1 Corintio 12 - Tachi Ak'õre Pedea

Tachi Ak'õre Jaorepa oopi bɨ k'orea jarateada

¹ Ũpẽarã, mɨa k'ɨ̃ria bɨma Tachi Ak'õre Jaorepa oopi bɨ k'orea mãrapa minachia k'awadamẽrá.

² Mãrapa k'awa p'anɨma Tachi Ak'õrene ĩjãanak'apɨɨrã p'anaside paritua k'orea piawẽa k'ɨ̃risiapachidama. Juapa oodada sãdo bede ĩjãapachidama. Chok'ae p'anɨwẽ pẽra pedeadak'ama.

³ Mãɨ k'orea mɨa k'ɨ̃ria bɨma mãrapa nãɨ k'awadait'a: Chi Tachi Ak'õre Jaoredepa pedea bɨpa «Jesú k'achia bɨade» ak'ama. Mãɨnepa chi Tachi Ak'õre Jaoredepa pedeawẽa bɨpa «Jesú jõmãɨrã Chipariade» ak'ama.

⁴ Tachi Ak'õre Jaore aba bɨpa tachiá tea bɨma ne wawaria oodamẽrá.

⁵ Tachi Chipari aba bɨ pae ne wawaria oopatama.

⁶ Tachi Ak'õre aba bɨpa tachiá ne wawaria oopi bɨma. Ichiapuru tachidepa mãɨ jõma ooparima.

⁷ Tachi Ak'õre Jaorepa tachicha ne oopiparima ũpẽarã ãarea k'aripadamẽrá.

⁸ Tachi Ak'õre Jaorepa chi eda tachidiidepemarã́ tea bɨma ichi k'ɨ̃risiadepa p'ue pedeadamẽrá. Ara Tachi Ak'õre Jaore aba bɨpa chi eda tachidiidepemarã́ tea bɨma ichidepa k'awadada p'ue jarateadamẽrá.

⁹ Ara Tachi Ak'õre Jaore aba bɨpa chi eda tachidiidepemarã́ tea bɨma ãchi p'ue minachia ĩjãa p'ananamẽrá. Mãɨnepa ara Tachi Ak'õre Jaore aba bɨpa chi eda tachidiidepemarã́ tea bɨma k'ɨdade berã p'ue jɨpa beepidamẽrá.

¹⁰ Mãɨnepa Tachi Ak'õre Jaorepa chi eda tachidiidepemarã́ tea bɨma ẽpẽerãpa ne p'ue oodak'apɨ́ p'ue oodamẽrá. Chi eda tachidiidepemarã́ tea bɨma ãchi p'ue Tachi Ak'õre pari pedeadamẽrá. Chi eda tachidiidepemarã́ tea bɨma p'ue k'awadamẽrá abaɨpa Tachi Ak'õre Jaoredepa pedea bɨ wa jaore mietaadepa pedea bɨ. Mãɨnepa chi eda tachidiidepemarã́ tea bɨma wawaria tachia ũrinak'apɨ́ pedeade pedeadamẽrá. Mãɨnepa chi eda tachidiidepemarã́ tea bɨma tachia ũrinak'apɨ́ pedeade jaradat'a k'awa jaradamẽrá.

¹¹ Ara Tachi Ak'õre Jaore aba bɨpa jõma mãɨ oopi bɨma. Ichia tachicha oopi bɨma ichia k'ɨ̃ria bɨ jĩra.

¹² Tachi k'ak'ua aba bɨmina tachi k'ak'uade nejõma uru p'anɨma. Chi Cristo ichide ĩjãapataɨrã ome ara mãɨ jĩra p'anɨma.

¹³ Chi eda tachidiidepemarã tachi judiorãpɨ, chi eda tachidiidepemarã judiorãwẽpɨ, chi eda tachidiidepemarã chi chipari pae pari mimiapataɨrãpɨ, chi eda tachidiidepemarã chi chipari pae pari mimiapataɨrãwẽpɨ. Maamina chi ara Tachi Ak'õre Jaore aba bɨpa tachi jõmãɨrã k'ak'ua aba bɨde bɨsima. Jõma tachia chi Jaore abarik'a bɨ jitasidama.

¹⁴ Tachi k'ak'uade nejõma uru p'anɨma. Maamina tachi k'ak'uade berã abarik'a p'anɨwẽma.

¹⁵ Tachi jĩrupa jaraipɨra: «Mɨ tachi juawẽ pẽra nãɨ tachi k'ak'uadepemawẽma», mãɨpuru ¿piarã tachi k'ak'uadepemawẽk'ãra?

¹⁶ Mãɨnepa tachi k'ɨɨrɨpa jaraipɨra: «Mɨ tachi tauwẽ pẽra nãɨ tachi k'ak'uadepemawẽma», mãɨpuru ¿piarã tachi k'ak'uadepemawẽk'ãra?

¹⁷ Tachi k'ak'uade abapuru tau badapara ¿k'ãrepa ũrii pasima? Tachi k'ak'uade abapuru k'ɨɨrɨ badapara ¿k'ãrepa ɨ̃i pasima?

¹⁸ Tachi Ak'õrepa tachi k'ak'uade nejõma bɨsima ichia k'ɨ̃ria bada jĩra.

¹⁹ Chi tachi k'ak'uade berã jõma abarik'a badapara k'ak'ua newẽa bai pasima.

²⁰ Tachi k'ak'uade nejõma uru p'anɨmina tachi k'ak'ua aba bɨma.

²¹ Mãɨpuru tachi taupa tachi juá p'ue jaraiwẽma: «Pɨwẽa, mɨ pia baipɨ». Mãɨnepa tachi poropa tachi jĩrua p'ue jaraiwẽma: «Mãrawẽa, mɨ pia baipɨ».

²² Tachimá, chi eda tachi k'ak'uade berã ãpia pida piawẽa bepɨ. Maamina mãɨrã newẽa, tachi k'ak'ua pia bak'ama.

²³ Mãɨnepa chi tachimá tachi k'ak'uade ne ãpia piawẽa k'ede pia ak'ɨ uru p'anaparima pia ununamẽrá. Mãɨnepa tachi k'ak'uadepema chi tachia unupidaiwẽa k'ede neet'á jɨ̃autapa jĩrak'aua mẽrapatama.

²⁴ Maamina tachi k'ak'uade k'ĩrawãrea berã mẽranak'ama. Tachi Ak'õrepa tachi k'ak'uade berã jõma ará oosima. Chi tachia unupidak'aɨ oosima pia yaadamẽrá.

²⁵ Mãɨya oosima tachi k'ak'ua piawẽa beepiemaapa, mãɨpari ara machi paara ak'ɨ p'ananamẽrá.

²⁶ Tachi k'ak'uadepema aba p'uaipɨra, ãarea p'uaparima. Ara mãɨ jĩra tachi k'ak'uadepema aba bɨ k'orea pia jaradaipɨra, ãarea arapá p'anapatama.

²⁷ Ara mãɨ jĩra mãra jõma ara Cristo k'ak'ua jĩra p'anɨma. Mãra ichi k'ak'uadepemarãpɨ.

²⁸ Tachi Ak'õrepa ũpẽarã t'ãena chi Jesucristopa peedarã naa bɨsima. Mãɨ ɨ̃ari chi ichi pari pedeapataɨrã bɨsima. Mãɨ ɨ̃ari ichi pedea jarateapataɨrã bɨsima. Mãɨ ɨ̃ari ãchidiidepemarã chi bee bɨsima ẽpẽerãpa ne p'ue oodak'apɨ́ p'ue oodamẽrá, ãchidiidepemarã chi bee bɨsima k'ɨdade berã p'ue jɨpa beepidamẽrá, ãchidiidepemarã chi bee bɨsima ũpẽarã k'aripadamẽrá, ãchidiidepemarã chi bee bɨsima chi ũpẽarã t'ãena k'ãre oodai p'anɨt'a k'awadamẽrá, mãɨnepa ãchidiidepemarã chi bee bɨsima wawaria tachia ũrinak'apɨ́ pedeade pedeadamẽrá.

²⁹ ¿Jõmãɨrã Jesucristopa peedaɨrãk'ãra? ¿Jõmãɨrã Tachi Ak'õre pari pedeapataɨrãk'ãra? ¿Jõmãɨrã Tachi Ak'õre pedea jarateapataɨrãk'ãra? ¿Jõmãɨrãpa ẽpẽerãpa ne p'ue oodak'apɨ́ oopataɨrãk'ãra?

³⁰ ¿Tachi Ak'õrepa jõmãɨrã́ teasik'ãra chi k'ɨdade berã p'ue jɨpa beepidamẽrá? ¿Tachi Ak'õrepa jõmãɨrã́ teasik'ãra chi tachia ũrinak'apɨ́ pedeade p'ue pedeadamẽrá? ¿Jõmãɨrãpa tachia ũrinak'apɨ́ pedeade jarada p'ue k'awa jaradaik'ãra?

³¹ Tachi Ak'õre Jaorepa oopi bɨdepema chi tachi atepe k'aripai bet'a jɨrɨt'ɨ. Naapae mɨa mãrá k'awapiipɨ sãmaasã́ nejõma p'ue atepe pia oo p'ananait'a.