1 Corintio 4 - Tachi Ak'õre Pedea

Jesucristo pae pari mimiapataɨrã

¹ Mãɨya bɨde mãrapa k'ɨ̃risiadai p'anɨma tai Cristo pae pari mimiapataɨrãt'a. Tachi Ak'õrepa tai bɨsima chi ichi k'orea naena k'awapiwẽa bada jarateadamẽrá.

² Piarã chi chipari pae pari mimiaparipa ichi chiparipa oopi bɨt'a jõma jĩp'a oo bai bɨma chi chiparipa pia unumẽrá.

³ Mãɨpuru mãrapa wa paritua ẽpẽrapa mɨ k'orea k'achia pedeautade piawẽa k'ɨ̃risiadak'ama. Mãɨnepa ara mɨchi tuaba jarawẽma mɨa oo bɨt'a sãmaasã́ bɨ.

⁴ Mɨa mi ãpia pida nemietá oo bɨwẽane a bɨmina, mãɨya jara bɨwẽma mɨ mi ãpia pida piarã nemietá oowẽa bɨade a bɨwẽma. Tachi Chiparipuru mɨ nepɨra ak'ɨipɨ.

⁵ Mãɨ k'orea ichia nepɨra ak'ɨi ewari naena tachia jaradaiwẽa p'anɨma, chi ichia ooda oo bɨpa jĩp'a oo bɨ wa jĩp'a oowẽa bɨ. Tachi Chipari cherude tachi sõne k'ɨ̃risia bada mãɨnepa nejõma tachi sõne mẽra beada k'awapiipɨ. Tachi Ak'õrepuru tachicha pia bayade aipɨ tachia pia oodada k'orea.

⁶ Ũpẽarã, mɨ k'orea mãɨnepa Apolo k'orea bɨsima mãra k'aripai k'orea. Tai k'orea k'awadai p'anɨma Tachi Ak'õre pedeade bɨ bɨ awara k'ɨ̃risiapidaemaapa. Mãɨya mãrapa abaɨ waapẽarã k'aepẽra atepe pia bɨ k'ɨ̃risiadaiwẽma.

⁷ ¿K'aipa pɨ waapẽarã k'aepẽra atepe pia bɨsima? Tachi Ak'õrepa teada awara ¿pɨa k'ãre uru bɨma? Pɨa Tachi Ak'õrenepa nejõma jitadapɨra, ¿k'ãre k'orea ara pɨchi tuaba jitada jĩra pedea bɨma?

⁸ Tachi Ak'õrenepa jita k'ɨ̃ria p'anana mãrapa nejõma uru p'anɨane apatama. Tachi Ak'õrepa tea bɨ minachia uru p'anɨane apatama. Taiwẽa, mãra tuaba chi atepe k'awa p'anɨrã jĩra p'aneenayane a k'ɨ̃risia p'anɨma. Maamina mãɨyawẽma. Mãra piarã chi atepe k'awa p'anɨrã p'aneenaipara pia bai pasima. Mãɨya tai sida mãra ome ará chi atepe k'awa p'anɨrã p'aneenai pasima.

⁹ Maamina mɨa k'ɨ̃risia bɨma tai chi Jesucristopa peedaɨrã Tachi Ak'õrepa jõmãɨrã k'aepẽra k'aadea bɨsit'a. Tai chi nepɨra ak'ɨparipa jõmãɨrã k'ĩrari peapipade a bɨ jĩra p'anɨma. Ẽpẽrarãpa mãɨnepa Tachi Ak'õrepa ɨt'aripa peedaɨrãpa, jõmãɨrãpa ak'ɨ p'anɨma piudai k'awadai k'orea.

¹⁰ Ẽpẽrarãmá tai Cristo k'orea ne atua berã jĩra p'anɨpɨ mãɨnepa jua chaareawẽa berã jĩra p'anɨpɨ. Maamina Cristo ome p'anɨ pẽra machi chi minachia k'awa p'anɨ jĩra beayade apatama mãɨnepa chi jua chaarea p'anɨ jĩra beayade apatama. Ẽpẽrarãpa mãra k'orea pia pedea p'anɨma, maamina tai ununaemaa p'anɨma.

¹¹ Wapida ara nãɨ ewaride taipa jarra choa p'anɨma, opisia choa p'anɨma, mãɨnepa neet'á sore k'edet'a uru p'anɨma. Tai te nea p'anɨma mãɨnepa ẽpẽrarãpa tai piawẽa oopatama.

¹² Tai ɨ̃apaadawẽa mimia p'anɨma ne uru p'ananai k'orea. Ẽpẽrarãpa taiyá piawẽa pedeautade taipa ãchiá pia pedeapatama. Tai piawẽa ooutade choapatama.

¹³ Seadepa taiyá k'achia pedeautade pedea piadepa p'anoopatama. Wapida nãɨ ewaride ẽpẽrarãpa tai nejarra jĩra unupatama mãɨnepa nemietá jĩra unupatama.

¹⁴ Mɨa mãɨ bɨwẽma mãra p'erapii k'orea. Mãɨpari mɨ warrarã jĩra mãra k'ɨ̃ria bɨ pẽra mãɨya bɨ bɨma jĩp'a k'ɨ̃risiapii k'orea.

¹⁵ Mãrapa Cristo k'orea jarateapataɨrã chok'ará uru p'anɨpara wapida ak'õre aba uru p'ananai pasima. Mɨnepa mãrapa chi Jesú k'orea pedea pia ĩjãanana pẽra ichidepa mɨ mãra ak'õrepɨ.

¹⁶ Mãɨ k'orea mɨa mãrá chichupuria idiruma mɨ nipapari jĩra nipadamẽrá.

¹⁷ Mãɨpuru Timoteo mãramá peeruma. Tachi Chiparidepa ichi mɨ warra k'ɨ̃ria bɨ jĩra bɨma mãɨnepa jĩp'a nipaparima. Ichia mãrá k'ɨ̃risiapiipɨ mɨ Jesucristo ome sãmaasã́ nit'a. Mɨ mãɨya nipai bɨt'a ẽpẽrarã Jesucristoderã becha jarateaparima.

¹⁸ Waapẽarã mãranepema chi atepe k'awa p'anɨrã jĩra nipadai p'anɨma, k'ɨ̃risia p'anɨ pẽra mɨ mãramá wãiwẽt'a.

¹⁹ Maamina Tachi Chiparipa k'ɨ̃riaipɨra, mɨ mãramá isapea wãipɨ. Mãɨne chi atepe p'anapataade apataɨpa jara p'anɨ ũrine wãiwẽma, mãɨpari ak'ɨde wãipɨ ãchi piarã Tachi Ak'õre jua chaarea p'anɨ k'awai k'orea.

²⁰ Tachi Ak'õre juade uru bɨdepemarãpa ara jãɨya ichi k'orea pedeadak'ama, mãɨpari ichi jua chaareadepa jĩp'a oopatama.

²¹ Mãɨ ¿mãrapa sãmaasã́ k'ɨ̃ria p'anɨma? ¿K'ɨ̃ria p'anɨk'ãra mɨa ɨtɨade wãi wa k'ɨ̃rianepa, pia pedeadepa wãit'a?