1 Juan 2 - Tachi Ak'õre Pedea

Cristopa tachi k'orea chichupuria idiparima

¹ Ũpẽarã, mãra mɨ warrarã jĩra p'anɨma. Mɨa mãɨ bɨruma mãrá nemietá oopidaemaapa. Maamina ẽpẽra abapa nemietá ooipɨra, aba uru p'anɨma Tachi Pajãnepema Ak'õrea tachi k'orea chichupuria idimẽrá. Mãɨ chichupuria idiparí Jesucristopɨ. Ne ãareaɨne jĩp'a ooparima.

² Ichi piusima Tachi Ak'õrepa tachi nemietá k'ɨ̃risia atuamẽrá. Abapuru tachi nemietá k'orea piué pasima, mãɨpari piusima jõma nãɨ ĩjũane p'anɨrã nemietá k'orea pida.

³ Tachi Ak'õrepa oopi bɨ pedeat'a tachia oo p'anɨpɨra, unupidai p'anɨma ichi piarã k'awa p'anɨt'a.

⁴ Abaɨpa jaraipɨra: «Mɨa ichi k'awa bɨma», mãɨne ichia oopi bɨt'a oowẽa bɨpɨra, mãɨpa sea jara bɨma. Chi piarãpẽa pedea atua bɨma.

^5-6 Maamina chi Tachi Ak'õre pedea oo bɨpa Tachi Ak'õre piarã k'ɨ̃ria bɨma. Chi Tachi Ak'õre ome ará bɨade a bɨt'a Jesucristo nipada jĩra nipai bɨma. Tachi mãɨya nipadaipɨra, k'awa p'anɨma piarã ichi ome ará p'anɨt'a.

Tachi Ak'õrepa oopi bɨ pedea chi chiwidi

⁷ Ũpẽarã, mɨa mãra pae bɨwẽa bɨma, chi Tachi Ak'õrepa oopi bɨ pedea chiwidit'a, mãɨpari bɨ bɨma ichia naena jara bɨeda. Mãɨ jara bɨeda mãrapa Cristode ĩjãasidaedapema k'awa p'anɨma. Mãɨ naena jara bɨeda chi mãrapa ichi k'orea ũrinaanapɨ.

⁸ Maamina chi mɨa bɨ bɨt'u chiwidi jĩra bɨma Cristopa ooda pẽra mãɨnepa mãra pida piarã oo p'anɨ pẽra. Chi nãɨ chiwidi bɨt'a p'ãrio jõpodo jĩra bɨma, mãrapa nemietá itu bɨpodouta pẽra. Ichiaba piarã ɨnaapodo jĩra bɨma, mãrapa k'ɨ̃ria p'anɨnepa jĩp'a oopodouta pẽra.

⁹ Abapa ɨnaane bɨade aipɨra, maamina ichi ũpẽa unuemaa uru baipɨra, mãɨ wapida p'ãrione bɨma.

¹⁰ Chi ichi ũpẽa k'ɨ̃ria bɨt'a ɨnaane bɨma mãɨnepa nemietaade baepik'ama.

¹¹ Maamina chi ichi ũpẽa unuemaa uru bɨ p'ãrione bɨma. P'ãrione nipapari pẽra atua bɨma sãmá wãit'a, mãɨ p'ãriopa ichi tau p'ãrio uru bɨ pẽra.

¹² Warrarã, mɨa nãɨ k'art'a mãrá bɨruma Tachi Ak'õrepa Cristodepa mãra nemietá k'ɨ̃risia atuada pẽra.

¹³ Chõarã, mɨa nãɨ k'art'a mãrá bɨruma chi naenaena bada wapida bɨt'a mãɨ mãrapa k'awa p'anɨ pẽra. K'ũtãarã, mɨa nãɨ k'art'a mãrá bɨruma tiore p'uedada pẽra. Warrarã, mɨa nãɨ k'art'a mãrá bɨruma Tachi Pajãnepema Ak'õre k'awasida pẽra.

¹⁴ Ak'õrerã, mɨa nãɨ k'art'a mãrá bɨruma chi naenaena bada wapida bɨt'a mãɨ mãrapa k'awa p'anɨ pẽra. K'ũtãarã, mɨa nãɨ k'art'a mãrá bɨruma minachia ĩjãa p'anɨ pẽra, Tachi Ak'õre pedea mãra sõne bɨ pẽra, mãɨnepa tiore p'uedada pẽra.

¹⁵ Chi nãɨ ĩjũanepema k'ɨ̃risia mãɨnepa nejõma nãɨ ĩjũanepema nemietá k'ɨ̃riarãt'ɨ. Chi nãɨ ĩjũanepema nemietá k'ɨ̃ria bɨpa Tachi Pajãnepema Ak'õre k'ɨ̃riawẽa bɨma.

¹⁶ Nãɨ ĩjũanepema nemietá nãɨpɨ: nãɨ k'ak'uapa nemietá oo k'ɨ̃riapari, tachi taupa unu bɨt'a k'ɨ̃riapari, mãɨnepa tachia uru p'anɨ k'orea wa oo p'anɨ k'orea ara tachi waapẽarã k'aepẽra atepe p'anɨ jĩra k'ɨ̃risiapari. Jõma mãɨ Tachi Pajãnepema Ak'õrenepemawẽma, mãɨpari nãɨ ĩjũa nemietaadepemapɨ.

¹⁷ Nãɨ ĩjũa nemietá mãɨnepa jõma nemietá ẽpẽrarãpa oo k'ɨ̃ria p'anɨt'a jõipɨ. Maamina chi Tachi Ak'õrepa jara bɨ oo bɨt'a ewaricha ichi ome chok'ae baipɨ.

Cristo nek'ĩramá

¹⁸ Mɨ warrarã, nãɨ ewari jõpodoruma. Mãrapa ũrisidama Cristo nek'ĩramá cheit'a. Mãɨnepa minachia Cristo nek'ĩramaarã nɨbɨma. Mãɨpuru tachia k'awa p'anɨma nãɨ ewari jõpodorut'a.

¹⁹ Ãchi tachi ome p'anana wãsidama, maamina piarã tachidepemawẽ pasima. Piarã tachidepema padapara, tachi ome wapida ará p'ananai pasima. Maamina mãɨyasima pia k'awadamẽrá jõmãɨrã tachidepemawẽt'a.

²⁰ Mãɨpari mãrapa Tachi Ak'õre Jaore Cristopa teada uru p'anɨma. Ichidepa jõma chi piarã pedea k'awa p'anɨma.

²¹ Mɨa nãɨ k'art'a bɨwẽa bɨma mãrapa chi piarã pedea atua p'anɨ pẽra mãɨpari bɨruma k'awa p'anɨ pẽra. Mãɨnepa k'awa p'anɨma chi seat'a piarãpemawẽma.

²² ¿Chi seajaraparí k'aima? Chi Jesú Tachi Ak'õrepa teai jarada Tachi K'aripapariwẽane a bɨpɨ. Ichi Cristo nek'ĩramaapɨ. Ichia Tachi Pajãnepema Ak'õre mãɨnepa Tachi Ak'õre Warra itu bɨ bɨma.

²³ Chi Tachi Ak'õre Warra itu bɨ bɨpa Tachi Pajãnepema Ak'õre uru bɨwẽma. Chi Jesú Tachi Ak'õre Warraade a bɨpa Tachi Pajãnepema Ak'õre sida uru bɨma.

²⁴ Mãɨpuru mãrapa ĩjãasidaedapema chi Cristo k'orea ũri p'anɨt'a mãra sõne minachia pia yaa uru p'anat'ɨ. Mãɨ minachia yaa uru p'anɨpɨra, Tachi Pajãnepema Ak'õre ome mãɨnepa ichi Warra ome pida ará p'ananaipɨ.

²⁵ Mãɨya ará p'anɨpɨra, Cristopa tachiá piarãpẽa jarasima ewaricha Tachi Ak'õre ome chok'ae p'ananait'a.

²⁶ Mɨa mãɨ bɨsima waapẽarãpa mãra sea k'ɨ̃ria p'anɨ pẽra.

²⁷ Maamina mãrapa Tachi Ak'õre Jaore Cristopa teada uru p'anɨma. Mãɨpuru jɨrɨdaiwẽa p'anɨma waapẽarãpa mãrá jarateadamẽrá. Tachi Ak'õre Jaorepa mãrá nejõma jaratea bɨma. Ichia jaratea bɨt'a seawẽma, mãɨpari piarãpɨ. Mãɨ k'orea Cristo ome ará p'anat'ɨ ichi Jaorepa mãrá jarateada jĩra.

²⁸ Mɨ warrarã, Cristo ome ará p'anat'ɨ. Mãɨya ichi cherude tachi ne wap'eawẽa mãɨnepa k'ĩra p'erawẽa ichi k'ĩrari p'ananaipɨ.

²⁹ Mãrapa k'awa p'anɨma Jesucristo jĩp'a bɨt'a. Mãɨnepa k'awa p'anɨma jõma jĩp'a oo be Tachi Ak'õrenepa t'õnaanarãt'a.