1 Corintio 3 - Tachi Ak'õre Pedea

Pablo mãɨnepa Apolopa Tachi Ak'õrepa oo bɨt'a oodada

¹ Ũpẽarã, mɨ mãramá wãside, chi Tachi Ak'õre Jaoredepa nipapataɨrã́ jaratea bɨ jĩra p'ue mãɨyaé pasima. Mãɨpari chi nãɨ k'ak'uapa oo k'ɨ̃ria bɨ jĩra oopataɨrã́ mãɨnepa chi chiwidi Cristode ĩjãanaanarã́ jaratea bɨ jĩra jarateasima.

² Mɨa Cristo k'orea pedea t'ajuwẽa bɨdepema jarateasima, warra chak'erã́ juba topi bɨ jĩra. Chik'o k'opi bɨ jĩra, mɨa t'aju bɨ jarateaé pasima, mãrapa p'ue k'awadaé pasi pẽra. Mãɨnepa waidi p'ue k'awadawẽma.

³ Mãra wapida nãɨ k'ak'uapa oo k'ɨ̃ria bɨ jĩra nipapatama: waapẽarãpa uru bɨ k'orea piawẽa k'ɨ̃risiapatama mãɨnepa k'ĩruu pedeapatama. Mãɨya p'anɨ pẽra ¿nãɨ k'ak'uapa oo k'ɨ̃ria bɨ jĩra nipapatawẽk'ãra? ¿Nãɨ ĩjũanepemarã jĩra p'anɨwẽk'ãra?

⁴ Abaɨpa jaraparima: «Mɨ Pablodepɨ». Abaɨpa jaraparima: «Mɨ Apolodepɨ». Mãrapa mãɨya jarapata pẽra nãɨ ĩjũanepemarã jĩra p'anɨma.

⁵ Maamina ¿Pablo k'aima? ¿Apolo k'aima? Tait'u Tachi Ak'õre pae pari mimiapataɨrãpɨ. Taidepa mãrapa Tachi Chiparide ĩjãasidama. Tachi Ak'õrepa taicha oopida jĩra oosidama.

⁶ Ne uuru jĩra mɨa mãrá Jesú k'orea naa jarateasima. Maapae mɨa uudade pania p'oru jĩra Apolopa Tachi Ak'õre pedea pia jarateasima. Maamina Tachi Ak'õrepuru k'aripasima mãrapa ĩjãanamẽrá chi ne uuda waripiru jĩra.

⁷ Mãɨpuru chi ne uuparí chi atepe bɨwẽma. Chi pania p'oparí sida chi atepe bɨwẽma. Tachi Ak'õret'u chi atepe bɨpɨ. Ichiapuru ne uu ĩjũa waripiparima.

⁸ Chi ne uuparí mãɨnepa chi pania p'oparí sida Tachi Ak'õre k'ĩrari abarik'a p'anɨma. Ichia tachicha nepia teaipɨ, tachia oo p'anana jĩra.

⁹ Mɨa Apolo ome abarik'a Tachi Ak'õrepa oopi bɨt'a oo p'anɨma. Mãra sida Tachi Ak'õre ne uu ĩjũapɨ. Mãɨ awara mãra Tachi Ak'õrepa te oomaa bɨ jĩra p'anɨma.

¹⁰ Mɨ te ooparí pia jĩra bɨma. Tachi Ak'õrepa ichi sõpiadepa mɨá teadadepa, te tĩitau yaayá eudu k'orosima. Waapẽarãpa mãɨ ɨ̃rɨ te oopatama. Maamina tachicha jĩrak'aua bai bɨma sãmaasã́ mãɨ ɨ̃rɨ ooi bɨt'a.

¹¹ Jesucristo chi te tĩitaupẽra waa p'ue awara bɨdaiwẽa bɨma.

¹² Abaɨpa mãɨ ɨ̃rɨ te pia ooipɨra, ichia oo bɨt'a nee, p'arat'a mãɨnepa mawara pia achiterrea k'ede ãrik'apɨ́ jĩra baipɨ. Maamina abaɨpa mãɨ ɨ̃rɨ te piawẽa ooipɨra, ichia oo bɨt'a pak'uru, sia k'irú wa to k'irupa oodada te jĩra baipɨ.

¹³ Cristopa tachi nepɨra ak'ɨi ewaride tachicha oodada t'ɨpɨ uruapa chaa ajoroipɨ, choai k'awai k'orea. Mãɨpa k'awapiipɨ tachia oodada sãmaasã́ basit'a.

¹⁴ Tachia oodapa mãɨ t'ɨpɨ urua choasira Cristopa chi oo badá nepia teaipɨ.

¹⁵ Maamina chi tachia ooda paawãsira chi oo badapa mi ãpia pida nepia ataiwẽma. Tachi Ak'õrepa ichi k'aripaimina, te paawãrunepa k'ariparu jĩra k'aripaipɨ.

¹⁶ ¿Atua p'anɨk'ãra Tachi Ak'õre Jaore mãra sõne bɨ? ¿Atua p'anɨk'ãra mãra Tachi Ak'õre te?

¹⁷ Parituapa Tachi Ak'õre te ãriipɨra, mãɨ ẽpẽra Tachi Ak'õrepa minachia ɨtɨaipɨ mãɨ te ichi paepuru bɨ pẽra. Mãra mãɨ tepɨ.

¹⁸ Ara machi tuaba searãt'ɨ. Abaɨpa chi nãɨ ĩjũanepema k'ɨ̃risia jĩra ne k'awa bɨ k'ɨ̃risia bɨpɨra, waa mãɨya k'ɨ̃risiaiwẽa bɨma. Mãɨpari chi piarã k'ɨ̃risiat'a uru bai k'orea nãɨ ĩjũanepemarã k'ĩrari ne atua bɨ jĩra bai bɨma.

¹⁹ Tachi Ak'õremá, chi nãɨ ĩjũanepema k'ɨ̃risiat'a piawẽa bɨma. Tachi Ak'õre pedeade nãɨya bɨ bɨma: «Tachi Ak'õrepa chi nãɨ ĩjũane ne k'awa berã ara ãchi k'ɨ̃risiadepa k'awapiparima ne k'awa p'anɨwẽt'a».

²⁰ Mãɨnepa nãɨya bɨ bɨma: «Tachi Chiparipa k'awa bɨma chi nãɨ ĩjũane ne k'awa berã k'ɨ̃risiat'a piawẽa bɨ».

²¹ Ũpẽarã ak'ɨparí chi waapẽarã k'aepẽra chi piipará bɨ jĩra waa k'ɨ̃risiarãt'ɨ. Tachi Ak'õrenepa mãrapa nejõma uru p'anɨma pia p'ananai k'orea.

²² Mãrapa Apolo, Pedro mãɨnepa mɨ uru p'anɨma. Jõma nãɨ ĩjũane bɨ sida uru p'anɨma. Chi idiapaepema mãɨnepa chi nũpema sida uru p'anɨma. Tachi chok'ae p'ananaipɨra wa piudaipɨra Tachi Ak'õrenepa nejõma uru p'ananaipɨ pia p'ananai k'orea.

²³ Jõma mãra Cristoderãpɨ. Mãɨnepa Cristo Tachi Ak'õrenepɨ.