1 Corintio 10 - Tachi Ak'õre Pedea

Israeldepemarãpa nemietá oodada k'orea

¹ Ũpẽarã, mɨa k'ɨ̃ria bɨma mãrapa Moisé ewaride mãɨyana k'ɨ̃risia atuadawẽt'a. Mãɨ ewaride jõma tachi chõarãenapemarã Moisé ome p'ɨrrɨadada Tachi Ak'õrepa peeda jɨ̃ara ek'ari nipasidama mãɨnepa P'usa P'urea bɨ k'ĩaria wãsidama.

² Mãɨ p'usade mãɨnepa jɨ̃ara ek'ari jõma ãchi Moisé ome ará p'anasida pẽra Moisé t'ɨ̃nepa porochoadada jĩra p'anasidama.

³ Jõmãɨrãpa abarik'a chik'o Tachi Ak'õrepa pajãnepa teada k'opachidama.

⁴ Jõmãɨrãpa abarik'a pania Tachi Ak'õrepa p'ẽyanepa weapida topachidama. Mãɨ p'ẽya Cristo jara k'ɨ̃ria bɨma, ãchi wãutacha Cristo jaoredepa ãchi ome bada pẽra.

⁵ Maamina Tachi Ak'õrepa mãɨrãnepema chok'ará piawẽa unusima ãchia oo p'anana k'orea. Mãɨpuru ĩjũa pania newẽa bɨde ãarea piusidama.

⁶ Mãɨ ewaride mãɨyanapa tachiá k'awapi bɨma nemietá k'ɨ̃rianaiwẽa p'anɨ, ãchia k'ɨ̃rianana jĩra.

⁷ Juapa oodada sãdode ĩjãarãt'ɨ mãɨrãnepema waapẽarãpa ĩjãanana jĩra. Tachi Ak'õre pedeade ãchi k'orea nãɨya bɨ bɨma: «Ẽpẽrarã suak'abari p'aneenak'ari arapá ará nek'o tuanasidama mãɨnepa it'ua to tuanasidama. Mãɨya nak'ari p'irabaridak'ari ãchi k'ak'uapa oo k'ɨ̃ria bɨt'a oo tuaneesidama».

⁸ Tachi awaraɨ ome k'ãi p'aneenaiwẽa p'anɨma waapẽarãpa oodada jĩra. Ãchia mãɨya oo p'anɨ k'orea ewari abaɨde 23.000 ãarea piusidama.

⁹ Cristopa k'ãre ooit'a k'awadai k'orea, tachia nemietá oodaiwẽa p'anɨma waapẽarã ãchidiidepemarãpa oodada jĩra. Mãɨ k'orea ara ãchidiidepema taamapa k'aak'oak'ari piusidama.

¹⁰ Sõpiawẽa p'anɨnepa Tachi Ak'õre k'orea k'achia pedearãt'ɨ waapẽarã ãchidiidepemarãpa oodada jĩra. Mãɨ k'orea Tachi Ak'õrepa ɨt'aripa peeda chi tachi ãarea k'enaparipa ãchi ãarea piupisima.

¹¹ Jõma ãchi mãɨyanapa unupi bɨma sãmaasã́ Tachi Ak'õrepa chi nemietá ɨtɨaparit'a. Mãɨ Tachi Ak'õre pedeade bɨ bɨma, tachi nãɨ k'aadea ewaridepemarãpa ara mãɨ jĩra oopidaemaapa.

¹² Mãɨpuru abaɨpa minachia ĩjãa bɨ jĩra k'ɨ̃risia bɨpɨra, ara ichi tuaba jĩrak'aua bai bɨma nemietaade baemaapa.

¹³ Edaɨde tachi sõnepuru k'ɨ̃risiapatama nemietá oodai k'orea, jõmãɨrãpa ãarea mãɨya k'ɨ̃risiapataɨ jĩra. Mãɨ p'ue choadaepɨra, Tachi Ak'õrepa tachiá mãɨya k'ɨ̃risiapiwẽma. Mãɨnepa tachia mãɨya k'ɨ̃risia p'aneeutade ichia k'aripaipɨ choadamẽrá, ichia jara bɨ jĩra ewaricha oopari pẽra.

Juapa oodada sãdo itu bɨdai p'anɨ k'orea bɨda

¹⁴ Mãɨpuru mɨ ũpẽarã mɨa k'ɨ̃ria bɨma chi juapa oodada sãdo itu bɨt'ɨ.

¹⁵ Mɨa mãrá pedearuma k'ɨ̃risia k'awa berã́ pedearu jĩra. Minachia k'ɨ̃risiat'ɨ mɨa jara bɨt'a piarã wa sea k'awadai k'orea.

¹⁶ Tachi Chipari k'ɨ̃risia p'anɨne, tachia uvaba pasude bɨ k'orea Tachi Ak'õrea sõpia bɨade adak'ari topatama. Mãɨ toutade unupipatama tachi Cristo oadepa ichi ome ará p'anɨt'a. Mãɨnepa p'ana t'oet'aada k'outade unupipatama Cristo k'ak'uade minachia mĩananepa tachi ichi ome ará p'anɨt'a.

¹⁷ Tachia p'ana aba bɨ chok'araɨrãpa t'oet'aadak'ari k'opatama. Ara mãɨ jĩra tachi chok'ará p'anɨmina k'ak'ua aba bɨ jĩra p'anɨma.

¹⁸ Israel ĩjũanepemarãpa oopataɨ k'orea k'ɨ̃risiat'ɨ. Ãchia ãnimara Tachi Ak'õrea paateautade mãɨ k'iurudepema k'opatama. Mãɨ k'outade unupipatama Tachi Ak'õrene ĩjãa p'anɨt'a. (Ara mãɨ jĩra abaɨpa sãdoa ne k'iuru paateadadepema k'oipɨra, unupiipɨ mãɨ sãdode ĩjãa bɨt'a).

¹⁹ Maamina mɨa sãdo piarãane a jarawẽa bɨma. Chi sãdorã́ ne k'iuru teada, chi tachia k'opataɨ k'iuru ara mãɨ jĩra bɨma.

²⁰ Maamina chi Tachi Ak'õrene ĩjãanak'apɨɨrãpa ne k'iuru ãchi sãdorã́ teautade piarã jaore mietaarã́ tea p'anɨma. Tachi Ak'õrea tea p'anɨwẽma. Mãrapa mãɨ k'iuru k'odaipɨra, unupidaipɨ jaore mietade ĩjãa p'anɨt'a. Mɨa mãɨ k'ɨ̃riawẽma.

²¹ Chi jaore mietaarã́ teada pasudepema mãrapa todaipɨra, chi Jesucristo oa k'ɨ̃risiadai k'orea pasudepema todaiwẽa p'anɨma. Chi jaore mietaarã́ chik'o teadadepema mãrapa k'odaipɨra, chi Tachi Chipari k'ɨ̃risiadai k'orea k'opataɨ k'odaiwẽa p'anɨma.

²² Mãɨya oodaipɨra ¿Tachi Chipari k'ĩruupidaiwẽk'ãra? ¿Tachi ichi k'aepẽra jua chaarea p'anɨk'ãra?

Jõma oot'ɨ ũpẽarãpa pia k'ɨ̃risiadamẽrá

²³ Waapẽarãpa jara p'anɨma «Cristode ĩjãa bɨ pẽra mɨa k'ɨ̃ria bɨ jĩra jõma ooi bɨma». Maamina mɨa jararuma: nejõma ooi bɨmina ãarea tachia oo k'ɨ̃ria bɨpa tachi k'aripak'ama. Piarã jõma tachia oo k'ɨ̃ria bɨt'a ooi bɨmina jõma mãɨpa ũpẽarã k'aripak'ama.

²⁴ Abaɨ pida ara ichi pia bai k'orea jɨrɨ baiwẽa bɨma, mãɨpari waapẽarã pia p'ananamẽrá jɨrɨ bai bɨma.

²⁵ Ne k'iuru netopataɨmá netopataɨdepema ãarea k'odai p'anɨma. Maamina idirãt'ɨ mãɨ ne k'iuru chi sãdoa teadada pada k'awadai k'orea, mãɨ pia bɨwẽane a k'ɨ̃risia p'anɨ pẽra.

²⁶ Nãɨ ĩjũa mãɨnepa nejõma nãɨ ĩjũane nɨbɨ Tachi Chiparipa oosima. Mãɨpuru nejõma k'odai p'anɨma.

²⁷ Chi Jesude ĩjãawẽa bɨpa mãra nek'odamẽrá t'ɨ̃ipɨra, mãɨne wã k'ɨ̃rianaipɨra, wãt'ɨ. Ichia tearut'a k'ot'ɨ. Idirãse mãɨ chik'o sãdoa teadada pada k'awai k'orea, mãɨ pia bɨwẽane a k'ɨ̃risia bɨ pẽra.

²⁸ Maamina abaɨpa «nãɨ ne k'iuru sãdoa teadaadade» aipɨra, mãɨ k'orãt'ɨ, chi mãɨya jaradapa mãɨ pia bɨwẽane a k'ɨ̃risiaipẽra.

²⁹ Mɨa mãɨya jarawẽa bɨma, mãrapa mãɨ chik'o k'odaiwẽa p'anɨt'a. Maawẽapuru mɨa jara bɨma chi abaɨpuru mãɨya k'ɨ̃risia bɨt'a. Abaɨpa nãɨya k'ɨ̃risiaipɨ: Mɨa oo k'ɨ̃ria bɨt'a oorude abaɨpa piawẽa bɨade a k'ɨ̃risiaipɨra, ¿mãɨya p'ue ooi bɨk'ãra?

³⁰ Mãɨ mɨ nek'o bɨ k'orea Tachi Ak'õrea sõpia bɨade aipɨra, waapẽarã́ k'achia pedeapiiwẽa bɨma, chi mãɨ mɨa Tachi Ak'õrea sõpia bɨade ada k'orea.

³¹ Maamina mɨa jararuma: mãra nek'o p'anɨne, neto p'anɨne wa ne oo p'anɨne jõma oot'ɨ ẽpẽrarãpa Tachi Ak'õre k'orea pia jaradamẽrá.

³² Mãrapa ne oo p'anɨnepa judiorã, judiorãwẽ mãɨnepa ẽpẽrarã Tachi Ak'õrenepemarã nemietaade baepirãt'ɨ.

³³ Ara mãɨ jĩra mɨa oo bɨdepa jõmãɨrã́ pia k'ɨ̃risiapi k'ɨ̃ria bɨma. Mɨt'a pia bai k'oreapuru jɨrɨk'ama, mãɨpari ẽpẽrarã chok'ará pia p'ananamẽrá jɨrɨparima. Mãɨya mɨa oo bɨdepa ãchia Cristode ĩjãanaipɨ Tachi Ak'õrepa k'aripamẽrá.