1 Corintio 16 - Tachi Ak'õre Pedea

Ũpẽarã Jerusalenepema pae erreara jɨrɨp'edada

¹ Mãɨ awara mãrapa chi Jerusalenepema ũpẽarã pae erreara jɨrɨp'euta k'orea mɨa jararuma. Mɨa ũpẽarã Galacia tuadepemarã́ jarada jĩra oot'ɨ.

² Tomiocha mãracha erreara jitautadepema awara bɨdak'ari yaat'ɨ. Mãɨ mɨ cherude mãrapa jɨrɨp'edaiwẽa p'anɨma.

³ Mɨ cherude chi ũpẽarã mãrapa jɨrɨ atadada mɨa mãɨrã ome Jerusalenea erreara tea peeipɨ. Ũpẽarã Jerusalenepemarãpa ãchi pia p'anɨane adamẽrá mɨa, ãchi ome k'art'a tea peeipɨ.

⁴ Maamina mãramá mɨ sida wãi pia bɨpɨra, ãchi ome wãipɨ.

Pablo Corinto p'uurudea wãi k'ɨ̃risiada

⁵ Mɨ naa Macedonia tuadea wãi bɨma. Maapae mãramá wãipɨ.

⁶ Mɨ mãra ome tãaraaipɨra, beeipɨ. Mãra ome nãɨ ewari ewãra nɨbɨde beeipɨra, beeipɨ. Maapae mãrapa mɨ p'ue k'aripadaipɨ mɨ wãrumá pia wãmẽrá.

⁷ Ara nãɨena p'ue tãaraa baiwẽ pẽra mɨa mãra ak'ɨde wãiwẽma. Maamina Tachi Chiparipa k'ɨ̃riaipɨra, mãramá wãrune tãaraa bade wãipɨ.

⁸ Nãma Ép'eso p'uurude beeipɨ Pentecosté arapaapataɨ ewari parudea.

⁹ Nãma chi mɨ unuemaa minachia p'anɨmina p'ue Tachi Ak'õre pedea pia jaratea baipɨ mãɨnepa chok'araɨrãpa ĩjãautama.

¹⁰ Ũpẽa Timoteo mãramá cheipɨra, ichi mãra t'ãena pia bayade at'ɨ wap'eapiemaapa. Tachi Chiparipa k'ɨ̃ria bɨt'a ichia pia oo bɨma mɨa oo bɨ jĩra.

¹¹ Mãɨ k'orea ichi unuemaapirãt'ɨ, mãɨpari k'aripat'ɨ mɨ ak'ɨde cherude ne k'ɨ̃risiawẽa chemẽrá. Mɨa mãɨnepa waapẽarã ũpẽarã ichi chei nɨ p'anɨma.

¹² Tachi ũpẽa Apoloa mɨa chichupuria idisima waapẽarã ũpẽarã ome mãra ak'ɨde wãnamẽrá. Maamina ara nãɨena ichi wã k'ɨ̃riawẽa bɨma. P'ue wãrune wãipɨ.

Pablopa nãɨ k'art'ade k'aadea bɨda

¹³ Jĩrak'aua p'anat'ɨ. Jesucristode minachia ĩjãa p'anat'ɨ. Ichidepa p'erawẽa p'anat'ɨ mãɨnepa chaarea p'anat'ɨ.

¹⁴ Nejõma mãrapa oouta k'ɨ̃rianepa oot'ɨ.

¹⁵ Ũpẽarã, mãrapa k'awa p'anɨma Acaya tuade Estep'anapa mãɨnepa ichi ẽpẽrarã naa Jesude ĩjãanana mãɨnepa ãchia k'ɨ̃risia p'anɨ jõma ũpẽarã k'aripadai k'orea.

¹⁶ Mɨa mãrá chichupuria idiruma ãchi mãɨnepa jõma ãchi jĩra berã ũrinamẽrá. Jõma Tachi Ak'õre oo bɨt'a oopataɨrã ũrit'ɨ mãɨnepa chi ũpẽarã k'aripa berã ũrit'ɨ.

¹⁷ Ũpẽa Estép'ana, P'ortunato mãɨnepa Ak'aik'o mɨmá chedada pẽra arapá bɨma. Ãchia mãra pari mɨ k'aripa p'anɨma.

¹⁸ Ãchia mɨ sõ arapaapisidama mãra sõ arapaapidada jĩra. Ãchi k'orea mãɨnepa ũpẽarã ãchi jĩra p'anɨ k'orea pia k'ɨ̃risiat'ɨ.

¹⁹ Ũpẽarã Asia tuadepemarãpa k'ɨ̃ria p'anɨma mãra pia p'ananait'a. Ũpẽa Aquilapa, ũpẽawẽra Priscilapa mãɨnepa ũpẽarã ãchi tede ará nɨbeepataɨ Tachi Chipari k'orea k'ɨ̃ria p'anɨma mãra pia p'ananait'a.

²⁰ Ũpẽarã jõmãɨrãpa k'ɨ̃ria p'anɨma mãra pia p'ananai. Piarã k'ɨ̃ria p'anɨnepa jõma ũpẽarã́ pia p'anapade a jarat'ɨ.

²¹ Mɨ Pablopɨ. Nãɨ pedea ara mɨchi juapa bɨruma.

²² Parituapa Tachi Chipari Jesucristo k'ɨ̃riawẽpɨra, Tachi Ak'õrepa mãɨ ẽpẽra nepɨra paraayade aipɨ. ¡Chese, Tachi Chipari!

²³ Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bai.

²⁴ Jesucristodepa mɨa mãra piarã k'ɨ̃ria bɨma.