1 Corintio 2 - Tachi Ak'õre Pedea

Cristo k'urusude piuda k'orea Pablopa jarateada

¹ Ũpẽarã, mɨa Tachi Ak'õre k'orea mãramá jarateade wãside chi minachia k'awapataɨrã pia pedeapataɨ jĩra mɨ k'ɨ̃risiadepa mi ãpia pida jarateaé pasima.

² Mãra t'ãena baside mɨa abapuru Jesucristo k'orea mãɨnepa ichi k'urusude peadada k'awapi k'ɨ̃ria basima.

³ Mãɨne mɨ ɨbɨwẽa bɨ k'ɨ̃risiasima. Mãɨnepa p'ue pia jarateawẽa k'ɨ̃risia bada pẽra wap'eapa k'ak'ua ãarea ore nɨbapachima.

⁴ Mɨa Jesú k'orea jaratea baside mɨ k'ɨ̃risiadepa mãɨya ooé pasima mãrapa ĩjãanamẽrá. Mãɨpari Tachi Ak'õre Jaorepa ichi jua chaareadepa k'awapisima mãɨ pedea piarãt'a.

⁵ Mãɨya mãrapa nãɨ ĩjũanepema k'ɨ̃risiadepa Jesucristode ĩjãanaé pasima, mãɨpari Tachi Ak'õre jua chaareadepa ĩjãasidama.

Chi Tachi Ak'õrepa naena k'awapiwẽa bada ichi Jaoredepa k'awapida

⁶ Mãɨya taipa chi k'ɨ̃risia k'awaat'a jaratea p'anɨma chi Tachi Ak'õrene minachia ĩjãa berã́. Mãɨ k'ɨ̃risia k'awaat'a nãɨ ĩjũanepemawẽma mãɨnepa nãɨ ĩjũanepema minachia k'awa p'anɨrã k'ɨ̃risiawẽma. Ãchi tãaraa p'ananaiwẽma.

⁷ Taipa chi Tachi Ak'õre k'ɨ̃risia naena k'awapiwẽa bada jaratea p'anɨma. Nãɨ ĩjũa ooi naena Tachi Ak'õrepa mãɨ k'ɨ̃risiadepa ne ooi bɨsima tachi ichi ome ará pia p'ananamẽrá.

⁸ Chi nãɨ ĩjũanepema minachia k'awapataɨrã mi ãpia pida mãɨ k'ɨ̃risia k'awadaé pasima. K'awa p'ananapara, Tachi Chipari pia k'ɨrɨt'a k'urusude peadaiwẽ pasima.

⁹ Maamina k'awadaé pasima Tachi Ak'õre pedeade nãɨya bɨ bɨ jĩra: «Chi Tachi Ak'õrepa ichi k'ɨ̃ria berã pae pia ooda uru bɨ, mi ãpia pida wapida ununak'ama, k'ɨɨrɨpa ũrinak'ama mãɨnepa mi ãpia pida k'awa k'ɨ̃risiadak'ama».

¹⁰ Jõma makɨɨ Tachi Ak'õrepa ichi Jaoredepa tachiá k'awapisima. Ichi Jaorepa nejõma k'awa bɨma. Chi Tachi Ak'õre k'ɨ̃risia sida jõma k'awa bɨma.

¹¹ ¿Ẽpẽra k'ɨ̃risiat'a k'aipa k'awa bɨma? Ara ichi tuabapuru k'awa bɨma. Ara mãɨ jĩra mi ãpia pida Tachi Ak'õre k'ɨ̃risia p'ue k'awadawẽma. Aba Tachi Ak'õre Jaorepuru mãɨ k'awa bɨma.

¹² Tachia nãɨ ĩjũanepema k'ɨ̃risiat'a atadaé pasima, mãɨpari Tachi Ak'õre Jaoret'u jitasidama jõma Tachi Ak'õrepa ichi sõpiadepa teada k'awadamẽrá.

¹³ Ara mãɨ k'orea taipa pedea p'anɨma. Maamina nãɨ ĩjũanepema k'ɨ̃risiadepa pedea p'anɨwẽma, mãɨpari Tachi Ak'õre Jaorepa taiyá jaratea bɨ jĩra pedea p'anɨma. Mãɨya chi Tachi Ak'õre Jaorepa k'awapi bɨt'a taipa jaratea p'anɨma ichia pedeapi bɨ jĩra.

¹⁴ Maamina Tachi Ak'õre Jaorepa k'awapi bɨt'a, chi Tachi Ak'õre Jaore nea bɨpa k'awai k'ɨ̃riak'ama, ichimá piawẽa bɨ pẽra. Mãɨnepa p'ue k'awak'ama, Tachi Ak'õre Jaoredepa mãɨ k'awapi bɨ pẽra.

¹⁵ Chi Tachi Ak'õre Jaore uru bɨpa Tachi Ak'õre k'orea p'ue minachia k'awaipɨ. Maamina Tachi Ak'õre Jaore nea bɨpa chi Tachi Ak'õre Jaore uru bɨ k'ɨ̃risiat'a p'ue k'awaiwẽma.

¹⁶ Tachi Ak'õre pedeade nãɨya bɨ bɨma: «¿K'aipa Tachi Chipari k'ɨ̃risia k'awa bɨma? ¿K'aipa ichiá jarateaima?» Maamina tachia Cristo k'ɨ̃risiat'a uru p'anɨma.