1 Corintio 15 - Tachi Ak'õre Pedea

Cristo chok'ae p'irabarida k'orea

¹ Mãɨ awara ũpẽarã, mɨa mãrá k'ɨ̃risiapiipɨ chi Jesú k'orea pedea pia mɨa mãrá jarateada. Mãɨ pedea mãrapa mɨnepa k'awasidama mãɨnepa minachia ĩjãa p'anɨma.

² Mɨa jarateada piarã ĩjãa p'ananaipɨra, Tachi Ak'õrepa k'aripaipɨ. Mãɨyawẽpɨra, machia pari ĩjãasidama.

³ Mɨa chi atepe piipará bɨt'u mãrá jarateasima, ara mɨa k'awada jĩra. Mãɨ nãɨpɨ: Cristo tachi nemietá k'orea piusima Tachi Ak'õre pedeade bɨ bɨ jĩra.

⁴ Ichi t'ɨbarisidama, maapae ewari ũpeaɨde piu bada chok'ae p'irabarisima Tachi Ak'õre pedeade bɨ bɨ jĩra.

⁵ Chok'ae p'irabarik'ari Pedroa unupisima. Mãɨ ɨ̃ari chi doce jɨrɨ atadaɨrã́ unupisima.

⁶ Mãɨya bak'ari ũpẽarã quiniento ará p'anɨa unupisima. Chi eda ãchidiidepema k'ĩrawẽasidama maamina chok'ará wapida chok'ae p'anɨma.

⁷ Mãɨ quiniento ũpẽarãpa Jesú ununak'ari ichi Santiagoa unupisima. Mãɨya bak'ari jõma ichia peedaɨrã́ unupisima.

⁸ K'aadea mɨ warra piu baeda jĩra badá unupisima.

⁹ Piarã chi Jesucristopa peedadepema mɨ chi ãpiipará bɨ jĩra bɨpɨ. Ẽpẽrarã Tachi Ak'õreneerã piawẽa ooi k'orea ẽp'ẽ bada pẽra pia bɨwẽma ẽpẽrarãpa mɨ ichia peeda jaradait'a.

¹⁰ Maamina Tachi Ak'õrepa ichi sõpiadepa mɨ bɨsima Jesucristopa peeda bamẽrá. Ichia mɨ pari mãɨya bɨé pasima. Mãɨpari jõma chi waapẽarã Jesucristopa peedaɨrã k'aepẽra mɨa ichi pae atepe oo bɨma. Maamina ara mɨchidepa mãɨya oowẽa bɨma. Tachi Ak'õrepuru ichi sõpiadepa mɨ k'aripa bɨma mãɨya oomẽrá.

¹¹ Waapẽarã Jesupa peedaɨrãpa ichi k'orea jaratea p'anɨpɨra wa mɨa jaratea bɨpɨra, abarik'a jaratea p'anɨma. Mãɨnepa mãrapa ara mãɨ pedea ĩjãasidama.

Ũpẽarã piudada chok'ae p'irabaridai k'orea

¹² Taipa Cristo chok'ae p'irabarida k'orea jarateapatama. Mãɨ ¿sãmaasã́ chi eda mãranepemarãpa piudada chok'ae p'irabaridaiwẽane a p'anɨma?

¹³ Piudada chok'ae p'irabaridawẽpɨra, mãɨpa jara bɨma Cristo sida chok'ae p'irabarié pasima.

¹⁴ Cristo chok'ae p'irabariwẽpɨra, mãɨyara taipa pari jaratea p'anɨma mãɨnepa mãrapa pari ichide ĩjãa p'anɨma.

^15-16 Cristo chok'ae p'irabariwẽpɨra, Tachi Ak'õrepa ichi chok'ae p'irabaripisiade autade taipa Tachi Ak'õre k'orea sea jara p'anɨane a p'anɨma. Piarã piudada chok'ae p'irabaridawẽpɨra, mãɨpa jara bɨma Cristo sida chok'ae p'irabarié pasima.

¹⁷ Cristo chok'ae p'irabaridawẽpara, mãrapa pari ichide ĩjãanai pasima mãɨnepa wapida nemietaade p'ananai pasima.

¹⁸ Mãɨyara jõma Cristode ĩjãapataɨrã piudada atuasidama.

¹⁹ Tachia Cristodepa nãɨ ĩjũanepuru pia p'ananai k'ɨ̃risia p'anɨpɨra, jõmãɨrã k'aepẽra chichupuria p'anɨma.

²⁰ Maamina Tachi Ak'õrepa piarã Cristo piu bada chok'ae p'irabaripisima. Piudaadadepema ichit'a chi naa chok'ae p'irabaridapɨ. Mãɨya Tachi Ak'õrepa unupisima jõma ichidirã sida piarã chok'ae p'irabaridait'a.

²¹ Ẽpẽra aba bɨpa nemietá ooda k'orea tachi piudaipɨ. Ara mãɨ jĩra ẽpẽra aba bɨpa pia ooda k'orea tachi chok'ae p'irabaridaipɨ.

²² Jõmãɨrã Adannepa chedada pẽra piupatama. Ara mãɨ jĩra Cristo k'orea jõma ichidirã chok'ae p'ananaipɨ.

²³ Cristo naa chok'ae p'irabarisima. Ichi mãicha cherude ichidirã chok'ae p'irabaridaipɨ.

²⁴ K'aadeapema ewaride Cristopa jaore mietá chiparirã, jaore mietá atepe k'awa p'anɨrã, jaore mietá jua chaarea be sida ãarea p'ueipɨ. Maapae ichidirã ichi juade p'anɨrã Tachi Pajãnepema Ak'õrea teaipɨ.

²⁵ Piarã Cristo jõmãɨrã chipari bai bɨma aba jõma ichi nek'ĩramá p'uerudea.

²⁶ Mãɨ ãarea p'uek'ari, chi k'aadeapema nek'ĩramá, tachi piupataɨ, ichia mãɨ jõpiipɨ,

²⁷ Tachi Ak'õre pedeade jara bɨ pẽra: «Pɨa ne ãarea ichi juade bɨsima». «Nejõma Cristo juade bɨsiade» a bɨmina pia k'awa p'anɨma Tachi Ak'õre ara ichi Cristo juade bɨé pasit'a. Tachi Ak'õrepuru ne ãarea Cristo juade bɨsima.

²⁸ Tachi Ak'õre Warra Cristopa nejõma p'uek'ari ara ichi Tachi Ak'õre juade beeipɨ Tachi Ak'õrepa nejõma ichi juade bɨda jĩra. Mãɨya Tachi Ak'õrepa nejõma ichi juade ua baipɨ.

²⁹ Piudada chok'ae p'irabaridawẽpɨra, ¿k'ãre k'orea chi eda mãraneenepemarã piudada pari porochoa p'anɨma? Tachi Ak'õrepa piudada chok'ae p'irabaripiiwẽpɨra, ¿k'ãre k'orea chi piudada pari porochoa p'anɨma?

³⁰ Mãɨnepa piudada chok'ae p'irabaridawẽpɨra, ¿tai k'ãre k'orea Jesucristo pedea k'orea ewaricha k'achiade minachia mĩa p'anɨma?

³¹ Ũpẽarã, mãrapa Tachi Chipari Jesucristode ĩjãa p'anɨ k'orea mɨ piarã arapá bɨma. Piarã jararuma: ewaricha k'ɨ̃risia bɨma ẽpẽrarãpa mɨ chi Jesú pedea k'orea peadai.

³² Ép'eso p'uurude Tachi Ak'õre pedea jarateai k'orea mɨ minachia mĩasima ãnimara k'achia be ome chõo bɨ jĩra. Piudada chok'ae p'irabaridawẽpɨra, ¿mɨ minachia mĩana k'orea k'ãre piat'a atasima? Piarã tachi chok'ae p'irabaridawẽpɨra, pia bɨma oodai waapẽarãpa jarapata jĩra: «Pia nek'odaipɨ, it'ua todaipɨ nũ piudai pẽra».

³³ Itu seapirãt'ɨ. Mãra nemietá oopataɨrã ome ará nipadaipɨra, ãchia mãra pia nipapataɨ waa pia nipapidaiwẽma.

³⁴ Jĩp'a k'ɨ̃risiat'ɨ. Nemietá waa oorãt'ɨ. Chi eda mãranepemarãpa Tachi Ak'õre atua p'anɨma. Mãɨ k'orea mãra p'eradai p'anɨma.

Ũpẽarã chok'ae p'irabariutade ãchi k'ak'ua sãmaasã́ bai k'orea bɨda

³⁵ Abaɨpa idii bɨejã: «¿Piudada sãmaasã́ chok'ae p'irabaridaima? ¿Ãchi k'ak'ua sãmaasã́ p'ananaima?»

³⁶ ¡Chi mãɨya idi bɨ k'ɨ̃risia newẽa bari bɨma! Ne uuda t'õnorune chi net'a tau e beraaparima.

³⁷ Trigo uuipɨra wa paritua net'a tau uuipɨra, chi bɨɨrɨ uuk'ama mãɨpari chi net'a taut'a uuparima.

³⁸ Maamina mãɨ net'a taudepa Tachi Ak'õrepa chi bɨɨrɨ t'õnopiparima mãɨ ara ichi bɨɨrɨt'a bamẽrá.

³⁹ Chi nãɨ ĩjũane chok'ae berã k'ak'ua abarik'a bewẽma. Ẽpẽra k'ak'ua k'ĩra awara bɨma, ãnimara k'ak'ua k'ĩra awara bɨma, ĩpana k'ak'ua k'ĩra awara bɨma, beta k'ak'ua k'ĩra awara bɨma.

⁴⁰ Mãɨnepa pajãne ne wawaria paraapɨ. Nãɨ ĩjũane pida ne wawaria paraapɨ. Maamina chi pajãne nepia k'ede k'ĩra awara bema, chi nãɨ ĩjũane nepia k'ede k'aepẽra.

⁴¹ Ɨmata auk'ará jẽrat'ĩuparima. Jedek'o k'ĩra awara auk'ará jẽrat'ĩuparima, mãɨnepa k'ãk'ãirã sida k'ĩra awara auk'ará jẽrat'ĩupatama. K'ãk'ãirã ãchi k'ak'awá auk'ará jẽrat'ĩupatama.

⁴² Chi piudada chok'ae p'irabaridait'a ne uuda jĩra bɨma. K'ak'ua beraa bɨt'a t'ɨbaripatama maamina k'ak'ua beraak'apɨ́ chok'ae p'irabariipɨ.

⁴³ K'ak'ua piawẽa bɨ t'ɨbaripatama maamina k'ak'ua pia bɨ chok'ae p'irabariipɨ. K'ak'ua ɨbɨwẽa bɨ t'ɨbaripatama maamina k'ak'ua jua chaarea bɨ chok'ae p'irabariipɨ.

⁴⁴ Nãɨ ĩjũanepema k'ak'ua t'ɨbaripatama maamina pajãnepema k'ak'ua chok'ae p'irabariipɨ. Nãɨ ĩjũanepema k'ak'uapɨra ichiaba pajãnepema k'ak'uapɨ.

⁴⁵ Tachi Ak'õre pedeade bɨ bɨma: «Chi naapema ẽpẽra Adán apataɨ Tachi Ak'õrepa chok'ae bapisima». Maamina Cristo chi k'aadeapema Adán apataɨ bɨsima ichi jaoredepa chok'ae bapimẽrá.

⁴⁶ Pajãnepema k'ak'ua naapema k'ak'uawẽma, mãɨpari nãɨ ĩjũanepema k'ak'uat'a chi naapemapɨ. Chi naapema k'ak'ua jõk'ari pajãnepema k'ak'ua jitaipɨ.

⁴⁷ Chi naapema ẽpẽra Adán apataɨ yooro ooda pẽra, nãɨ ĩjũanepema pasima. Chi k'aadeapema ẽpẽra Jesucristo apataɨ pajãnepemapɨ.

⁴⁸ Adán k'ak'ua yooro ooda pasima. Ara mãɨ jĩra nãɨ ĩjũane tuanurãpa mãɨ uru p'anɨma. Maamina Cristopa pajãnepema k'ak'ua uru bɨ jĩra pajãnepema ẽpẽrarãpa mãɨ uru p'ananaipɨ.

⁴⁹ Tachi chi naapema ẽpẽra yooro k'ak'ua ooda jĩra p'anɨma mãɨnepa pajãnepa cheda ẽpẽra Cristo jĩra p'ananaipɨ.

⁵⁰ Ũpẽarã, mɨa nãɨ jararuma: nãɨ ĩjũanepema k'ak'ua Tachi Ak'õre juade p'ue baiwẽma, ichidirã paara. Chi beraaparí k'ak'ua chi beraak'apɨ́ k'ak'uamá p'ue baiwẽma.

⁵¹ Ũrit'ɨ. Tachi Ak'õrepa naena k'awapiwẽa bada mɨa k'awapiipɨ: tachi jõma piudaiwẽma, mãɨpari chi k'ak'ua k'ĩra awara p'aneenaipɨ.

⁵² Mãɨya bɨde, tau p'ik'arude, k'aadeapema ãnimara k'achu jĩra jĩk'uarude mãɨne k'ĩra awara p'aneenaipɨ. Piarã Tachi Ak'õre ãnimara k'achu jĩra jĩk'uaipɨ. Mãɨne piudaadarã chi k'ak'ua beraadak'apɨɨde, chok'ae p'irabaridaipɨ. Mãɨnepa tachi wapida chok'ae berã chi k'ak'ua k'ĩra awara p'aneenaipɨ.

⁵³ Tachi k'ak'ua beraaparí, k'ak'ua beraak'apɨ́ beeipɨ. Tachi piui pada k'ak'ua, k'ak'ua piuk'apɨ́ beeipɨ.

⁵⁴ Mãɨya tachi k'ak'ua beraaparí, k'ak'ua beraak'apɨ́ beerude mãɨnepa k'ak'ua piui pada, k'ak'ua piuk'apɨ́ beerude, Tachi Ak'õre pedeade bɨ bɨ jĩra piarã mãɨya baipɨ. Nãɨya bɨ bɨma: «Tachi Ak'õrepa tachi piui pada jõpisima».

⁵⁵ Mãɨnepa bɨ bɨma: «¿Chi piui padapa waa p'ue piupiiwẽk'ãra? ¿Chi piui padapa waa p'ue p'uapiiwẽk'ãra?»

⁵⁶ Moisepa bɨdapa k'awapi bɨma tachia nemietá oopataɨ. Nemietá oopata pẽra piudaipɨ.

⁵⁷ Maamina Tachi Ak'õrea sõpia bɨade adai p'anɨma Tachi Chipari Jesucristodepa piudai k'orea k'aripada pẽra.

⁵⁸ Mãɨ k'orea ũpẽarã mɨa k'ɨ̃ria berã, minachia ĩjãa p'anat'ɨ. Tachi Chiparipa k'ɨ̃ria bɨ minachia oopariet'ɨ. Mãrapa k'awa p'anɨma chi Tachi Chipari pae oo p'anɨ, pari oo p'anɨwẽt'a.