1 Juan 1 - Tachi Ak'õre Pedea

Chi Chok'ae Bapiparí Pedea

¹ Jua chiwidieda chi Chok'ae Bapiparí Pedea apataɨ basima mãɨnepa wapida bɨma. Ichia jarateada taipa ũrisidama. Ichi tai taupa unusidama mãɨnepa juapa t'õmarisidama. Ichia ooda pia ak'ɨsidama. Ichi k'orea taipa nãɨ k'art'ade bɨutama.

² Mãɨ chok'ae bapiparí Tachi Ak'õrepa nãɨ ĩjũane unupisima. Taipa ichi unusida pẽra ichi k'orea piarã pedea p'anɨma. Taipa mãrá jara p'anɨma mãɨ chi ewaricha chok'ae bapiparit'a. Jua chiwidieda ichi Tachi Pajãnepema Ak'õre ome pajãne bapachima. Ichi pajãne bada Tachi Ak'õrepa taiyá nãɨ ĩjũane unupisima.

³ Taipa ununana mãɨnepa ũrinana mãrá jara p'anɨma mãra sida tai ome ará Tachi Pajãnepema Ak'õre ome mãɨnepa ichi Warra Jesucristo ome pia p'ananamẽrá.

⁴ Jõma mãɨ taipa bɨutama tachi minachia arapá p'ananai k'orea.

Tachi Ak'õre nemietá nea bɨma

⁵ Taipa Jesucristodepa ũrinana mãrá jara p'anɨ nãɨpɨ: Tachi Ak'õre ɨnaa bɨ jĩra bɨma ne ãareaɨne jĩp'a bɨ pẽra. Mãɨpa ichide p'ãrio mi ãpia pida newẽma.

⁶ Ichi ome ará pia p'anɨane a p'anɨpɨra, maamina p'ãrione nipadaipɨra, sea p'anɨma. Piarã pedea ĩjãanawẽa p'anɨma.

⁷ Maamina ichi ɨnaane bɨ jĩra tachi ɨnaane nipadaipɨra, tachi ũpẽarã ome ará pia p'ananaipɨ. Mãɨnepa ichi Warra Jesucristo oa ãrinapa tachi nemietá ãarea sɨɨparima.

⁸ Tachi nemietaawẽa p'anɨane a p'anɨpɨra, ara tachi tuaba sea p'anɨma mãɨnepa chi piarã pedea atua p'anɨma.

⁹ Tachi Ak'õrepa jara bɨ jĩra oopari pẽra mãɨnepa jĩp'a oopari pẽra, tachia nemietá oodada ichiá jaradaipɨra, mãɨ nemietá k'ɨ̃risia atuaipɨ. Jõma piawẽa oodada sɨɨipɨ.

¹⁰ Tachia nemietá oodak'aade adaipɨra, Tachi Ak'õre chi sea bɨade a p'anɨma mãɨnepa ichi pedea ĩjãanawẽa p'anɨma.