1 Corintio 5 - Tachi Ak'õre Pedea

Chi ũpẽapa nemietá oo nipada itu oopidada

¹ Ẽpẽrarãpa jara p'anɨma mãra t'ãena chi aba bɨpa k'ima awaraɨ ome k'ãiyá bɨpɨ. Jara p'anɨma mãɨpa chi ak'õre k'ima chi k'ima jĩra uru bɨt'a. Piarã chi Jesucristode ĩjãanak'apɨɨrã pida mãɨya oodak'ama.

² Maamina ¡mãrapa wapida k'ɨ̃risia p'anɨma waapẽarã k'aepẽra piipará berãpɨ! ¿Mãɨ ẽpẽrapa nemietá ooda k'orea minachia sõp'ua p'aneenaiwẽk'ãra? ¿Mãɨ mãranepema ãyá bɨdai p'anasidawẽk'ãra?

³ Mɨ mãra ome bɨwẽmina k'ɨ̃risiadepa mãra ome ará bɨma. Mãɨya bɨde mãra ome bɨ jĩra, mãɨ nemietá oo bɨ ẽpẽra Tachi Chipari Jesú t'ɨ̃nepa ɨtɨasima.

⁴ Mãra ará p'aneeutade, mɨ k'ɨ̃risiadepa mãra ome baipɨ. Mãɨnepa Tachi Chipari Jesú jua chaarea mãrá teaipɨ,

⁵ mãɨ ẽpẽra ɨtɨadamẽrá. Ichi ãyá bɨdai p'anɨma tiorepa minachia mĩapimẽrá. Mãɨya nãɨ k'ak'uapa nemietá oo k'ɨ̃ria bɨt'a itu bɨipɨ. Mãɨnepa Tachi Chipari chei ewaride ichi k'aripaipɨ.

⁶ Ara machi waapẽarã k'aepẽra pia beade adaiwẽa p'anɨma. ¿Mãrapa atua p'anɨk'ãra p'ana ooropiparí ãpia bɨpa harina jõma ẽesãapipari? Ara mãɨ jĩra chi nemietá ãpia oorupa chi waapẽarã ũpẽarã ãarea mietaade bɨpiparima.

⁷ Mãɨpuru p'ana ooropiparí chi chota ãyá amaauta jĩra mãɨ nemietá oo bɨpa mãranepema ãyá bɨt'ɨ. Mãɨya mãra nemietá newẽa p'ananaipɨ, harina chiwidi p'ueradada chi p'ana ooropiparí newẽa bɨ jĩra. Mãra mãɨ jĩra p'anapii k'orea, Cristo tachi nemietá k'orea piusima, Egitodepa wãsidaɨde oveja peadada jĩra.

⁸ Naapae p'ana ooropiparí newẽa bɨ k'opata jĩra, k'ɨ̃risia piadepa mãɨnepa piarãpẽanepa nipadai p'anɨma. P'ana ooropiparí chi chota bɨdepa waa nipadaiwẽa p'anɨma. Waapẽarã unuemaa bɨdepa mãɨnepa piawẽa oo bɨdepa waa nipadaiwẽa p'anɨma.

⁹ Naena mɨa awaraɨ k'art'ade bɨsima mãra chi awaraɨrã ome k'ãipataɨrã ome ará p'ananaiwẽa p'anɨt'a.

¹⁰ Maamina mãɨpa jara bɨwẽma chi nãɨrã ome p'ananaiwẽa p'anɨ: chi nãɨ ĩjũanepema awaraɨ ome k'ãi berã ome, erreara awaa berã ome, nechɨapataɨrã ome, mãɨnepa juapa oodada sãdo k'ĩrari ɨt'aa chiidipataɨrã. Ãchi ome p'ana k'ɨ̃rianaepɨra, nãɨ ĩjũanepema ãyá wãnai p'anɨma.

¹¹ Mãɨpari mɨa mãrá bɨsima parituapa ara ichi ũpẽaane aipɨra, maamina awaraɨ ome k'ãipataɨde nipaipɨra, erreara awaa baipɨra, juapa oodada sãdo k'ĩrari ɨt'aa chiidi baipɨra, seadepa waapẽarã k'orea k'achia pedea baipɨra, piu nipaipɨra, wa nechɨaparí baipɨra, makɨɨ ẽpẽra ome ará p'ananaiwẽa p'anɨ mãɨnepa ará nek'odaiwẽa p'anɨ.

^12-13 Chi Tachi Ak'õrene ĩjãanak'apɨɨrã nepɨra ak'ɨi k'orea mɨ bɨwẽma. Tachi Ak'õrepuru ãchi nepɨra ak'ɨipɨ. Maamina chi mãra t'ãena berã mãrapa nepɨra ak'ɨdai p'anɨma. Tachi Ak'õre pedeade bɨ bɨma: «Chi nemietá oo bɨt'a mãra t'ãenapema ãyá jeret'aat'ɨ».