1 Corintio 14 - Tachi Ak'õre Pedea

Tachia ũrinak'apɨ́ pedeade pedeapataɨ k'orea

¹ Waapẽarã k'ɨ̃ria p'anapariet'ɨ, mãɨnepa Tachi Ak'õre Jaorepa oopi bɨ jõma oo k'ɨ̃riat'ɨ. Maamina Tachi Ak'õre pari pedeadai atepe k'ɨ̃riat'ɨ.

² Chi tachia ũrinak'apɨ́ pedeade pedea bɨpa ẽpẽrarã́ pedea bɨwẽma, ichia jararu mi ãpia pida ũrinak'a pẽra. Aba Tachi Ak'õreapuru pedea bɨma. Tachia k'awadak'ama chi Tachi Ak'õre Jaoredepa chi tachia atua p'anɨ pedea bɨt'a.

³ Maamina chi Tachi Ak'õre pari pedea bɨpa ẽpẽrarã́ pedea bɨma pia ĩjãanamẽrá, chaarea p'ananamẽrá, mãɨnepa sõpiadamẽrá.

⁴ Chi tachia ũrinak'apɨ́ pedeade pedea bɨpa ara ichi k'aripa bɨma, pia ĩjãai k'orea. Maamina chi Tachi Ak'õre pari pedea bɨpa ũpẽarãt'u k'aripa bɨma pia ĩjãanamẽrá.

⁵ Mɨmá jõma mãra tachia ũrinak'apɨ́ pedeade p'ue pedeautapara pia bai pasima. Maamina jõmãɨrã Tachi Ak'õre pari p'ue pedeautapara pia bai pasima. Piarã tachia ũrinak'apɨ́ pedeade pedeai k'aepẽra Tachi Ak'õre pari pedeait'u atepe pia bɨma. Maamina abaɨpa tachia ũrinak'apɨ́ pedeade pedeak'ari k'awa jaraipɨra, mãɨ sida pia bɨma. Mãɨya ũpẽarãpa arí ũrinak'ari Tachi Ak'õrene pia ĩjãanaipɨ.

⁶ Mãɨ k'orea ũpẽarã, mɨ mãramá wãk'ari tachia ũrinak'apɨ́ pedeade pedeaipɨra, ¿mãra sãmaasã́ k'aripaima? K'aripaiwẽma. Maamina tachia ũripataɨ pedeade Tachi Ak'õrepa mɨá unupida jaraipɨra, wa Tachi Ak'õre k'ɨ̃risiadepa pedeaipɨra, wa Tachi Ak'õre pari pedeaipɨra, wa Tachi Ak'õre pedea jarateaipɨra mãɨpa ãarea p'ue k'aripaipɨ.

⁷ Ara mãɨ jĩra abaɨpa siru wa arpa chaaipɨra maamina pia chaawẽpɨra, jĩk'ua bɨmina tachia k'awadaiwẽma k'ãre chaa bɨt'a.

⁸ Ãnimara k'achu sida pia chaawẽpɨra, ¿papaká berã sãmaasã́ isapea ará bari k'op'aneenaima chõonai k'orea?

⁹ Ara mãɨ jĩra mãrapa ũripataɨ pedeade pedeadaepɨra, ẽpẽrarãpa ¿sãmaasã́ k'awadaima mãrapa jara p'anɨ? Mãɨya pedeadaipɨra, pari pedeadaipɨ.

¹⁰ Nãɨ ĩjũane pedea wawaria p'anɨma. Mãɨ pedeacha chi k'awa bɨpa arí ũriparima.

¹¹ Maamina mɨa mãɨ pedea atua bɨpɨra, chi pedearumá mɨ tua awaraɨdepema jĩra bɨma, mãɨnepa mɨmá ichi tua awaraɨdepema jĩra bɨma.

¹² Mãra ara mãɨ jĩra p'anɨma. Tachi Ak'õre Jaorepa oopi bɨ mãrapa minachia oo k'ɨ̃ria p'anɨ pẽra ũpẽarã k'aripai k'orea pia oo k'ɨ̃riat'ɨ ãchia pia Tachi Ak'õrene ĩjãanamẽrá.

¹³ Mãɨ k'orea chi tachia ũrinak'apɨ́ pedeade pedea bɨpa Tachi Ak'õrea ɨt'aa chiidi bɨma ara ichia jarada p'ue k'awa jarai k'orea.

¹⁴ Tachia ũrinak'apɨ́ pedeade mɨa Tachi Ak'õrea ɨt'aa chiidiipɨra, mɨ jaorepa ɨt'aa chiidi bɨma. Maamina mɨa atua bɨma k'ãre ɨt'aa chiidi bɨt'a.

¹⁵ Mãɨyara ¿sãmaasã́ jĩp'a ooima? Mɨ jaorepa Tachi Ak'õrea ɨt'aa chiidiipɨ maamina mɨa chi k'awa bɨ pedeade pida ɨt'aa chiidiipɨ. Mɨ jaorepa Tachi Ak'õrea pia k'ariipɨ, maamina chi mɨa k'awa bɨ pedeade pida k'ariipɨ.

¹⁶ Pɨ jaorepa Tachi Ak'õrea pia pedeaipɨra chi pɨa jarada k'awa ũrik'apɨɨpa ¿sãmaasã́ mãɨ piarãane aima, pɨa sõpia bɨade ada k'orea?

¹⁷ Piarã pɨa mãɨya pedearude Tachi Ak'õrea sõpia bɨade a bɨma, maamina waapẽarã k'aripawẽa bɨma pia ĩjãanamẽrá.

¹⁸ Mɨa Tachi Ak'õrea sõpia bɨade aparima mɨ mãra k'aepẽra tachia ũrinak'apɨ́ pedeade atepe pedeapari pẽra.

¹⁹ Maamina ũpẽarã ará jere nɨbɨde mɨmá tachia ũrinak'apɨ́ pedeade pedea k'ak'o diez mil pedeai k'aepẽra pia bɨma tachia ũripataɨ pedeade pedea k'ak'o joesoma pedeait'a.

²⁰ Ũpẽarã, warra chak'erã jĩra p'anat'ɨ. Ãchia nemietá k'orea minachia atua p'anɨma. Maamina Tachi Ak'õre Jaorepa oopi bɨ k'orea chõarã jĩra k'ɨ̃risia p'anat'ɨ. Waa warra chak'erã jĩra k'ɨ̃risiarãt'ɨ.

²¹ Tachi Ak'õre pedeade nãɨya bɨ bɨma: «Tachi Chiparipa jara bɨma: mɨ nãɨ p'uurudepemarã ome pedeaipɨ, tua awaraɨdepemarã it'aedepa, chi ãchia ũrinak'apɨ́ pedea pedeapataɨrãnepa. Maamina mɨ pedea ũriemaa p'ananaipɨ».

²² Mãɨya k'awa p'anɨma chi tachia ũrinak'apɨ́ pedeade pedeait'a chi Jesude ĩjãanak'apɨɨrã paepuru bɨpɨ, mãɨpari chi Jesude ĩjãapataɨrã pae bɨwẽma. Mãɨnepa chi Tachi Ak'õre pari pedeait'a chi Jesude ĩjãapataɨrã pae bɨma, mãɨpari chi Jesude ĩjãanak'apɨɨrã pae bɨwẽma.

²³ Mãɨ k'orea ũpẽarã ará jere nɨbeeutade jõmãɨrã tachia ũrinak'apɨ́ pedeade pedeamaa p'anɨpɨra, mãɨne waapẽarã Jesude ĩjãanak'apɨɨrã wa Tachi Ak'õre pedea ũri k'ɨ̃ria berã eda wãsidara ¿ãchia mãra k'ĩra piawẽa p'anɨane a jaradaiwẽk'ãra?

²⁴ Maamina jõmãɨrã Tachi Ak'õre pari pedeadaipɨra, mãɨne Jesude ĩjãawẽa bɨ wa Tachi Ak'õre pedea ũri k'ɨ̃ria bɨ eda wãsira mãrapa jara p'anɨ ũri bɨdepa ichi nemietá ooparí k'awaipɨ mãɨnepa Tachi Ak'õre k'ĩrari nepɨra pará bɨ k'awaipɨ.

²⁵ Ichi sõne mẽra uru bada pia k'awaipɨ. Mãɨne sĩraporode k'obeek'ari Tachi Ak'õrea pia pedeaipɨ mãɨnepa «Tachi Ak'õre piarã mãra ome bɨade» aipɨ.

Ará jere nɨbeeutade jõma arí oot'ɨ

²⁶ Mãɨ k'orea ũpẽarã, ¿sãmaasã́ arí oodaima? Mãra ará jere nɨbeeutade abaɨpa Tachi Ak'õre pedeadepema k'aripataɨ k'arii bɨma, abaɨpa Tachi Ak'õre pedea jarateai bɨma, abaɨpa Tachi Ak'õrepa unupida jarai bɨma, abaɨpa tachia ũrinak'apɨ́ pedeade pedeai bɨma, mãɨnepa abaɨpa mãɨ pedeada k'awa jarai bɨma. Maamina jõma mãɨ oodai p'anɨma ũpẽarãpa pia ĩjãanamẽrá.

²⁷ Tachia ũrinak'apɨ́ pedeade pedeadaipɨra, ume wa ũpea mãɨya pedeadai p'anɨma. Maamina abaabá pedeadai p'anɨma. Pedeak'ari abaɨpa mãɨ k'awa jarai bɨma.

²⁸ Maamina ũpẽarã ará jere nɨbeeutade mãɨ pedeada k'awa jaraparí neepɨra, tachia ũrinak'apɨ́ pedeade pedea k'ɨ̃ria bɨ k'ĩup'ea bai bɨma. Ichi k'ɨ̃risiade Tachi Ak'õrea k'ĩup'ea pedeai bɨma.

²⁹ Ara mãɨ jĩra Tachi Ak'õre pari pedeapataɨ ume wa ũpea pedeadai p'anɨma. Mãɨne jõmãɨrãpa ãchia pedea p'anɨ jĩrak'aua ũrinai p'anɨma piarã k'awadai k'orea.

³⁰ Ũpẽa aba pedeamaa bɨde Tachi Ak'õrepa chi ũri p'anɨnepema abaɨa ne unupisira, chi pedea bɨpa mãɨ ũpẽa itu pedeapii bɨma.

³¹ Jõmãɨrã abaabá Tachi Ak'õre pari pedeadai p'anɨma pia k'awadamẽrá mãɨnepa pia ĩjãanamẽrá.

³² Tachi Ak'õre pari pedeaparí paritua pedeak'ama, mãɨpari nɨ nɨbeeparima pedeai k'orea.

³³ Tachi Ak'õrepa ooroa nɨbeepik'ama, mãɨpari ne k'ɨ̃risiawẽa bapiparima. Ẽpẽrarã Tachi Ak'õreneerã ará jere nɨbeeutacha

³⁴ wẽrarã pedeadaiwẽa p'anɨma, mãɨpari k'ĩup'ea ũrinai p'anɨma. Ãchi k'ima pedea ũri p'ananai p'anɨma Moisepa bɨdade jara bɨ jĩra.

³⁵ Wẽrarãpa ne idi k'ɨ̃rianaipɨra, tiida p'anɨne ãchi k'imá ididai p'anɨma. Ũpẽarã ará jere nɨbeeutade wẽra pedeai pia bɨwẽma.

³⁶ ¿Tachi Ak'õre pedea mãranepa chesik'ãra? ¿Aba mãraapuru chesik'ãra?

³⁷ Abaɨpa Tachi Ak'õre pari pedeaparí k'ɨ̃risia bɨpɨra, wa Tachi Ak'õre Jaoredepa ne oo bɨ k'ɨ̃risia bɨpɨra, mãɨ ẽpẽrapa k'awai bɨma mɨa nãɨ k'art'ade bɨrude Tachi Chiparipa oopi bɨt'a.

³⁸ Abaɨpa mãɨ itu bɨipɨra, ichi sida itu bɨt'ɨ.

³⁹ Mãɨya ũpẽarã, pia jɨrɨt'ɨ Tachi Ak'õre pari pedeadait'a. Mãɨnepa tachia ũrinak'apɨ́ pedeade pedeapataɨrã pedeapit'ɨ.

⁴⁰ Maamina ãarea jĩrak'aua arí oot'ɨ.