1 Corintio 11 - Tachi Ak'õre Pedea

¹ Mɨ Cristo nipada jĩra nipapari pẽra mɨ jĩra nipat'ɨ.

Ũpẽawẽrarã ãchi poro ɨ̃rɨ jɨ̃pataɨ k'orea bɨda

² Ũpẽarã, ewaricha mɨ k'orea k'ɨ̃risia p'anɨ pẽra mãɨnepa mɨa jarateada ũri p'anɨ pẽra mãrá pia jararuma.

³ Maamina mɨa k'ɨ̃ria bɨma mãrapa k'awadai Cristo chi ɨmɨk'ĩira ãarea Chiparipɨ, chi ɨmɨk'ĩra chi wẽra chiparipɨ, mãɨnepa Tachi Ak'õre Cristo Chiparipɨ.

⁴ Ũpẽarã ará jere nɨbeeutade ɨmɨk'ĩra chi porode ne jɨ̃k'ari Tachi Ak'õrea ɨt'aa chiidiipɨra wa Tachi Ak'õre pari pedeaipɨra, ichi Chipari Cristo wap'eawẽa bɨt'a unupi bɨma.

⁵ Maamina wẽrapa Tachi Ak'õrea ɨt'aa chiidi bɨde wa Tachi Ak'õre pari pedea bɨde chi porode jɨ̃parí jɨ̃wẽpɨra, ichi k'ima wap'eawẽa bɨ unupi bɨma. Chi mãɨya oo bɨ poro bisia bɨ jĩra bɨma.

⁶ Wẽra chi porode jɨ̃parí jɨ̃epɨra, poro t'ɨɨi bɨma. Maamina poro bisia t'ɨɨk'ari p'erai bɨpɨra wa porowẽk'ari p'erai bɨpɨra, chi porode jɨ̃parí jɨ̃i bɨma.

⁷ Ɨmɨk'ĩrarã chi porode jɨ̃parí jɨ̃naiwẽa p'anɨma Tachi Ak'õrepa ara ichi jĩra ooda pẽra mãɨnepa chi ɨmɨk'ĩrapa Tachi Ak'õre ichi chiparit'a unupi bɨ pẽra. Maamina wẽerãpa unupi p'anɨma ɨmɨk'ĩra ãchi chiparit'a.

⁸ Tachi Ak'õrepa ɨmɨk'ĩra wẽranepa ooé pasima, mãɨpari wẽra ɨmɨk'ĩranepa oosima.

⁹ Mãɨnepa ɨmɨk'ĩra ooé pasima wẽra k'aripamẽrá, mãɨpari wẽra oosima ɨmɨk'ĩra k'aripamẽrá.

¹⁰ Mãɨ k'orea wẽrapa chi porode jɨ̃parí jɨ̃i bɨma unupii k'orea chi k'ima ichi chiparit'a. Mãɨya ooi bɨma Tachi Ak'õrepa ɨt'aripa peedaɨrãpa pia ununamẽrá.

¹¹ Maamina Tachi Chiparide ĩjãa p'anɨ pẽra wẽrapa chi ɨmɨk'ĩra k'aripai bɨma mãɨnepa ɨmɨk'ĩrapa chi wẽra k'aripai bɨma.

¹² Chi naapema wẽra ɨmɨk'ĩranepa chesima. Ichiaba chi ɨmɨk'ĩra wẽranepa cheparima. Maamina piarã ãarea Tachi Ak'õrenepa che p'anɨma.

¹³ Mãramá, ¿pia bɨk'ãra wẽrapa chi porode jɨ̃parí jɨ̃wẽa Tachi Ak'õrea ɨt'aa chiidii? Minachia k'ɨ̃risiat'ɨ pia bɨ k'awadai k'orea.

¹⁴ Ara tachi ẽpẽrarã sãmaasã́ p'anɨnepa k'awa p'anɨma ɨmɨk'ĩra puda orea ao beesira p'erai bɨt'a.

¹⁵ Maamina wẽra puda orea ao bɨ pia unupatama. Tachi Ak'õrepa chi wẽrá puda teasima chi porode jɨ̃parí jĩra jɨ̃mẽrá.

¹⁶ Abaɨpa mãɨ k'orea k'ĩruu pedea beeipɨra, mɨa nãɨ ichiá jararuma: taipa mãɨnepa ẽpẽrarã Tachi Ak'õrenepemarã pida mãɨ awara oodak'ama.

Tachi Chipari k'ɨ̃risiadai k'orea k'opataɨde ũpẽarãpa piawẽa oodada

¹⁷ Nãɨ bɨrude mɨa mãra k'orea p'ue pia jarawẽma. Mãra ará jere nɨbeeutade k'ĩra jĩp'a oodak'ama. Pia p'ananai k'aepẽra piawẽa p'aneepatama.

¹⁸ Naa jararuma mɨa ũri bɨ mãra ará jere nɨbeeutade k'ɨ̃risia k'ak'awá k'ɨ̃risia tuanapataɨ. Mãɨ pedea waa ara mɨchia ĩjãarumá ĩjãa bɨma.

¹⁹ Piarã mãra k'ɨ̃risia awara awará p'anɨnepa unupiipɨ k'airã Tachi Ak'õrepa pia unu bɨ.

²⁰ Mãra ará jere nɨbeeutade chi Tachi Chipari k'ɨ̃risiadai k'orea k'opataɨ k'odai k'orea, k'ĩra jĩp'a k'odak'ama.

²¹ Jõmãɨrã chedai naena machicha chi chik'o k'opatama. Mãɨne waapẽarã jarra nɨbeeparima mãɨnepa waapẽarã piu nɨbeeparima.

²² ¿Mãra te nea p'anɨk'ãra mãma nek'odai k'orea mãɨnepa netodai k'orea? ¿Mãrapa ẽpẽrarã Tachi Ak'õrenepemarã unuemaa p'anɨwẽk'ãra? ¿Mãɨpa chi nenea k'ede p'erapi p'anɨwẽk'ãra? ¿Mɨa k'ãre jaraima? ¿Mãɨ k'orea mɨa mãra pia jaraik'ãra? Mãɨ k'orea pia jarawẽma.

Chi Tachi Chipari k'ɨ̃risiadai k'orea k'opataɨ

²³ Mɨa mãrá jarateada Tachi Chipari Jesudepa k'awasima. Mãɨ nãɨya bɨma: teamasi Tachi Chipari Jesú jitapii naena ichi juade p'ana atasima.

²⁴ Tachi Ak'õrea sõpia bɨade ak'ari t'oet'aarude jarasima: «Jitadak'ari k'ot'ɨ. Nãɨ mɨ k'ak'uapɨ, mãra k'orea tearuma. Mɨ k'ɨ̃risiadai k'orea ara nãɨ jĩra oo p'anapariet'ɨ».

²⁵ Ara mãɨ jĩra nek'odak'ari chi pasu juade jitak'ari jarasima: «Nãɨ pasude eda bɨt'a mɨ oapɨ. Mɨ oadepa Tachi Ak'õrepa mãra ome pedea chiwidi bɨruma. Nãɨ toutacha mɨ k'ɨ̃risiadai k'orea to p'anapariet'ɨ».

²⁶ Tachi Chipari Jesú cherumisa mãɨ p'ana k'outacha mãɨnepa mãɨ pasude eda bɨ toutacha mãrapa ichi piuda k'orea jara p'anɨma.

²⁷ Mãɨ k'orea parituapa Tachi Chipari wap'eawẽa mãɨ p'ana k'oipɨra, mãɨ pasude bɨ toipɨra, nemietá oo bɨma. Tachi Chipari k'ak'ua mãɨnepa oa piawẽa bɨade a k'ɨ̃risia bɨma.

²⁸ Mãɨ p'ana k'oi naena, mãɨ pasude eda bɨ toi naena tachicha minachia ak'ɨi bɨma piarã Tachi Chipari wap'ea bɨ k'awai k'orea.

²⁹ Chi Tachi Chipari Jesú k'ak'ua wap'eawẽa bɨpa mãɨ p'ana k'oipɨra, mãɨ pasude eda bɨt'a toipɨra, Tachi Ak'õrepa nepɨra pará bɨade aipɨ.

³⁰ Mãɨ k'orea chok'ará mãraneenepema k'ak'ua piawẽa p'aneesidama, k'ɨdade p'aneesidama, mãɨnepa chi eda chi mãɨnepemarã piusidama.

³¹ Maamina ara tachit'u minachia jĩrak'aua ak'ɨdaipara, mãɨyara Tachi Ak'õrepa nepɨra pará bɨade aiwẽ pasima.

³² Maamina tachi ak'ɨrude, tachi ɨtɨaparima nãɨ ĩjũanepemarã ome nepɨra pará bɨade apiemaapa.

³³ Mãɨpuru mɨ ũpẽarã, Tachi Chipari k'ɨ̃risiadai k'orea k'opataɨ ooutade jõmãɨrã nɨt'ɨ ará k'odai k'orea.

³⁴ Abaɨ pida jarrapisia bɨpɨra ichi tiida nek'oi bɨma. Mãɨya ará jere nɨbeeutade Tachi Ak'õrepa mãra ɨtɨaiwẽma piawẽa oo p'anɨ k'orea. Mɨa wapida jarateai bɨ machimá wãrune jõma jarateaipɨ.