ɨ̃ria p'anɨma.

¹³ Tachi Ak'õrepa ichi Jaore tachiá teada pẽra k'awa p'anɨma tachi Tachi Ak'õre ome p'anɨt'a mãɨnepa ichi tachi ome bɨt'a.

¹⁴ Taipa ichi Warra unusida pẽra mãɨya jara p'anɨma Tachi Pajãnepema Ak'õrepa mãɨ piarã peesit'a nãɨ ĩjũanepemarã k'aripamẽrá.

¹⁵ Abaɨpa Jesú piarã Tachi Ak'õre Warraade aipɨra, Tachi Ak'õre ichi ome bɨma mãɨnepa ichi Tachi Ak'õre ome bɨma.

¹⁶ Tachia k'awa p'anɨma mãɨnepa ĩjãa p'anɨma Tachi Ak'õrepa tachi k'ɨ̃ria bɨt'a. Tachi Ak'õrepa ne ãareaɨne k'ɨ̃ria bɨma. Chi piarã k'ɨ̃ria uru bɨ Tachi Ak'õre ome bɨma mãɨnepa Tachi Ak'õre ichi ome bɨma.

¹⁷ Mãɨya tachia Tachi Ak'õre mãɨnepa jõma ẽpẽrarã piarã k'ɨ̃ria p'anɨma. Tachi Ak'õrepa ɨtɨai ewaride tachi ne wap'eawẽa p'ananaipɨ, nãɨ ĩjũane Jesucristo nipada jĩra nipadada pẽra.

¹⁸ Tachia Tachi Ak'õre mãɨnepa jõma ẽpẽrarã k'ɨ̃ria p'anɨpɨra, Tachi Ak'õrepa ɨtɨai pada wap'eadawẽa p'anɨma, chi piarã k'ɨ̃ria p'anɨnepa mãɨ wap'eadait'a jõpipari pẽra. Tachi Ak'õrepa ɨtɨai wap'ea bɨpa k'awa bɨma Tachi Ak'õrepa ichi ɨtɨait'a. Chi ichia Tachi Ak'õre mãɨnepa jõma ẽpẽrarã wapida piarã k'ɨ̃ria bɨwẽma.

¹⁹ Tachia Tachi Ak'õre k'ɨ̃ria p'anɨma ichia tachi naa k'ɨ̃riana pẽra.

²⁰ Abaɨpa Tachi Ak'õre k'ɨ̃ria bɨade a bɨpɨra, mãɨne ichi ũpẽa unuemaa bɨpɨra, ichia sea jara bɨma. Ichi ũpẽa unu bɨt'a k'ɨ̃riawẽa bɨpɨra, ¿sãmaasã́ Tachi Ak'õre unuwẽa bɨt'a k'ɨ̃ria baima?

²¹ Jesucristopa chi tachi pae oopi bɨ pedea nãɨpɨ: Tachi Ak'õre k'ɨ̃ria bɨpa ichi ũpẽa k'ɨ̃ria bai bɨma.