1 Corintio 6 - Tachi Ak'õre Pedea

Ũpẽarãpa ara ãchi nepɨra ak'ɨdai p'anɨ

¹ Mãranepema nepɨra pará beesira abaɨ ũpẽa ome, ¿k'ãre k'orea chi Tachi Ak'õrene ĩjãanak'apɨɨrã nepɨra ak'ɨpataɨrãmá jarade wãpatama? ¿Pia bɨwẽk'ãra Tachi Ak'õre ẽpẽrarãpa ãchi nepɨra ak'ɨdait'a?

² ¿Mãrapa atua p'anɨk'ãra Jesú cherude chi ẽpẽrarã Tachi Ak'õrenepemarãpa chi nãɨ ĩjũane berã nepɨra ak'ɨdait'a? Mãrapa chi nãɨ ĩjũane berã ak'ɨdai pẽra ¿k'ãre k'orea nepɨra ãpia k'ede p'ue ak'ɨdaiwẽa p'anɨma?

³ ¿Atua p'anɨk'ãra tachia Tachi Ak'õrepa ɨt'aripa peedarã ichiaba ak'ɨdait'a? Mãɨya bɨ pẽra ¿chi idiapaepema nepɨra mãra t'ãena berã p'ue ak'ɨdaiwẽk'ãra?

⁴ Mãra mãɨ k'orea nepɨra pará p'aneenaipɨra, ¿k'ãre k'orea chi Tachi Ak'õrene ĩjãanak'apɨɨrãmá wãpatama mãɨ nepɨra ak'ɨdamẽrá?

⁵ Mɨa mãɨ jara bɨma mãra p'eradamẽrá. ¿Mãra t'ãena k'ɨ̃risia k'awa bɨ aba pida newẽk'ãra ũpẽarã nepɨrade p'anɨrã́ pia pedeapii k'orea?

⁶ Maawẽapuru ũpẽa abaɨ chi ũpẽa ome k'ĩruu pedeadak'ari chi nãɨ ĩjũanepema nepɨra ak'ɨpataɨrãmá wãpatama. Piarã mãɨya oodaiwẽa p'anɨma, chi Tachi Ak'õrene ĩjãanak'apɨɨrã k'ĩrari k'ĩruu pedeapata pẽra.

⁷ Piarã waapẽarã mãranepema nepɨra uru p'anapata pẽra unupii p'anɨma machi jĩp'a nipadak'at'a. ¿Piipará bɨwẽk'ãra chi pɨ piawẽa ooda choait'a, chi nepɨra ak'ɨparimá wãi k'aepẽra? ¿Piipará bɨwẽk'ãra pɨa uru bɨ itu chɨapiit'a, pɨ ũpẽa chi nepɨra ak'ɨparimá ateewãi k'aepẽra?

⁸ Maamina mãrapuru ẽpẽrarã piawẽa oopatama mãɨnepa nechɨapatama. Piarã minachia piawẽa oo p'anɨma, ara mãra ũpẽarã mãɨya oopata pẽra.

^9-10 ¿Mãrapa atua p'anɨk'ãra chi nemietá oopataɨrã Tachi Ak'õre juade p'ananaiwẽt'a, ichidirã paara? ¡Ara machi tuaba searãt'ɨ! Chi k'ak'uadepa nemietá oopataɨrã, juapa oodada sãdo k'ĩrari ɨt'aa chiidi berã, k'ima awaraɨ ome k'ãipataɨrã, ɨmɨk'ĩra wẽra jĩra beapataɨrã, ɨmɨk'ĩra abarik'aɨ ome beapataɨrã, nechɨapataɨrã, erreara awaa berã, piu nipapataɨrã, seadepa waapẽarã k'orea k'achia pedeapataɨrã mãɨnepa waapẽarã seapataɨrã sida Tachi Ak'õre p'uurude p'ananaiwẽma.

¹¹ Naena, mãranepema chi está mãɨya p'anapachidama. Maamina mãrapa nemietá oodada Tachi Ak'õrepa sɨɨsima, ichi pae pia bɨsima mãɨnepa nepɨra newẽa bɨade asima Tachi Chipari Jesucristodepa mãɨnepa ichi Jaoredepa.

Ũpẽarãpa tachi k'ak'uadepa nemietá oodaiwẽa p'anɨma

¹² Chi eda mãranepemarãpa jarapatama: «Cristode ĩjãa bɨ pẽra mɨa k'ɨ̃ria bɨ jĩra jõma ooi bɨma». Maamina mɨa jararuma tachia k'ɨ̃ria p'anɨ jõma oodai p'anɨmina, jõma tachia oo k'ɨ̃ria p'anɨpa tachi k'aripak'ama. Mãɨpuru jõma mɨa oo k'ɨ̃ria bɨa, p'ue itu oopiiwẽa bɨma.

¹³ Mãɨnepa waapẽarãpa jarapatama: «Chik'o tachi bi pae bɨma, mãɨnepa tachi bi chik'o pae bɨma». (Mãɨya bɨmina Tachi Ak'õrepa mãɨ umea jõpiipɨ). Maamina tachi k'ak'ua bɨwẽma nemietá oo bamẽrá, mãɨpari Tachi Chipari pae bɨma. Mãɨnepa Tachi Chipari tachi k'ak'ua ak'ɨi k'orea bɨma.

¹⁴ Tachi Ak'õrepa ichi jua chaareadepa Tachi Chipari Jesú piu bada chok'ae p'irabaripisima. Ara mãɨ jĩra ichi jua chaareadepa tachi sida chok'ae p'irabaripiipɨ.

¹⁵ ¿Mãrapa atua p'anɨk'ãra mãra k'ak'ua Cristodé? Mãɨyara ¿mɨa ará ãpua bɨik'ãra chi Cristodé, wẽra k'achia bɨ ome? ¡Mãɨyawẽma!

¹⁶ ¿Mãrapa atua p'anɨk'ãra chi wẽra k'achia ome bɨde, mãɨ wẽra ome k'ak'ua aba bɨ jĩra bɨt'a? Tachi Ak'õre pedeade nãɨya jara bɨma: «Ãchi k'ak'ua aba bɨ jĩra p'ananaipɨ».

¹⁷ Maamina chi Tachi Chipari ome ará bɨt'a ichi ome jaore aba bɨ jĩra p'anɨma.

¹⁸ Awaraɨ ome mi ãpia pida k'ãirãt'ɨ. Nemietá awara ooipɨra, mãɨpa tachi k'ak'ua mietá beepiiwẽma. Maamina k'ak'uadepema nemietá ooipɨra, tachi k'ak'ua piawẽa beeipɨ.

¹⁹ ¿Mãrapa atua p'anɨk'ãra mãra k'ak'ua Tachi Ak'õre Jaore tet'a? Tachi Ak'õrepa ichi Jaore mãrá teasima. Ichi mãra sõne bɨma. Mãra k'ak'ua ara mãranewẽma mãɨpari Tachi Ak'õrenepɨ.

²⁰ Tachi Ak'õrepa mãra atasima. Tachi Ak'õrené pẽra mãra k'ak'uade mãɨnepa jaorede k'ĩra jĩp'a p'anat'ɨ.