1 Corintio 8 - Tachi Ak'õre Pedea

Juapa oodada sãdorã́ ne k'iuru paateada bɨda k'orea

¹ Naapae mɨa jararuma chi juapa oodada sãdorã́ ne k'iuru paa teada k'orea. Mãrapa jarapatama ara mãɨnepa k'ɨ̃risia k'awa p'anɨane apatama. Maamina chi k'ɨ̃risia k'awapa tachi waapẽarã k'aepẽra atepe p'anɨ jĩra k'ɨ̃risiapiparima. Tachia waapẽarã k'ɨ̃ria p'anɨnepa, ãchi k'aripapatama.

² Abaɨpa minachia k'awa bɨ k'ɨ̃risia bɨpɨra, waidi pia atua bɨma ichia k'awai bɨ jĩra.

³ Maamina abaɨpa Tachi Ak'õre k'ɨ̃ria bɨpɨra, Tachi Ak'õrepa ichi k'awa bɨma.

⁴ Mãɨpuru chi juapa oodada sãdorã́ k'iuru teada k'odai k'orea mɨa jararuma. Tachia k'awa p'anɨma chi juapa oodada sãdo piarãwẽt'a. Mãɨnepa k'awa p'anɨma Tachi Ak'õre piarã abapuru bɨt'a.

⁵ Pajãne mãɨnepa nãɨ ĩjũane ẽpẽrarãpa «ãchi ak'õrerã» apataɨrã paraapɨ. Piarã makɨɨrã mãɨnepa ẽpẽrarãpa «ãchi chiparirã» apataɨrã sida chok'ará paraapɨ.

⁶ Maamina tachimá, Tachi Ak'õre abapuru bɨpɨ. Ichi tachi Pajãnepema Ak'õrepɨ. Ichiapuru nejõma oosima. Tachi ichi pae chok'ae p'anɨma. Mãɨnepa Tachi Chipari Jesucristo abapuru bɨma. Ichidepa Tachi Ak'õrepa nejõma oosima. Ichidepa tachi chok'ae p'anɨma.

⁷ Maamina waapẽarãpa mãɨ sõnepa k'awadawẽa p'anɨma. Waapẽarã ũpẽarãpa wapida k'ɨ̃risia p'anɨma chi juapa oodada sãdo ãchia naena k'ɨ̃ria p'anana chok'ae p'anasidaɨt'a. Mãɨpuru chi juapa oodada sãdoa k'iuru teada k'osidara k'ɨ̃risiapatama mãɨne ĩjãautat'a. Chi piarã pedea minachia atua p'anɨ pẽra mãɨ k'iuru k'outadepa k'ɨ̃risiapatama Tachi Ak'õre k'ĩrari piawẽa p'aneeutat'a.

⁸ Maamina chi tachia nek'opataɨ k'orea Tachi Ak'õrepa tachi pia ak'ɨk'ama. Mãɨpuru tachia k'o p'anɨnepa wa k'odawẽ p'anɨnepa Tachi Ak'õre k'ĩrari pia p'ananaiwẽma.

⁹ Piarã tachia k'o k'ɨ̃ria p'anɨt'a p'ue k'odai p'anɨma. Maamina jĩrak'aua p'anat'ɨ mãrapa ne paritua k'o p'anɨnepa machi ũpẽa pia atua bɨt'a k'achiade baepidaemaapa.

¹⁰ Pɨ juapa oodada sãdo tede eda nek'o suak'abari beeipɨra, mãɨne chi nejõma k'oi bɨ atua bɨpa pɨ mãma suak'abari bɨ unuipɨra, ichia pida juapa oodada sãdoa k'iuru teada k'oi k'ɨ̃risiaipɨ. Maamina chi juapa oodada sãdoa ɨt'aa idiru k'ɨ̃risia bɨ pẽra ichimá mãɨ nemietá oo bɨma.

¹¹ Mãɨya chi nejõma k'oi bɨ k'awa bɨpa chi minachia atua bɨ ũpẽa, chi mãɨ k'orea Cristo piusit'a, ichide ĩjãa bɨ itu bɨpiipɨ.

¹² Mãrapa mãɨ atua be ũpẽarã k'achiade baepiutade Cristot'a nemietá oo p'anɨma.

¹³ Mãɨ k'orea mɨa nek'o bɨdepa mɨ ũpẽa k'achiade baepipɨra, waa nek'oiwẽma.